ދަރުމަވަންތަ ހޮސްޕިޓަލުން އައިވީއެފް ފުރިހަމަކުރި ދެމަފިރިއަކަށް ފުރަތަމަ ފަހަރަށް ދަރިއަކު ލިބިއްޖެ އެވެ.
އެ ހޮސްޕިޓަލުގެ ނެޝަނަލް ފާޓިލިޓީ ސެންޓަރު މެދުވެރިކޮށް އައިވީއެފްގެ ފަރުވާއާއެކު ކާމިޔާބުކަމާއެކު ދެމަފިރިއަކަށް ދަރިއަކު ލިބުން ފާހަގަކޮށް އެކަމުގެ އުފަލުގައި ގްރޫޕް އޮފް ހޮސްޕިޓަލްސްގެ ސީއީއޯ ހަލީމް ވިދާޅުވީ އެއީ ތާރީހީ ކާމިޔާބީއެއް ކަމަށާއި، ރާއްޖޭގައި ދަރިމައިވުމުގެ ސިއްހަތާއި ގުޅޭ ފަރުވާ ހޯދަމުންދާ ފަރާތްތަކަށް ލިބޭ އުންމީދެއް ކަމަށެވެ.
މި ކާމިޔާބީގެ ފަހަތުގައިވާ ޓީމަށް ސީއީއޯ ހަލީމް ވަނީ ވަރަށް ބޮޑަށް ޝުކުރު އަދާކުރައްވާފަ އެވެ. ހަލީމް އިތުރަށް ވިދާޅުވީ މި ހިދުމަތް ހޯދުމަށްޓަކައި ރާއްޖެއިން ބޭރުގައި ގިނަ ދުވަސްތަކެއް ހޭދަކޮށް މާލީ ގޮތުން ބޮޑު ހޭދައެއް ކުރަން ޖެހުމަކީ ދިވެހި އާއިލާތަކުން އުފުލަމުން ދިޔަ ބޮޑު ތަކުލީފެއް ކަމަށާއި މިކަމަށް ހައްލެއް ގެނެސްދެއްވީތީ ރައީސް ޑރ. މުޢިއްޒުއަށް ޝުކުރު އަދާކުރައްވާ ކަމަށެވެ.
ދަރިމައިވުމުގައި ދަތިތައް ހުންނަ ފަރާތްތަކަށް ފޯރުކޮށްދޭ އައިވީއެފްގެ ހިދުމަތް އާސަންދަ މެދުވެރިކޮށް ލިބޭނެގޮތް ހަމަޖައްސައިދިނުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. އެގޮތުން 2024 ވަނަ އަހަރު ފާޓިލިޓީ ކެއާ ޓްރަސްޓް ފަންޑުން އައިވިއެފްގެ ފަރުވާ އަށް 4.78 މިލިއަން ރުފިޔާ ހަރަދުކޮށްފައިވާއިރު، ނިމިދިޔަ އަހަރުގެ އޮކްޓޫބަރު މަހާ ހަމައަށް ޖުމްލަ 7.13 މިލިއަން ރުފިޔާ ހަރަދުކޮށްފައިވެ އެވެ. މި އެހީގެ ދަށުން 23 ފަރާތެއްގެ އައިވީއެފް ފަރުވާ ކާމިޔާބު ކަމަށް އެންސްޕާއިން ފާހަގަކޮށްފައިވެ އެވެ.
ދަރުމަވަންތަ އިން އައިވީއެފްގެ ފަރުވާ ހޯދުމަށް ނިމިދިޔަ އަހަރު ވަނީ 50 ފަރާތަކަށް ފުރުސަތު ހުޅުވާލާފަ އެވެ. މިކަމަށް އެދި ހުށަހަޅަން ހުޅުވާލީ "ވަންގަވް" ޕޯޓަލް މެދުވެރިކޮށެވެ.
