ރައީސް ޑރ. މުޙައްމަދު މުޢިއްޒު އިންޑިޔާގެ ރަސްމީ ދަތުރުފުޅެއްގައި އެ ޤައުމަށް ވަޑައިގެން، އިންޑިޔާގެ ސަލާމަތާއި ރައްކާތެރިކަމަށް ނުރައްކާވާފަދަ އެއްވެސް ކަމެއް ދިވެހި ސަރުކާރުން ނުކުރާނެކަމުގެ ޔަޤީންކަން ދެއްވައިފިއެވެ.

އިންޑިޔާގެ ރައީސް ދްރައުޕަދީ މުރުމޫގެ ދަޢުވަތަކަށް ރައީސް މުޢިއްޒު އަދި އަނބިކަނބަލުން މިއަދު ފެއްޓެވި ދަތުރުފުޅުގެ ތެރެއިން "ޓައިމްސް އޮފް އިންޑިޔާ" ނޫހަށް ދެއްވި އިންޓަވިއުއެއްގައި ރައީސް ވިދާޅުވީ، އިންޑިޔާ އާއި ރާއްޖެއާ ދެމެދު އޮތް ގުޅުމަކީ ޒަމާނުއްސުރެ ޤާއިމުވެފައިވާ ރަޙްމަތްތެރިކަމާއި އިޙްތިރާމުގެ މައްޗަށް ބިނާވެފައިވާ ޤާތް ގުޅުމެއް ކަމަށެވެ.

"އެކި ދާއިރާތަކުން އެހެން ޤައުމުތަކާއެކު އަޅުގަނޑުމެންގެ ގުޅިގެން މަސައްކަތްކުރުން އިތުރުކުރަމުންދާއިރު، ރާއްޖެއިން ކުރާ ކަމެއްގެ ސަބަބުން މި ސަރަޙައްދުގެ ސަލާމަތާއި ހަމަޖެހުމަށް ގެއްލުމެއް ނުލިބޭނެކަން ރާއްޖެއިން ޔަޤީންކުރާނެ،" ރައީސް ވިދާޅުވިއެވެ.

އިންޑިޔާ ކަނޑުގެ ވާދަވެރިކަމުގެ ތެރެއިން އެ މަނިކުފާނުގެ ވެރިކަމުގައި، ޗައިނާއަށް ރާއްޖެ ލެނބިފައިވާ ކަމުގެ ތުހުމަތު ކުރެވުނު ނަމަވެސް، މި ސަރުކާރުގެ އެންމެ އިސްކަމެއް ދެނީ މި ސަރަޙައްދުގެ ސަލާމަތާއި ހަމަޖެހުން ޤާއިމުވެފައި އޮތުމުގެ މައްޗަށް ކަމަށް ރައީސް ފާހަގަކުރެއްވިއެވެ.

ރައީސް މުޢިއްޒުގެ މި ދަތުރުފުޅަކީ އެ މަނިކުފާނު މަޤާމާ ޙަވާލުވެވަޑައިގަތް ފަހުން އިންޑިޔާއަށް ކުރައްވާ ފުރަތަމަ ރަސްމީ ދަތުރުފުޅެވެ. މި ދަތުރުފުޅުގައި މިއަދު އެންމެ ފުރަތަމަ ބައްދަލުކުރެއްވީ އިންޑިޔާގެ އެކްސްޓަރނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރާއެވެ. އަދި މާދަމާ ރައީސް އާއި ބޮޑުވަޒީރު ނަރެންދްރަ މޯދީއާ އެކު ރަސްމީ މަޝްވަރާތަކާއި އެއްބަސްވުންތަކުގައި ސޮއިކުރުން އޮތް ކަމަށް ވެއެވެ.

ރައީސް މުޢިއްޒުގެ މި ދަތުރުފުޅަށް ރާއްޖެ އާއި އިންޑިޔާގެ ސަމާލުކަން އެންމެ ބޮޑަށް ހުއްޓިފައިވަނީ މި ވެރިކަމުގެ ކުރީކޮޅު ދެ ޤައުމުގެ ގުޅުން ވަރަށް ބޮޑަށް ގޯސްވެފައިވާތީއެވެ. ނަމަވެސް، މިހާރު އިންޑިޔާ އާއި ރާއްޖެއިން ވެސް އެއް ޤައުމުން އަނެއް ޤައުމުން ހިއްސާކުރާ ކަންބޮޑުވުންތަކާއި އިސްކަންދޭ ކަންކަން ވަނީ ރަނގަޅަށް އެނގި ދަސްވެފައި ކަމަށް ރައީސް ވިދާޅުވިއެވެ.

މި ދަތުރުފުޅުގެ ތެރެއިން ދެ ޤައުމުގެ ގުޅުން އާ ހަރުފަތަކަށް ގެންދެވޭނެކަމުގެ ޔަޤީންކަން އެބަ އޮތް ކަމަށް ރައީސް މުޢިއްޒު ވިދާޅުވިއެވެ.

ރާއްޖޭގައި ތިބި އިންޑިޔާގެ ސިފައިން ފޮނުވާލުމަކީ ރައީސް މުޢިއްޒުގެ ރިޔާސީ ވަޢުދެއް ކަމަށް ވާއިރު، އެ ކަމަށް ޢަމަލުކުރަން ނިންމުމަކީ ވެސް ގުޅުމަށް އަސަރުކުރި ކަމެއް ކަމަށް ބެލެވެއެވެ. އެކަމާ ގުޅުވައި އަމާޒުވި ސުވާލަށް ޖަވާބު ދެއްވަމުން ރައީސް ވިދާޅުވި ގޮތުގައި، އެ މަނިކުފާނުގެ ސަރުކާރުން ދަމަހައްޓާނީ "މޯލްޑިވްސް ފަސްޓް ޕޮލިސީ" އެކެވެ.

"އިންޑިޔާއާއެކު އޮތް ޒަމާންވީ އަދި ވަރުގަދަ ގުޅުމަށް އިސްކަންދެމުން ގެންދާނަން. އެހެން ޤައުމުތަކާ އެކު އަޅުގަނޑުމެން ދަމަހައްޓާ ގުޅުންތަކުން، އިންޑިޔާގެ ސަލާމަތީ މަޞްލަޙަތަށް ބުރޫނާރާނެ ކަމުގެ ޔަޤީންކަން އަޅުގަނޑުމެންނަށް އެބައޮތް،" ރައީސް ވިދާޅުވިއެވެ.

އެކަން ޙާޞިލުކުރުމަށްޓަކައި ކުރަންޖެހޭ ކަންކަން، ދުނިޔޭގެ އެންމެ ބޮޑު ޑިމޮކްރަސީގެ ޙައިޘިއްޔަތުން އިންޑިޔާއަށް ވަރަށް ރަނގަޅަށް ފަހުމްވާނެ ކަން ރައީސް ފާހަގަކުރެއްވިއެވެ.

ރައީސް މުޢިއްޒުގެ ދަތުރުފުޅާ ގުޅޭ މުހިންމު ނުކުތާތައް ފާހަގަކޮށް، ދެ ޤައުމުގެ ގުޅުމުގެ މުހިންމުކަމާއި، ސަރަޙައްދީ ސަލާމަތާއި ރައްކާތެރިކަމަށް ދިވެހިރާއްޖެއިން ދޭ އަހައްމިއްޔަތު ހާމަކޮށްދީފައިވެއެވެ. އަދި ރާއްޖޭގެ ޚާރިޖީ ސިޔާސަތުގެ މައިގަނޑު އަސާސްތައް ވެސް ސާފުކޮށް ބަޔާންކޮށްދީފައިވެއެވެ.

މިއީ ރައީސް މުއިއްޒު މިދިޔަ ނޮވެމްބަރު މަހުގެ 17 ގައި މަގާމާ ހަވާލުވެވަޑައިގެންނެވި ފަހުން އެ ގައުމަށް ކުރައްވާ ފުރަތަމަ ފުރަމާނަ ދަތުރުފުޅެވެ. އެކަމަކު، ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް މަގާމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް މިދިޔަ ޖޫން މަހު ވެސް ރައީސް މުއިއްޒު އިންޑިއާ އަށް ވަޑައިގަތެވެ.

މި ދަތުރުފުޅުގައި ދެ ގައުމުގެ މެދުގައި އިތުރު އެއްބަސްވުންތަކެއްގައި ސޮއިކުރެވި، ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށް އުއްމީދު ކުރެވެއެވެ. ރައީސް މުއިއްޒުގެ މި ދަތުރުފުޅަކީ ދެ ގައުމުގެ ގުޅުން އައު މަރުހަލާއަކަށް ގެންދިއުމަށް މަގުފަހިކޮށްދޭނެ ދަތުރުފުޅެއް ކަމަށް ސިޔާސީ މާހިރުން ދެކެއެވެ.