ހދ. ނެކުރެންދޫގައި ފެނަކައިން އަޅަމުންދާ އާ އޮފީސް ޢިމާރާތުގެ މަސައްކަތުގެ %70 މަސައްކަތް ނިމިފައިވާ ކަމަށް އެ ކުންފުނިން ހާމަކޮށްފިއެވެ.

ފެނަކައިން ބުނީ މިހާތަނަށް ނުނިމި ހުރި ބައެއް މަސައްކަތްތަކަކީ ދޮރުތައް ހަރުކުރުމާއި، މުށި ޖެހުމާއި ކުލަ ލުން ފަދަ މަސައްކަތްތައް ކަމަށެވެ.

ޒާމާނީ ފެންވަރަށް ތަަރައްޤީ ކުރާ މި ޢިމާރާތް ޤާއިމްކުރަނީ، ޖާގަ ތަނަވަސް އޮފީސް ޖާގައިގެ އިތުރުން، ޕޭންޓްރީއަކާއި، އަންހެނުންނަށާއި ފިރިހެނުންނަށް ޚާއްސަކޮށްފައިވާ ވަކި ފާޚަނަތަކެއް ހިމެނޭ ގޮތަށް ކަމަށް ފެނަކައިން ބުންޏެވެ. އަދި އޮފީހަށް އެކަށީގެންވާ މީޓިންގ ރޫމެއްވެސް މި ޢިމާރާތުގައި ހިމެނޭކަމަށް ފެނަކައިން ބުންޏެވެ.

މީގެ އިތުރުން މި ޢިމާރާތުގައި ޒަމާނީ ވަޞީލަތްތަކާއެކު އޮފީސް ސަރަޙައްދުގެ އިތުރުން ކަސްޓަމަރ ސަރވިސް ކައުންޓަރަކާއި، ޖަނަރޭޓަރު ބެހެއްޓުމަށް ޚާއްސަ ކޮށްފައިވާ ސަރަޙައްދަކާއި މުވައްޒަފުންގެ އިސްތިރާހަތުގެ ވަގުތު ހޭދަކުރުމަށް ޚާއްސަކޮށްފައިވާ ސަރަޙައްދެއް ހިމެނޭ ކަމަށް ފެނަކައިން ބުންޏެވެ.

ފެނަކައިން ބުނީ ޓެކްނިކަލް މުވައްޒަފުންނަށާއި އެޑްމިނިސްޓްރޭޓިވް މުވައްޒަފުންނަށް އެކޮމޮޑޭޓް ކުރެވޭނެ ޖާގަ މި އޮފީހުގައި ހިމެނޭނެ ކަމަށާއި މި އޮފީސް ޢިމާރާތާއެކު ޚިދުމަތް ހޯދާ ކަސްޓަމަރުންނަށް ޚިދުމަތް ހޯދުމުގައި މިހާރަށްވުރެ ލުއިފަަސޭހަ ވެގެންދާނެ ކަމަށެވެ.

ފެނަކައިން ބުނީ އަމާޒަކީ މި އަހަރުގެ ނޮވެމްބަރު މަހުގެ ނިޔަލަށް މި މަސައްކަތް އެއްކޮށް ނިންމާލުން ކަމަށެވެ.