2024 ވަނަ އަހަރުގެ ބޮޑު އީދު ކުޅިވަރުތަކުގެ ތެރެއިން މުޅި ރާއްޖެއަށް މަޝްހޫރުވެގެންދިޔަ ބ. ކަމަދޫއަށް އުފަން ޒާރާ، ދެ އަހަރުގެ މެދުކެނޑުމަކަށްފަހު އަލުން ނެށުމުގެ ދާއިރާއަށް އެނބުރި އަތުވެއްޖެ އެވެ.

ބޮޑު އީދުގައި ދެއްކި ފުރިހަމަ ނެށުންތަކާއެކު ޒާރާ ވެގެންދިޔައީ ރާއްޖޭގެ ގިނަ ބައެއްގެ، ހާއްސަކޮށް ފިރިހެނުންގެ ހިތްތައް އަތުލައިގަތް ފަންނާނަކަށެވެ. މީގެ ތެރޭގައި ރާއްޖޭގެ މަޝްހޫރު ބައެއް ވިޔަފާރިވެރިންވެސް ހިމެނުނުއިރު، ޒާރާގެ ހަޔާތުގެ ބައިވެރިއަކަށް އިހުތިޔާރުކުރީ ރާއްޖޭގެ ފުންނާބު އުސް ވިޔަފާރިވެރިޔާ އަދި ރިސޯޓް އޯނަރު، ދ. މީދޫ ދާއިރާގެ މަޖިލިސް މެންބަރު އަހްމަދު ސިޔާމް މުހައްމަދެވެ.

2024 ވަނަ އަހަރުގެ އޮކްޓޫބަރު މަހު ކުރެވުނު މި ކައިވެންޏާއެކު ޒާރާ ވަނީ ނެށުމުގެ ދާއިރާއާ ދުރަށް ގޮސްފަ އެވެ. ސިޔާމްގެ އުމުރުފުޅުން 55 އަހަރުގައި، 23 އަހަރުގެ ޒާރާ އާ އޭނާ ކައިވެނި ކުރީ ދެ އަންބަށެވެ. ނަމަވެސް، މި ކައިވެނި މާ ގިނަ ދުވަހަކަށް ދެމިގެންނުގޮސް، 2025 ވަނަ އަހަރުގެ ޖުލައި މަހުގެ ތެރޭގައި ވަނީ ރޫޅިފައެވެ. މައުލޫމާތު ލިބޭ ގޮތުގައި މި ކައިވެނި ރޫޅާލާފައިވަނީ ދެ ފަރާތުގެ މެދުގައި މަޝްވަރާކުރެވިގެންނެވެ.

ދެ އަހަރުގެ މެދުކެނޑުމަކަށްފަހު ޒާރާ އަލުން ނެށުމުގެ ދާއިރާއަށް ނުކުންނައިރު، މިފަހަރުވެސް އޭނާ ފެނިގެންދާނީ އުފަން ރަށް ކަމަދޫއިންކަން ބެލެވެ އެވެ.. ކުރިއަށް އޮތް އީދު ޝޯތަކަށް ޒާރާ އާއި އޭނާގެ ޓީމުން ވަރަށް ފޯރިއާއެކު ތައްޔާރުވަމުންދާއިރު، އޭނާ ޕާފޯމްކުރާ ލަވައެއްގެ ކުރު ވީޑިއޯކޮޅެއް މިހާރު ވަނީ ސޯޝަލް މީޑިއާގައި ދައުރުވާން ފަށާފަ އެވެ. ޒާރާ ވަނީ އޭނާ ޕާފޯމްކުރާ ލަވައެއްގެ ތަންކޮޅެއް އޭނާގެ އަމިއްލަ އިންސްޓަގްރާމް ސްޓޯރީއަށް ރީޕޯސްޓު ކޮށްފަ އެވެ.

މި ފަހުގެ ތާރީހެއްގައި އީދު ޝޯތަކަކުން އެންމެ ބޮޑު މަގުބޫލުކަމެއް ހޯދި ފަންނާނަކީ ޒާރާ ކަމަށްވާއިރު، އޭނާގެ މި އެނބުރި އައުމަށް ރާއްޖޭގެ ގިނަ ބަޔަކު އިންތިޒާރު ކުރާނެކަން ކަށަވަރެވެ.