ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރު ފެށުން އަންނަ ހަފްތާއަށް ފަސްކޮށްފައިވާ ކަމަށް ރައްޔިތުންގެ މަޖިލީހުގެ އިދާރާއިން މިއަދު ހާމަކޮށްފިއެވެ. މި ނިންމުން ނިންމާފައިވަނީ މަޖިލީހުގެ ޖަލްސާތައް ބްރޯޑްކާސްޓް ކުރުމަށް ދިމާވެފައިވާ ދަތިތަކާ ގުޅިގެންނެވެ.

މަޖިލީހުގެ ރައީސް އަބްދުއްރަޙީމް އަބްދުﷲ މެންބަރުންނަށް ފޮނުއްވި މެސެޖެއްގައި ވިދާޅުވެފައިވަނީ، މަޖިލީހުގެ ޖަލްސާތައް ބްރޯޑްކާސްޓް ކުރުމަށް އައު ވީޑިއޯ ރޫމެއް ޤާއިމްކުރުމުގެ މަސައްކަތް ކުރަމުންދާ ކަމަށެވެ. މި މަސައްކަތް ނިމެންދެން ޖަލްސާތައް ބްރޯޑްކާސްޓް ކުރުމަށް ދަތިތަކެއް ހުރުމުން، މި ދައުރުގެ ޖަލްސާތައް ފެށުން އަންނަ ހަފްތާގެ ހޯމަ ދުވަހަށް ފަސްކޮށްފައިވާ ކަމަށް ވިދާޅުވިއެވެ.

މި މައުލޫމާތު ޕީއެސްއެމް ނިއުސްއަށް ރައްޔިތުންގެ މަޖިލީހުގެ އިދާރާއިން ވަނީ ކަށަވަރުކޮށްދީފައެވެ. ކުރިން ތާވަލުކޮށްފައި އޮތް ގޮތުން މި ދައުރުގެ ޖަލްސާތައް ފެށުމަށް ހަމަޖެހިފައި އޮތީ މި މަހުގެ 7 ގައެވެ.

ރައްޔިތުންގެ މަޖިލީހުގެ މިދިޔަ ދައުރުގެ މަސައްކަތްތައް ނިންމާ މެންބަރުން ޗުއްޓީއަށް ވަޑައިގެންނެވީ މިދިޔަ އޮގަސްޓް މަހުގެ 22 ވަނަ ދުވަހުއެވެ. މަޖިލީހުގެ އާންމު އިދާރާއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މިދިޔަ ދައުރުގައި 11 ބިލެއްގެ މަސައްކަތް ވަނީ ނިންމާފައެވެ.

މަޖިލީހުގެ މި އަހަރުގެ ފަހު ދައުރު ފެށުން ފަސްކުރުމާ ގުޅިގެން، އާ ވީޑިއޯ ރޫމުގެ މަސައްކަތް އަވަހަށް ނިންމައި، ޖަލްސާތައް ބްރޯޑްކާސްޓް ކުރުމުގެ އިންތިޒާމުތައް ހަމަޖެއްސުމަށް މަސައްކަތް ކުރަމުންދާ ކަމަށް މަޖިލީހުގެ އިދާރާއިން ބުނެފައިވެއެވެ.