ރާއްޖޭގައި އިންޑިއާގެ ރުޕޭ ކާޑު ބޭނުންކުރެވޭ ގޮތަށް މިއަދު އިފްތިތާހުކޮށްފިއެވެ.

މި ކާޑު ތަޢާރަފްކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު އިންޑިއާއަށް ކުރައްވާ ރަސްމީ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާއެކު ބޭއްވެވި މަޝްވަރާ ބައްދަލުވުންތަކަށްފަހު ދެ ޤައުމުގެ ދެމެދު އެއްބަސްވުންތައް ބަދަލުކުރުމަށް ބޭއްވި ރަސްމިއްޔާތުގެ ތެރެއިންނެވެ.

މި ރަސްމިއްޔާތުގައި ވަރޗުއަލްކޮށް ކުރިއަށްގެންދިޔަ ހަރަކާތުގެ ތެރެއިން، ރާއްޖޭގައި ރުޕޭ ކާޑު ތަޢާރަފުކުރުމުގެ ގޮތުން ކަސްޓަމަރަކު ވަނީ އޮތެންޓިކް މޯލްޑިވްސްގެ ފިހާރައަކުން ރުޕޭ ކާޑު ބޭނުންކޮށްގެން ވިޔަފާރިކޮށްފައެވެ. މި ކާޑު ތަޢާރަފުކުރުމާއެކު ބީއެމްއެލްގެ އޭޓީއެމްތަކާއި ޕީއޯއެސް މެޝިން އަދި އެހެނިހެން ޑިޖިޓަލް ޗެނަލްތަކުގައިވެސް ރުޕޭ ކާޑު ބޭނުންކުރެވޭނެއެވެ.

ރާއްޖެއާއި އިންޑިއާއާ ދެމެދު ބޭއްވި މަޝްވަރާ ބައްދަލުވުމަށްފަހު ދެއްވި ސްޓޭޓްމަންޓްގައި އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެފައިވަނީ ކުރިއަށް އޮތް ތަނުގައި ރާއްޖޭގައި އިންޑިއާގެ އިންސްޓެންޓު ސިސްޓަމް، ޔުނިފައިޑް ޕޭމަންޓު އިންޓަފޭސް (ޔޫޕީއައި)ގެ ޚިދުމަތް ވެސް ފަށާނެ ކަމަށެވެ.

ރާއްޖޭގައި އިންޑިއާގެ ރުޕޭ ކާޑު ބޭނުންކުރެވޭ ގޮތް ހެދުމާ ގުޅޭގޮތުން ރައީސް މުޢިއްޒު ވިދާޅުވެފައިވަނީ މިކަމުގެ ސަބަބުން ދެ ޤައުމުގެ ރައްޔިތުންނަށްވެސް ފައިސާގެ މުޢާމަލާތް ކުރުމުގައި ފަސޭހަތަކެއް ލިބޭނެ ކަމަށެވެ.

ރުޕޭ ކާޑުގެ އިތުރުން ރާއްޖޭގައި ޔޫޕީއައިގެ ޚިދުމަތް ފެށުމަށް ނިންމާފައިވާއިރު މިދިޔަ އޯގަސްޓްމަހު ވަނީ މި ކަމުގެ އެއްބަސްވުމެއްގައި ސޮއިކުރައްވާފައެވެ. މި ކަމަކީ ދެ ޤައުމުގެ ދެމެދުގައި އިޤްތިޞާދީ ގުޅުން އިތުރަށް ބަދަހިކުރުމަށް އެޅޭ މުހިންމު ފިޔަވަޅެއް ކަމުގައި ފާހަގަކުރެވެއެވެ.