ދަރުމަވަންތަ ހޮސްޕިޓަލު އިމާރާތްކުރަން ހަވާލުކުރުމުގައި ކޮރަޕްޝަން ހިންގާފައިވާކަމަށް ތުހުމަތުކުރާ މައްސަލައެއްގައި އައިޖީއެމްއެޗްގެ ކުރީގެ ޑެޕިއުޓީ ސީއީއޯ އަދި މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މިހާރު ސީއީއޯ މުހައްމަދު ރިޝްވާންގެ މައްޗަށް ދައުވާކުރަން އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.
އެނގިފައިވާ ގޮތުގައި ރިޝްވާންގެ މައްޗަށް ދައުވާކުރުމާ މެދު އަދި ޕީޖީ އޮފީހުން ގޮތެއް ނިންމާފައެއް ނުވެއެވެ. އެ މައްސަލަ އޮތީ ޑިއުޓީ ޕްރޮސިކިއުޝަން މަރުހަލާގަ އެވެ. ޑިއުޓީ ޕްރޮސެކިއުޝަނަކީ ޖިނާއީ މައްސަލަތައް ތަހުގީގުކުރާ އިދާރާތަކުން ދައުވާކުރަން ޕީޖީ އޮފީހަށް ހުށަހަޅާ މައްސަލަތައް ބަލައިގަތުމުގެ ކުރިން ކުރިއަށްގެންދާ މަރުހަލާ އެވެ.
މިކަމާ ގުޅިގެން އޭސީސީއާ ތަކުރާރުކޮށް ސުވާލުކުރުމުން އެ ކޮމިޝަނުން ޖަވާބެއް ދީފައެއް ނުވެ އެވެ. ނަމަވެސް ރިޝްވާންގެ މައްސަލައެއް ޑިއުޓީ ޕްރޮސެކިއުޝަނަށް އަންގާރަ ދުވަހު ލިބިފައިވާކަން ޕީޖީ އޮފީހުން ވަނީ ކަށަވަރުކޮށްދީފަ އެވެ. ޕީޖީ އޮފީހުން ބުނީ އޭސީސީން ޑިއުޓީ ޕްރޮސެކިއުޝަނަށް ފޮނުވާފައި އޮތީ އައިޖީއެމްއެޗްގެ 25 ބުރި އިމާރާތާ ގުޅޭ މައްސަލައެއް ކަަމަށެވެ.
ކުރީގެ ރައީސް އަބްދުالله ޔާމީންގެ ސަރުކާރުގައި އިމާރާތްކުރި ދަރުމަވަންތަ ހޮސްޕިޓަލް އިމާރާތްކުރަން ބީލަމަށް ނުލައި ހަވާލުކުރުމުގައި ކޮރަޕްޝަންގެ އަމަލު ހިންގާފައިވާކަމުގެ މައްސަލަތަކެއް އޭސީސީން އޭރުވެސް ބެލި އެވެ. ނަމަވެސް 2017 ވަނަ އަހަރު އޭސީސީގެ ކުރީގެ މެމްބަރުން ވަނީ ދަރުމަވަންތަށް ހޮސްޕިޓަލް އިމާރާތް ކުރުމުގެ މައްސަލައިގައި ކޮރަޕްޝަން ނެތްކަމަށް ނިންމައި އެ މައްސަލަ ފައިލްކޮށްފަ އެވެ.
އޭރުގެ އިދިކޮޅު ފަރާތްތަކުން ބުނަމުންދިޔަ ގޮތުގައި ދަރުމަވަންތަ ހޮސްޕިޓަލް ފަދަ އިމާރާތެއް އަޅަން ހޭދަވާނީ 40 މިލިއަނެއްހާ ޑޮލަރުގައި ކަމަށެވެ. އެ މަސައްކަތް 53 މިލިއަން ޑޮލަރަށް ނިންމައިދިނުމަށް ޗައިނާގެ ހާބަ އިންޖިނިއަރިން ކުންފުނިން ސަރުކާރަށް ހުށަހަޅާފައިވަނިކޮށް އެ މަސައްކަތް ހަވާލުކުރީ 143 މިލިއަން ޑޮލަރަށް ސިންގަޕޫރުގެ ޝެންހުއާ ކޮންސްޓްރަކްޝަން ކުންފުންޏާ އެވެ.
ބިޑަކާއި ނުލައި މިހާ އަގުބޮޑުކޮށް އެ މަސައްކަތް ހަވާލުކުރީ އައިޖީއެމްއެޗްގެ ޑެޕިއުޓީ ސީއީއޯގެ މަގާމުގައި ރިޝްވާން ހުންނެވި ދުވަސްވަރު އެވެ. މާކެޓު ރޭޓަށްވުރެ އެތައްގުނައެއް ބޮޑުކޮށް ހެދި އިމާރާތް ނިންމައި އެތަނަށް ބޭނުންވާ އެންމެ ޒަމާނީ އިކުއިޕްމެންޓް ހޯދުމުހެ ނަމުގައި އެކު ޖުމްލަ 220 މިލިއަނެއްހާ ޑޮލަރު ހޭދަކޮށްފައިވާކަމަށް ބެލެވޭއިރު ފުރަތަމަ ގެނެސްފައި ހުރީވެސް އައުޓްޑޭޓްވެފައި ހުރި އިކުއިޕްމަންޓުތައް ކަމަށް ނިމިދިޔަ ސަރުކާރުން ވަނީ ތުހުމަތުކޮށްފަ އެވެ. އަދި އިމާރާތްކޮށްފައި ހުރީވެސް އެންމެ އެކަށޭނެ ގޮތަކަށް ނޫންކަމަށާއި އެހެންވެ އިމާރާތުގެ ދޮރުތައްވެސް އަލުން ބަދަލުކުރަންޖެހުނު ކަމަށް މިދިޔަ ސަރުކާރުން ވަނީ ބުނެފަ އެވެ.
ރިޝްވާނަކީ މީގެ ކުރިން ސިފައިންގެ ވަޒީފާއާއި ފުލުހުންގެ ވަޒީފާގައި ގިނަ ދުވަސްތަކެއް ވަންދެން ހިދުމަތް ކުރައްވާފައިވާ ބޭފުޅެެއް ވެސް މެއެވެ. ޑެޕިއުޓީ ކޮމިޝަނަރުގެ މަގާމުގައި ހުންނެވުމަށް ފަހު، އޭނާ ރިޓަޔާކުރެއްވީ 2012 ވަނަ އަހަރު އެވެ. ރިޝްވާން އައިޖީއެމްއެޗުގެ ޑެޕިއުޓީ ސީއީއޯގެ މަގާމު ފުރުއްވީ ޔާމީންގެ ވެރިކަމުގެ ފަހުކޮޅެވެ. އޭގެ ފަހުން އަމިއްލަ ކުންފުންޏެއްގެ އިސް މަގާމެއް ފުރުއްވުމަށް ފަހު، އެމްޕީއެލްގެ ސީއީއޯ ކަމާ ހަވާލުވީ މިދިޔަ ފެބްރުއަރީ މަހުގެ ކުރީކޮޅެވެ. އެމްޕީއެލް އާ ހަވާލުވުމަށްފަހު އެތަނުންވެސް ކޮރަޕްޝަނުގެ އަމަލުތައް އޭނާ ހިންގާ ކަމަށް ގިނަ ބަޔަކު މިހާރުވެސް ދަނީ ތުހުމަތު ކުރަމުންނެވެ.
