ރާއްޖެއަށް އިންޑިއާ ކަނޑުގެ އެންމެ މޮޅު ސްޕާ މަންޒިލުގެ އެވޯޑް

10 ވަނަ ވޯލްޑް ސްޕާ އެވޯޑްސްގައި އިންޑިއާ ކަނޑުގެ އެންމެ މޮޅު ސްޕާ މަންޒިލު 2024ގެ ޝަރަފުވެރި އެވޯޑް ރާއްޖެއިން ކާމިޔާބުކޮށްފިއެވެ.

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން މި ޚަބަރު ހާމަކުރަމުން ބުނެފައިވަނީ، މިއީ ސްޕާ އަދި ވެލްނެސް ދާއިރާއިން ދުނިޔޭގައި ފާހަގަކޮށްލެވޭ ޤައުމުތަކުގެ މެދުގައި ދިވެހިރާއްޖެއަށް ލިބުނު އިތުރު ޝަރަފެއް ކަމަށެވެ. އަދި މިއީ ރާއްޖެއިން ފޯރުކޮށްދޭ ސްޕާ އަދި ވެލްނެސްގެ އާ އުފެއްދުންތަކާއި ތަޖުރިބާތަކަށާއި، ރާއްޖެއަށް ޒިޔާރަތްކުރާ ފަތުރުވެރިންނަށް ލިބޭ ހިތްހަމަޖެހުމާއި ރާއްޖެއިން ދޭ ޚިދުމަތްތެރި މަސައްކަތުގެ ނަތީޖާއެއް ކަމަށްވެސް އެމްއެމްޕީއާރުސީން ބުނެފައިވެއެވެ.

މި ޝަރަފުވެރި ކާމިޔާބީގެ އިތުރުން، ރާއްޖޭގެ ދެ ރިސޯޓަކަށްވެސް ވަނީ އެވޯޑުތައް ލިބިފައެވެ. އެގޮތުން، ޖޯލި ބީޗް އެންޑް ސްޕާ މޯލްޑިވްސް އަށް އިންޑިއާ ކަނޑުގެ އެންމެ މޮޅު ވެލްނެސް ރިޓްރީޓް 2024 އާއި ރާއްޖޭގެ އެންމެ މޮޅު ވެލްނެސް ރިޓްރީޓް 2024ގެ އެވޯޑު ލިބުނެވެ. އަދި ވޯލްޑޯފް އެސްޓޯރިއާ އިތާފުށި މޯލްޑިވްސް އަށް ރާއްޖޭގެ އެންމެ މޮޅު ރިސޯޓް ސްޕާ 2024ގެ އެވޯޑު ވަނީ ލިބިފައެވެ.

^{އިންޑިއާ ކަނޑުގެ އެންމެ މޮޅު ސްޕާ މަންޒިލުގެ އެވޯޑް / ފޮޓޯ: އެމްއެމްޕީއާރުސީ}

މިއަހަރަކީ ވޯލްޑް ސްޕާ އެވޯޑްސް ދޭތާ 10 ވަނަ އަހަރެވެ. މި އެވޯޑުތަކަކީ ދުނިޔޭގެ އެންމެ ތަފާތު އަދި ޚާއްޞަ މަންޒިލްތަކަށް ފަތުރުވެރިންގެ ވޯޓުން ލިބޭ އެވޯޑުތަކެކެވެ.

ވޯލްޑް ސްޕާ އެވޯޑްސްގެ މައިގަނޑު މަޤްޞަދަކީ ދުނިޔޭގެ ފެންވަރުގެ މިންގަނޑުތައް ގެންގުޅުމަށް ހިތްވަރު ދީ، ސްޕާ އަދި ވެލްނެސް ފަތުރުވެރިކަމުގެ އެންމެ މޮޅު ޚިދުމަތްތެރިންނާއި ސްޕާ ފަތުރުވެރިކަމަށް ލޯބިކުރާ ކަސްޓަމަރުން ގުޅުވާލުމެވެ.

އެމްއެމްޕީއާރުސީން ވަނީ ވޯލްޑް ސްޕާ އެވޯޑްސްގައި އެބޭފުޅުންގެ ތަޖުރިބާތައް ހިއްސާކޮށް، ދިވެހިރާއްޖެއަށް ވޯޓު ދިން ހުރިހާ ފަތުރުވެރިންނަށް ޝުކުރު އަދާކޮށްފައެވެ. އަދި މި އެވޯޑުތަކަކީ ރާއްޖެއަށް ދަތުރުކުރާ ފަތުރުވެރިންނަށް ހިތްހަމަޖެހުން ލިބިދޭ ޚާއްޞަ ސްޕާ އަދި ވެލްނެސް ތަޖުރިބާތައް ފޯރުކޮށްދިނުމަށް ކުރަމުންދާ މަސައްކަތްތަކަށް ލިބުނު އިތުރު ހިތްވަރެއްގެ ގޮތުގައި އެމްއެމްޕީއާރުސީން ދެކޭކަމަށް ބުނެފައިވެއެވެ.

މި އެވޯޑަކީ ރާއްޖޭގެ ފަތުރުވެރިކަމުގެ ދާއިރާއަށް ލިބުނު ވަރަށް މުހިންމު ކުރިއެރުމެކެވެ.