މި މަހު ފަށާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ފިރިހެން ޗެމްޕިއަންޝިޕްގެ ރާއްޖޭގެ ގައުމީ ފިރިހެން ވޮލީބޯޅަ ޓީމުގެ ކެޕްޓަން ކަމަށް އިސްމާއިލް ސާޖިދު ކުޑައްކާޓޭ އަލުން ހަމަޖައްސައިފި އެވެ.

މިދިޔަ އަހަރު އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ގައުމީ ޓީމުގެ ކެޕްޓަންކަން ކުރީ އާދަމް ފައިރޫޒެވެ.

ކުޑަކާއްޓެ ވަނީ ކާވާ އިން ބޭއްވި ބީޗްވޮލީ ޗެމްޕިއަންޝިޕްގެ ދެ މުބާރާތުން ރަން މެޑަލް ހޯދައި، ޓުއާ މުބާރާތުން ރިހި މެޑަލް ހޯދައިފަ އެވެ. ރަން މެޑަލް ހޯދީ، 2022 ވަނަ އަހަރާއި މި އަހަރު އެވެ. އަދި ރިހި މެޑަލް ހާސިލްކުރީ މިދިޔަ އަހަރުގެ މުބާރާތުންނެވެ.

ކުޑައްކައްޓޭ ބޭނުންވަނީ ކާވާ އިން ބާއްވާ ބީޗްވޮލީބޯޅައިގެ ހުރިހާ މުބާރާތަކުން ރަން މެޑަލް ނެގުމަށް ކަމަށެވެ. މީގެ އިތުރުން އައިއޯއައިޖީ އަދި ސާފް ގޭމްސްގެ ރަން މެޑަލް ހޯދުން އެއީ އަމާޒެއް ކަމަށް ކުޑަކާއްޓޭ ބުނެފައި ވެއެވެ.