ސަން ސިޔާމް ރިސޯޓްސްގެ ވެރިޔާ އަދި މީދޫ ދާއިރާގެ ރައްޔިތުންގެ މަޖިލިހުގެ މެންބަރު އަހުމަދު ސިޔާމް މުހައްމަދު (ސަން ސިޔާމް) އާއި އާމިނަތު ޒާރާ ކައިވެނި ބައްލަވައިގެންފިއެވެ.

އުމުރުން 55 އަހަރުގެ ސިޔާމް އާއި 23 އަހަރުގެ ޒާރާގެ ކައިވެނީގެ ހަފުލާ މިއަދު ހަވީރު ބާއްވާފައިވަނީ މާލެ އަތޮޅުގައި އޮންނަ ސިޔާމްގެ އޮޅުވެލި ރިސޯޓުގައެވެ.

މިއީ ރާއްޖޭގައި ފަހުގެ ތާރީޚެއްގައި އެންމެ ގިނަ ބައެއްގެ ސަމާލުކަން ލިބުނު ކައިވެނިކަން  ފާހަގަކޮށްލެވެއެވެ.

ޒާރާއަކީ މިދިޔަ ބޮޑު އީދުގައި ބ. ކަމަދޫން ގިނަ ބައެއްގެ ލޯބި ހޯދި ނެށުންތެރިއެކެވެ. ޒާރާގެ ނެށުންތައް ސޯޝަލް މީޑިއާގައި މަޝްހޫރުވެގެންދިއުމާއެކު، ރާއްޖޭގެ ގިނަ ފިރިހެނުން ވަނީ ޒާރާއަށް ޝައުޤުވެރިކަން ފާޅުކޮށްފައެވެ.

ރިސޯޓުގައި ކައިވެނި ޙަފްލާ ބޭއްވި ނަމަވެސް ޒާރާގެ ރަށް، ކަމަދޫގައި އެ ރަށުގެ ރައްޔިތުންނަށް ޚާއްސަކޮށް ޙަފްލާއެއް ބޭއްވުމަށްވެސް ވަނީ ނިންމާފައެވެ.

މި ކައިވެންޏާއި ގުޅިގެން ކަމަދޫއަށް ތިން އަސްވެސް ވަނީ ގެންގޮސްފައެވެ.

ސިޔާމާއި ޒާރާގެ ރަންކިޔުމުގެ ޙަފްލާއަށްވެސް ބޮޑު ސަމާލުކަމެއް ވަނީ ލިބިގެން ގޮސްފައެވެ. އެގޮތުން ޒާރާ ސިޔާމަށް ކިޔާދީފައިވާ ވަރަށް އަސަރުގަދަ ލަވައެއް ވަނީ ސޯޝަލް މީޑިއާގައި ވައިރަލްވެފައެވެ.