ރައްޔިތުންގެ މަޖިލީހުގެ ދ. މީދޫ ދާއިރާގެ މެންބަރު އަހްމަދު ސިޔާމް މުހައްމަދުގެ ކުންފުނި "ސަން ސިޔާމް ގްރޫޕް" ގެ ފަރާތުން ދެ ލައްކަ ޑޮލަރު ލަންކާ އަށް ހަދިޔާކުރުމަށް ނިންމައިފި އެވެ.
ސަން ސިޔާމް ގްރޫޕުގެ ފަރާތުން ފައިސާގެ އެހީ ހަވާލުކޮށްދެެއްވާފައިވަނީ އެ ކުންފުނީގެ ވެރިޔާ ސަން ސިޔާމެވެ. އެހީގެ ރަމްޒީ ޗެކު އޭނާ ހަވާލުކޮށްފައިވަނީ ލަންކާގެ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުހައްމަދު ރިޒްވީ އަށެވެ.
ދެ ލައްކަ ޑޮލަރު ސަން ސިޔާމް ގުރޫޕުން ހަދިޔާކުރަން ހަމަޖެހިފައިވަނީ ބައިބަޔަށް ބަހާލައިގެންނެވެ. އެގޮތުން މިއަދު އެންމެ ފުރަތަމަ ހަވާލުކުރީ 75،000 ޑޮލަރެވެ.
ސަފީރު ރިޒްވީގެ ގެކޮޅުގައި ކުރިއަށް ގެންދިޔަ ބައްދަލުވުމުގައި ދެ ބޭފުޅުން ވެސް ވަނީ ދެ ގައުމުގެ ރައްޔިތުންގެ މެދުގައި އޮތް ގުޅުމާއި ހަރުދަނާ އެކުވެރިކަމުގެ މައްޗަށް އަލިއަޅުއްވާލައްވާފަ އެވެ. ކާރިސާގެ ވަގުތުތަކުގައި އެހީއަށް ބޭނުންވެފައިވާ ފަރާތްތަކަށް އެހީވުމަކީ ދީނީ ގޮތުންވެސް އެކަން އޮންނަ ގޮތް ކަމަށް ސިޔާމް ވަނީ ފާހަކުރައްވާފަ އެވެ.
ދިވެހީން ތިބީ ލަންކާއާ އެކުގައި ކަމަށް ފާހަގަކޮށް ސިޔާމް ވަނީ ލަންކާގެ ރައީސަށް ހިތްވަރުދެއްވާ ސިޓީއެއް ވެސް ފޮނުއްވާފަ އެވެ.
"ސިލޯނާއެކު ދިވެހީން" ނަމުގައި ދައުލަތުގެ މީޑިއާ އިން ވަނީ މިއަދު ޓެލެތޯނެއް ވެސް ބާއްވާފަ އެވެ. މި ޓެލެތޯނަށް ގިނަ ކުންފުނިތަކާއި އަމިއްލަ ފަރުދުން ދަނީ ފައިސާގެ އެހީ ފޯރުކޮށްދެއްވަމުންނެވެ.
ލަންކާ އަށް އެހީތެރިކަން ފޯރުކޮށްދިނުމުގެ ގޮތުން އެކި ގޮތްގޮތަށް ފައިސާ ހަދިޔާ ކުރެވޭނެ އެވެ. އެގޮތުން ޓްރާންސްފާ މެދުވެރިކޮށް، ކިއުއާރު ކޯޑު ސްކޭން މެދުވެރިކޮށް، ޗެކު އަދި ކޭޝް މެދުވެރިކޮށް ފައިސާ ދެއްކޭނެ އެވެ. ފަންޑު ފޮށިތައް ބެހެއްޓިފައި ހުންނާނީ މާލެ، ހުޅުމާލެ އަދި ވިލިމާލޭގަ އެވެ.
ޓްރާންސްފާ ކުރާނީ ބީއެމްއެލްގައި ހުޅުވާފައިވާ "Ceylon Aaeku Dhiveheen" މި އެކައުންޓަށެވެ.
ދިވެހި ރުފިޔާ އެކައުންޓް ނަންބަރު: :7730000796107
ޔޫއެސް ޑޮލަރު އެކައުންޓް ނަންބަރު: 7730000796106
ލަންކާ އަށް ދިމާވެފައިވާ ހާލަތުން އަރައިގަތުމަށް ދިވެހި ސަރުކާރުން އިއްޔެ ވަނީ އެ ގައުމަށް 50،000 ޔޫއެސް ޑޮލަރާއި 25،000 ކޭސް މަސްދަޅު ހަދިޔާކުރަން ނިންމާފަ އެވެ.
