ކުރިއަށް އޮތް އީދު ބަންދާއި ޗުއްޓީ ދުވަސްވަރާ ދިމާކޮށް، ރާއްޖޭގެ އެކި ހިސާބުތަކުގައި ބަލިތައް ފެތުރުން އިތުރުވަމުންދާތީ، އެކަމަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) އިން މިއަދު އިލްތިމާސްކޮށްފި އެވެ. އެޗް.ޕީ.އޭ އިން ނެރުނު ނޫސްބަޔާނެއްގައި ބުނެފައިވަނީ، މިދުވަސްވަރު ރާއްޖޭގެ އެކި ހިސާބުތަކުގައި އަރިދަފުސް ރޯގާއާއި އިންފްލުއެންޒާ އާންމުކޮށް ފެންނަ މިންވަރަށް ވުރެ އިތުރުވަމުންދާކަން އެ އެޖެންސީގެ ތަފާސްހިސާބުތަކުން ދައްކާ ކަމަށެވެ. އަދި މާލެ ސަރަހައްދުން ހިމަބިހީގެ ކޭސްތަކެއް ވެސް ރިޕޯޓްކޮށްފައިވާތީ، ބަލިތައް ފެތުރުން ކުޑަކުރުމަށް ރައްކާތެރިކަމުގެ ފިޔަވަޅުތައް އެޅުން މުހިންމު ކަމަށް އެ އެޖެންސީން ފާހަގަކުރެ އެވެ.
އީދު ބަންދާ ދިމާކޮށް ރާއްޖެއިން ބޭރަށާއި އަތޮޅުތަކަށް ދަތުރުފަތުރުކުރުން އިތުރުވެ، މީހުން އެއްވެ އުޅޭ ތަންތަނަށް ދިއުން ގިނަވާނެތީ، ބަލިތަކުން ރައްކާތެރިވުމަށް އަންނަނިވި ކަންކަމަށް ސަމާލުކަން ދިނުމަށް އެޗް.ޕީ.އޭ އިން ވަނީ އިލްތިމާސްކޮށްފަ އެވެ:
ބަލީގެ އަލާމާތްތައް ފެނުން: ހުން އައިސް ނުވަތަ ނޭވާލާ ނިޒާމުގެ ބަލީގެ އަލާމާތެއް ފެންނަނަމަ ގޭގައި މަޑުކުރުމާއި، އާންމު އެއްވުންތަކަށް ނުދިއުން. ހާލަތު ގޯސްވާނަމަ ލަސްނުކޮށް ސިއްހީ ފަރުވާ ހޯދުން.
މާސްކު އެޅުން: ސިއްހީ ފަރުވާ ހޯދަން ދާއިރު މާސްކު އެޅުމާއި، އެއާޕޯޓް ޓާމިނަލް، ފެރީ ލައުންޖް އަދި އާންމު ދަތުރުފަތުރުކުރާ އުޅަނދުފަހަރު ފަދަ ބަންދު ތަންތަނުގައި މާސްކު އެޅުން.
ސާފުތާހިރުކަން: ސައިބޯނި ލައިގެން އަތް ދޮވުން ނުވަތަ ސެނިޓައިޒާ ބޭނުންކުރުން.
ވެކްސިން ފުރިހަމަކުރުން: ވެކްސިނުން ރައްކާތެރިވެވޭ ބަލިތަކުން ސަލާމަތްވުމަށްޓަކައި ވެކްސިންގެ ޑޯޒްތައް ފުރިހަމަކުރުން.
މަދިރިން ރައްކާތެރިވުން: މަދިރި ހެފުމުން ރައްކާތެރިވުމަށް ލޯޝަނާއި ސްޕްރޭ ބޭނުންކުރުމާއި، ހަށިގަނޑު ނިވާވާ ފަދަ ހެދުން އެޅުން. އަދި ގޭތެރެއާއި ގޯތިތެރޭގައި މަދިރި އާލާވާ ތަންތަން ނައްތާލުން.
މީގެ އިތުރުން، ހިމަބިހި ފަދަ ބަލިތަކަށް ޝައްކު ކުރެވިގެން ޓެސްޓެއް ހަދައިފިނަމަ، ނަތީޖާ ލިބެންދެން އެކަހެރިވެގެން ހުރުމަށް ވެސް އެ އެޖެންސީން ވަނީ އަންގާފަ އެވެ. ސިއްހީ މައުލޫމާތު ހޯދުމުގައި ރަސްމީ ވަސީލަތްތަކުން ހިއްސާކުރާ މައުލޫމާތަށް ބަރޯސާވުމަށް ވެސް އާންމު ރައްޔިތުންނަށް ވަނީ އިލްތިމާސްކޮށްފަ އެވެ.
