ބިޒްނަސް ސެންޓަރ ކޯޕަރޭޝަން (ބީސީސީ) އިން ކްރިއޭޓިވް އިކޮނޮމީ ފަންޑުގެ "ޕްރޮޖެކްޓް ބޭސްޑް ފައިނޭންސިންގ ސްކީމް" ގެ ދަށުން މާލީ އެހީތެރިކަން ހޯދުމަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

ބީސީސީން ކުރި އިޢުލާނެއްގައި ބުނެފައިވާ ގޮތުގައި، މި ސްކީމްގެ ދަށުން މާލީ އެހީތެރިކަން ހޯދުމަށް ޝައުޤުވެރިވާ ފަރާތްތަކަށް އޮންލައިން ޕޯޓަލް މެދުވެރިކޮށް ފޯމު ހުށަހެޅޭނެއެވެ. މި ސްކީމްގެ ދަށުން އެހީތެރިކަން ފޯރުކޮށްދެވޭނީ ފިލްމު އުފެއްދުން، މިއުޒިކް އުފެއްދުން، އާޓް އެންޑް ކްރާފްޓް އަދި ކޮންޓެންޓް ކްރިއޭޝަންގެ ދާއިރާތަކަށެވެ.

މި ސްކީމްގެ ދަށުން މާލީ އެހީތެރިކަމަށް އެދި ހުށަހެޅޭނީ ރަޖިސްޓަރީކޮށްފައިވާ އެންމެ ކުދި ނުވަތަ ކުދި ވިޔަފާރިތަކުގެ ތެރެއިން ސައްތައިން ސައްތަ ދިވެހިން ހިއްސާވާ ވިޔަފާރިތަކަށާއި، ބީސީސީގެ އަމިއްލަ މަސައްކަތްކުރާ މީހުންގެ ދަފްތަރުގައި ރަޖިސްޓަރީވެފައިވާ ފަރާތްތަކަށެވެ. ކޮންމެ ފަރާތަކަށްވެސް ހުށަހެޅޭނީ އެއް ފޯމެވެ.

މި ސްކީމްގެ ދަށުން 50,000 އާއި 300,000 ދިވެހި ރުފިޔާއާ ދެމެދުގެ އަދަދަކަށް މާލީ އެހީތެރިކަން ފޯރުކޮށްދެވޭނެއެވެ. އަދި އެހީތެރިކަން ލިބޭ ފަރާތްތަކަށް ބީސީސީއިން އިންކިއުބޭޝަންގެ ޚިދުމަތެއް ފޯރުކޮށްދޭނެއެވެ. މި ޚިދުމަތަށް، މާލީ އެހީތެރިކަން ފޯރުކޮށްދޭ އަދަދުގެ 5% އިންކިއުބޭޝަން ފީގެ ގޮތުގައި ނެގޭނެއެވެ.

މި ސްކީމާ ގުޅޭ އިތުރު މަޢުލޫމާތު ބީސީސީގެ ހޮޓްލައިން 3305555 އަށް ގުޅައިގެން ނުވަތަ cef@bcc.mv އަށް އީމެއިލް ކުރައްވައިގެން ލިބިވަޑައިގަންނަވާނެއެވެ.