އެމްޑީޕީގެ ފަރާތުން 2028 ވަނަ އަހަރުގެ ރިޔާސީ އިންތިހާބަށް ނެރޭނެ ކެންޑިޑޭޓަކު ހޮވުމަށް ބާއްވާ ރިޔާސީ ޕްރައިމަރީގައި ވާދަކުރައްވާނެކަން އެ ޕާޓީގެ ރައީސް އަބްދުﷲ ޝާހިދު މިރޭ ރަސްމީކޮށް އިއުލާނު ކުރައްވައިފިއެވެ. މި އިއުލާނާ އެކު، އޭނާ ވަނީ ޕާޓީގެ ރައީސްކަމުގެ މަގާމުން އިސްތިއުފާ ދެއްވިކަންވެސް ހާމަކުރައްވާފައެވެ.
އައްޑޫ ސިޓީ ހިތަދޫގައި ހުންނަ އެމްޑީޕީގެ ހަރުގޭގައި މިރޭ ބޭއްވި ހާއްސަ ޖަލްސާއެއްގައި ވާހަކަ ދައްކަވަމުން ކުރީގެ ފޮރިން މިނިސްޓަރު އަދި އދ. ގެ އާންމު މަޖިލީހުގެ ރައީސްކަންވެސް ކުރެއްވި ޝާހިދު ވިދާޅުވީ، ޕްރައިމަރީގައި ވާދަކުރައްވަން ނިންމެވީ 2028 ވަނަ އަހަރުގެ ރިޔާސީ އިންތިހާބު އެމްޑީޕީއަށް ކާމިޔާބުކޮށްދީ، ރާއްޖޭގެ އިގުތިސާދީ އަދި އިޖުތިމާއީ ހާލަތު ރަނގަޅު ކުރުމަށްޓަކައި ކަމަށެވެ.
ޝާހިދު ވިދާޅުވި ގޮތުގައި މިހާރު ރާއްޖެ އޮތް ހާލަތުން އަރައިގަނެ، ރައްޔިތުން އެދޭ ބަދަލުތައް ގެނައުމުގެ ގާބިލުކަން އޮތީ ހަމައެކަނި އެމްޑީޕީގައެވެ. އަދި އޭނާއަކީ ޕާޓީގެ ހުރިހާ ފިކުރެއްގެ މެންބަރުން ގޮވައިގެން މަސައްކަތް ކުރެވޭނެ، ކަންކަން ހާސިލުކޮށްދެވޭނެ (ޑެލިވާ ކުރެވޭނެ) ބޭފުޅެއް ކަމަށްވެސް ވިދާޅުވިއެވެ. ޝާހިދު މިހެން ވިދާޅުވި ނަމަވެސް ރާއްޖެ އިގްތިސާދީ ބޮޑު އަނދަވަޅަކަށް ވައްޓާލި އެންމެ ބޮޑު ހިއްސާއެއް އަދާކުރާނެ އެއްބޭފުޅަކީ އޭނާއެވެ.
Advertisement
ޕާޓީގެ ރައީސްކަމުން އިސްތިއުފާ ދެއްވި ސަބަބާ ގުޅޭގޮތުން ޝާހިދު ވިދާޅުވީ، އެމްޑީޕީއަކީ ޑިމޮކްރަސީގެ ރީތި އުސޫލުތައް ދަމަހައްޓާ ޕާޓީއަކަށް ވާއިރު، ޕާޓީގެ އިސް މަގާމެއްގައި ހުރެ އެތެރޭގެ އިންތިހާބެއްގައި ވާދަކުރުމަކީ އިންސާފުވެރި ގޮތެއް ކަމަށް ގަބޫލުނުކުރައްވާތީ ކަމަށެވެ. މިއީ އިންތިހާބުގެ ހަމަހަމަކަން ގާއިމުކުރުމަށް އެޅުއްވި ފިޔަވަޅެއް ކަމަށް އޭނާ ފާހަގަކުރެއްވިއެވެ.
ސިޔާސީ ގޮތުން ދިގު ތާރީހެއް އޮތް ޝާހިދަކީ ކުރީގެ ރައީސް މައުމޫނު އަބްދުލްގައްޔޫމާއި ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައިވެސް ފޮރިން މިނިސްޓަރުކަން ކުރައްވާފައިވާ ބޭފުޅެކެވެ. މީގެ އިތުރުން ރައްޔިތުންގެ މަޖިލީހުގެ ރައީސްކަންވެސް އޭނާ ވަނީ ކުރައްވާފައެވެ. އަދި ޝާހިދު އެންމެ ބޮޑަށް މަޝްހޫރު ވެފައިވަނީ "ކާޕެޓު ވަގު" މި ނަމުންނެވެ. ސަބަބަކީ މިނިސްޓަރުގެ މަގާމުގައި ހުންނަވައި މޮރޮކޯގެ ސަރުކާރުން ދިވެހިރާއްޖެއަށް ހަދިޔާކުރެއްވި ކާޕެޓެއް އެމަނިކުފާނުގެ އަމިއްލަ ގެކޮޅަށް ގެންދެވުމުންނެވެ.
ޝާހިދު ޕްރައިމަރީއަށް ކުރިމަތިލައްވާނެކަން އިއުލާނު ކުރެއްވިއިރު، ކުރީގެ ރައީސް ސާލިހު އަދި ފައްޔާޒު އިސްމާއީލް ވެސް ވަނީ ވާދަކުރައްވާނެކަމަށް އިއުލާނުކުރައްވާފައެވެ. އަދި ކުރީގެ ނައިބު ރައީސް ފައިސަލް ނަސީމް ވެސް ވަނީ އެމްޑީޕީގެ ޕްރައިމަރީގައި ވާދަކުރައްވާނެ ކަމުގެ ޝައުގުވެރިކަން ފާޅުކުރައްވާ އެކަމަށް މަސައްކަތް ކުރައްވާ ކަމަށް ވިދާޅުވެފައެވެ.
ކުރީގެ ރައީސް ނަޝީދު ވަނީ އެމަނިކުފާނު، ފައްޔާޒު އިސްމާއީލަށް ތާއީދު ކުރައްވާނެކަމަށް އިއުލާނުކުރައްވާފައެވެ.
