ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމަށް ސަރުކާރުން ނިންމަވާފައިވާ ނިންމެވުމަށް، މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ތާއީދުކޮށްފިއެވެ.
އެމްޑީއޭއިން ނެރުނު ބަޔާނުގައި ބުނީ، ރާއްޖޭގެ މިހާރުގެ އިގްތިސާދީ ހާލަތަށާއި ގައުމުގެ މަސްލަހަތަށް ބަލާއިރު، ދައުލަތަށާއި ރައްޔިތުންނަށް އެންމެ ފައިދާހުރި ގޮތަކީ ދެ އިންތިހާބު އެއްކޮށްލުން ކަމަށެވެ.
އަދި އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާ ދިމާކޮށް، މިކަމާ ގުޅޭގޮތުން ރައްޔިތުންގެ ހިޔާލު ހޯދުމަށް ނަގާ ފެންނަ ނުފެންނަ ވޯޓުގައި އެ ޕާޓީން ފުރިހަމައަށް ތާއީދުކުރާނެ ކަމަށްވެސް ބަޔާނުގައިވެއެވެ.
އެ ޕާޓީން ބުނި ގޮތުގައި، ޕާޓީގެ ރައީސް އަހްމަދު ސިޔާމް މުހައްމަދަކީ އަބަދުވެސް ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި އިގްތިސާދީ ގޮންޖެހުންތަކުން އަރައިގަތުމަށް ބޭނުންވާ ޒިންމާދާރު ސިޔާސަތުތަކަށް ވަކާލާތުކުރައްވާ ބޭފުޅެކެވެ.
އަދި މަޖިލިސް މެންބަރެއްގެ އިތުރުން ރާއްޖޭގެ ފުންނާބުއުސް ވިޔަފާރިވެރިއެއްގެ ހައިސިއްޔަތުން، ސިޔާމް އަބަދުވެސް އިސްކަންދެއްވަނީ ގައުމުގެ އިގްތިސާދީ ހަމަޖެހުމަށް ކަމަށް ފާހަގަކޮށްފައިވެއެވެ.
މައި ދެ އިންތިހާބު އެއް ތާރީހެއްގައި ބޭއްވުމަށް މަގުފަހިކުރުމަށްޓަކައި ގާނޫނުއަސާސީއަށް އިސްލާހު ގެނައުމަށް ސަރުކާރުގެ ފަރާތުން އިނގުރައިދޫ ދާއިރާގެ މެންބަރު އިބްރާހީމް ފަލާހު ހުށަހެޅުއްވި ބިލު މިދިޔަ މަހު މަޖިލީހުން ވަނީ ފާސްކޮށްފައެވެ.
ނަމަވެސް، ރައީސް ޑރ. މުޙައްމަދު މުޢިއްޒު މި އިސްލާހު ތަސްދީގުކުރައްވާނީ، އޭޕްރީލް 4 ގައި ބާއްވާ ރައްޔިތުންގެ ފެންނަ ނުފެންނަ ވޯޓަކުން އެކަމަށް ތާއީދު ލިބިއްޖެ ނަމައެވެ.
