ރާއްޖޭގެ އެންމެ ބޮޑު ހޮސްޕިޓަލް، އައިޖީއެމްއެޗް އިން ޕޭޝަންޓް ސަޕޯޓް ކޯޑިނޭޓަރުގެ މަގާމުގެ 40 ވަޒީފާ މިއަދު އިއުލާން ކޮށްފި އެވެ.
ޕޭޝަންޓް ސަޕޯޓް ކޯޑިނޭޓަރ ގެ މަގާމަކީ އެ ހޮސްޕިޓަލަށް ޒިޔާޒަތްކުރާ ބަލި މީހުންނާއި އެހީތެރިންނަށް މަރުހަބާ ކިޔުމާއި މަގުދެއްކުމުގެ ބޭނުމުގައި އުފައްދާފައިވާ މަގާމެކެވެ. އައިޖީއެމްއެޗް އިން ނެރެފައިވާ އިއުލާނުގައި ވާގޮތުން މުސާރައިގެ ގޮތުގައި މި މަގާމުގައި 12،000 ރުފިޔާ ލިބޭނެ އެވެ.
މިފަދަ މަގާމެއް މި ހޮސްޕިޓަލުން އުފެއްދި މައިގަނޑު ސަބަބަކީ އެ ހޮސްޕިޓަލަށް ޒިޔާރަތް ކުރާ ބަލިމީހުންނަށް ރަނގަޅު ހިދުމަތެއް ފޯރުކޮށްދިނުމުގެ ގޮތުންނެވެ. މި އަހަރު ޖުލައި މަހު އުފެއްދި މި މަގާމަށް އެންމެ ފުރަތަމަ ނަގާފައިވަނީ 55 މުވައްޒަފުންނެވެ.
މި މަގާމަށް ކުރިމަތިލުމުގެ ސުންގަޑި އޮކްޓޫބަރު 21 ގެ 13:00 އަށް ހަމަވާއިރު މައިގަނޑު މަސްއޫލިއްޔަތުތަކަކީ؛
- ހޮސްޕިޓަލަށް ޒިޔާރަތްކުރާ ބަލިމީހުންނާއި އެހީތެރިންނަށް މަރުހަބާ ކިޔުމާއި މަގުދެއްކުމުގައި އެހީތެރިކަން ފޯރުކޮށްދިނުން.
- ދިމާވާ މައްސަލަތަކަށް ވަގުތުން އެހީތެރިކަން ފޯރުކޮށްދިނުމާއި ހައްލުކޮށްދިނުން.
- ހިދުމަތް ހޯދަން އަންނަ ފަރާތްތަކަށް އެންމެ ފުރިހަމައަށް މައުލޫމާތު ފޯރުކޮށްދިނުން.
- ހޮސްޕިޓަލުގައި މަސައްކަތްކުރާ އިރު، މާހައުލާއި ހިދުމަތުގެ ފެންވަރު ރަނގަޅަށް ބެލެހެއްޓުުމަށް މަސައްކަތް ކުރުން.
- އެކިއެކު ފަރާތްތަކުގެ ހިޔާލު އެއްކުރުމާއި ތަޖުރިާތައް މޮނިޓަރކުރުން.
- އޯގާތެރިކަމާއި، ހަމްދަރުދީވުމާއި އަދި ހިނިތުންވުމާއެކު މުއާމަލާތްކުރުން.
- ހޮސްޕިޓަލުގެ ސިޔާސަތުތައް ހާސިލްކުރުމުގެ ގޮތުން މަސައްކަތްތަކުގައި ފުރިހަމައަށް ބައިވެރިވެ އޮފީހުގެ ރަސްމީ މަސައްކަތާ ގުޅޭގޮތުން ހަވާލުކުރެވޭ އެންމެހާ މަސައްކަތްތައް ކުރުން.
މަގާމުގެ މައިގަނޑު ޝަރުތަކީ ގްރޭޑް 10 ނިންމާފައިވުމެވެ. އަދި ވަޒީފާއަށް އެންމެ ގާބިލު ފަރާތެއް ހޮވުމުގެ ގޮތުން ބަލާނެ ކަންކަމަކީ؛
- މަގާމުގެ މަސައްކަތާ ގުޅޭގޮތުން ދާއިރާއިން ހާސިލްކޮށްފައިވާ ތައުލީމާއި ތަމްރީން.
- މަސައްކަތުގެ ތަޖުރިބާ
- މަގާމުގެ މަސައްކަތައް ބޭނުންވާ ހުނަރާއި، ފެންވަރާއި، ގާބިލުކަމާއި އެހެނިހެން ސިފަތައް
މި ވަޒީފާއަށް ޝައުގުވެރިކަން ހުރި ފަރާތްތަކުން ވަޒާފާ އަށް އެދޭ ފޯމާއި، ސީވީ އާއި، އައިޑީ ކާޑާއި، ތައުލީމު ސެޓްފިކެޓުތައް އަދި ތަޖުރިބާގެ ސިޓީތައް އެއް ފައިލެއްގެ ގޮތުގައި ފޮނުވާނީ؛ [email protected]
