ދިވެހިރާއްޖޭގެ ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން 2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރެއްވުމަށް، އެ ޕާޓީގެ ލީޑަރޝިޕާއި އާންމު މެންބަރުން ރަސްމީކޮށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހުން އެދިވަޑައިގެންފިއެވެ. ޕީއެންސީ އަކީ 80,000 އަށް ވުރެ ގިނަ މެންބަރުން ތިބި ރާއްޖޭގެ މެޖޯރިޓީ ރައްޔިތުން ތަމްސީލުކުރާ ސިޔާސީ ޕާޓީއެވެ.

2028 ގެ އިންތިހާބުގައި ވާދަކުރެއްވުމަށް އެދިވަޑައިގެންފައިވަނީ މިއަދު ބޭއްވި ޕީއެންސީގެ ދެވަނަ ކޮންގްރެސްގެ ރަސްމީ ބައްދަލުވުންތަކުގެ ތެރެއިންނެވެ.

ޕީއެންސީގެ ޗެއާޕާސަން ޢަބްދުއްރަޙީމް ޢަބްދުﷲ ރިޔާސަތު ބެލެހެއްޓެވި މަތީ މަޖިލީހުގެ މިއަދުގެ ޖަލްސާގައި މި ގަރާރު ހުށަހަޅުއްވައިދެއްވީ ޕާޓީގެ މެންބަރު ޢަބްދުﷲ އިބްރާހީމެވެ.

މި ބައްދަލުވުމުގައި ވާހަކަދައްކަވަމުން ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ދިވެހިރާއްޖެއަށް މިހާރު އަންނަމުންދާ ހެޔޮ ބަދަލުތަކާއި، އިގްތިސާދީ އަދި އިޖުތިމާއީ ތަރައްގީ ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި ރައީސް ޑރ. މުއިއްޒަށް ދެވަނަ ދައުރެއް ދިނުމަކީ ގައުމީ ހެވަށްޓަކައި ކޮންމެހެން ކުރަންޖެހިފައިވާ ކަމެއް ކަމަށެވެ. އަދި ރާއްޖޭގެ ސިޔާސީ ހަމަޖެހުން ގާއިމުކުރުމަށްޓަކައި އެއް ވެރިއަކަށް ދެ ދައުރު ލިބުމުގެ މުހިންމުކަން އޭނާ ފާހަގަކުރެއްވިއެވެ.

ޕީއެންސީގެ ކޮންގްރެސްގައި ބައިވެރިވި ވަޒީރުންނާއި މަޖިލިސް މެންބަރުން ވެސް ވަނީ ރައީސް ޑރ. މުއިއްޒުގެ ސިޔާސަތުތަކަށް ފުރިހަމައަށް ތާއީދުކުރައްވާކަން ހާމަކުރައްވާފައެވެ.