ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ޤާއިމުކޮށްފައިވާ ދުނިޔޭގެ ފެންވަރުގެ އައު އޮޕަރޭޝަން ތިއޭޓަރުގެ ބޭނުންކުރަން މިއަދު ފަށައިފައެވެ. މިއީ މުޅި ރާއްޖޭގެ ސިއްހީ ނިޒާމަށް ލިބިގެންދިޔަ އިތުރު ކުރިއެރުމެކެވެ.
ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި (ޑީއެޗް-11) ތަރައްޤީކޮށްފައިވާ ހައިބްރިޑް އޮޕަރޭޝަން ތިއޭޓަރާއި ކެތްލެބްގެ ޚިދުމަތް ފެށުމާއެކު، މިހާރު އެތަނުން ސިކުނޑިއާއި މައިބަދައިގެ އިތުރުން ހިތުގެ އޮޕަރޭޝަންތައް ކުރެވޭނެއެވެ. މީގެ އިތުރުން ހަށިގަނޑުގެ އެކި ތަންތަނުގައި ލޭގަނޑުވުމުގެ ސަބަބުން ހަދަންޖެހޭ އެކި ޕްރޮސީޖަރތައްވެސް ހެދޭނެކަމަށް ހޮސްޕިޓަލުން މަޢުލޫމާތު ދިނެވެ.
ޑީއެޗް-11 ގައި ޚާއްސަ ވަކި އައިސީޔޫއެއް ޤާއިމުކޮށްފައިވާއިރު، އެތަނުގައި އެއްފަހަރާ 10 މީހުންނަށް ޚިދުމަތްދެވޭނެ އިންތިޒާމު ވަނީ ހަމަޖައްސާފައެވެ. އަދި ބޮޑެތި ސަރޖަރީތައް ހަދާފައިވާ ބަލިމީހުން މޮނިޓަރކުރުމަށް ޚާއްސަ ނިޒާމެއްވެސް ޤާއިމުކޮށްފައިވެއެވެ. މި ޚިދުމަތްތައް ފޯރުކޮށްދިނުމަށްޓަކައި ސްްޕެޝަލިސްޓް ނަރުހުންގެ ޓީމެއް ތަމްރީނުކޮށްފައިވާއިރު، އިތުރު ނަރުހުން ތަމްރީނުކުރުމުގެ މަސައްކަތްވެސް ކުރިއަށްދާކަމަށް ހޮސްޕިޓަލުން ބުންޏެވެ.
"މި އައު ތިއޭޓަރާއެކު، ރާއްޖޭގައި ކުރެވޭ ޞިއްޙީ ފަރުވާގެ ފެންވަރު އިތުރަށް ރަނގަޅުވެގެންދާނެ. މީގެ ސަބަބުން ގިނަ ބަލިތަކަށް ފަރުވާ ހޯދުމަށް ރާއްޖެއިން ބޭރަށް ދާންޖެހޭ މިންވަރު މަދުވެގެންދާނެ." ދަރުމަވަންތަ ހޮސްޕިޓަލުން ބުންޏެވެ.
މި އައު ތިއޭޓަރުގެ ބޭނުންކުރަން ފެށުމާއެކު، ދަރުމަވަންތަ ހޮސްޕިޓަލުން ފޯރުކޮށްދޭ ޚިދުމަތްތައް އިތުރަށް ފުޅާވެގެންދާނެކަމަށް ބެލެވެއެވެ. މިކަމުގެ ސަބަބުން ރާއްޖޭގެ ޞިއްޙީ ދާއިރާއަށް ބޮޑު ކުރިއެރުމެއް ލިބި، ރައްޔިތުންނަށް ދުނިޔޭގެ ފެންވަރުގެ ޚިދުމަތެއް ލިބިގެންދާނެކަމަށް ލަފާކުރެވެއެވެ.
