ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިން އިންޑިއާގެ ބޮޑުވަޒީރު ނަރެންދްރަ މޯދީ ދިވެހިރާއްޖެއަށް ވަޑައިގަތުމަށް މިއަދު ދައުވަތު ދެއްވައިފިއެވެ. 

އެމަނިކުފާނު އިންޑިއާގެ ބޮޑުވަޒީރު ރާއްޖެ ވަޑައިގަތުމަށް ދައުވަތު ދެއްވިއިރު މިއަދު ދެގައުމުގެ ދެމެދުގައި ވަނީ މުހިންމު އެއްބަސްވުންތަކެއް ބަދަލުކުރެވިފައެވެ.

ބަދަލުކުރެވުނު އެއްބަސްވުންތަކުގެ ތެރޭގައި، ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓާއި ރަޝްޓްރިޔާ ރަކްޝާ ޔުނިވަރސިޓީއާ ދެމެދު އެއްބާރުލުމުގެ އެއްބަސްވުމާއި، މޯލްޑިވްސް އެންޓި-ކޮރަޕްޝަން ކޮމިޝަނާއި އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަނާ ދެމެދު ކޮރަޕްޝަން ހުއްޓުވުމާ ގުޅޭ އެއްބަސްވުން ހިމެނެއެވެ.

މީގެ އިތުރުން، މޯލްޑިވްސްގެ ޖުޑީޝަލް ސަރވިސް ކޮމިޝަނާއި އިންޑިއާގެ ނޭޝަނަލް ޖުޑީޝަލް އެކަޑަމީއާ ދެމެދު 200 ދިވެހި ޝަރުޢީ އޮފިސަރުންނަށް ތަމްރީނު ދިނުމާ ގުޅޭ އެއްބަސްވުމާއި، ދިވެހި ސަރުކާރާއި އިންޑިއާ ޖުމްހޫރިއްޔާގެ މިނިސްޓްރީ އޮފް ޔޫތު އެފެއާޒް އެންޑް ސްޕޯޓްސްއާ ދެމެދު ކުޅިވަރާއި ޒުވާނުންގެ ކަންކަމުގައި އެއްބާރުލުން ދިނުމުގެ އެއްބަސްވުން އައުކުރުން ވެސް ހިމެނެއެވެ.

މި އެއްބަސްވުންތައް ބަދަލުކުރެވުނީ ދިވެހިރާއްޖޭގެ ހައި ކޮމިޝަނަރ އިބްރާހީމް ޝަހީބު މެދުވެރިކޮށެވެ.

މީގެ އިތުރުން، ދެ ޤައުމުގެ މެދުގައި ވާޗުއަލްކޮށް އިފްތިތާހުކުރެވުނު ކަންތައްތަކުގެ ތެރޭގައި، ވިޝަން ޑޮކިއުމަންޓް ނެރުމުގެ އިޢުލާނާއި، ހުރަވީ އުޅަނދު އިޢުލާންކުރުމާއި، ރޫޕޭ ކާޑު ތަޢާރަފުކުރުމާއި، ހަނިމާދޫ އިންޓަނޭޝަނަލް އެއަރޕޯޓުގެ އައު ރަންވޭ ހުޅުވުމާއި، އެގްޒިމް ބޭންކް އޮފް އިންޑިއާގެ ބައިޔަރސް ކްރެޑިޓް ފެސިލިޓީގެ ދަށުން އިމާރާތްކުރެވުނު 700 ސޯޝަލް ހައުސިންގ ޔުނިޓް ހަވާލުކުރުން ހިމެނެއެވެ.

މި އެއްބަސްވުންތަކާއި މަޝްރޫޢުތަކުގެ ސަބަބުން ދެ ޤައުމުގެ ގުޅުން އިތުރަށް ބަދަހިވެ، އެކި ދާއިރާތަކުން ކުރިއެރުން ލިބޭނެއެވެ.