އިސްރާއީލުން އީރާނަށް ހަމަލާ ދިނުމާއި ބެހޭގޮތުން މަޝްވަރާ ކުރަމުންދާ ދަނޑިވަޅުގައި، ތެޔޮވަޅުތަކަށް ހަމަލާއެއް ދީފާނެތީ ދުނިޔޭގައި ތެލުގެ އަގު އުފުލިއްޖެއެވެ. 

ބުރާސްފަތި ދުވަހު ވައިޓް ހައުސްގައި ރިޕޯޓަރަކު އީރާނުގެ ތެޔޮ ފެސިލިޓީތަކަށް ހަމަލާ ދިނުމަށް ތާއީދު ކުރައްވާތޯ ސުވާލު ކުރުމުން ރައީސް ބައިޑަން ވިދާޅުވީ އެކަމާ ބެހޭ ގޮތުން މަޝްވަރާ ކުރަމުންދާ ކަމަށެވެ. ނަމަވެސް ބައިޑަންގެ ވިސްނުން ހުރީ ތެޔޮ ވަޅުތަކަށް ހަމަލާ ނުދިނުމަށެވެ. ބައިޑަން ވިދާޅުވީ އޭނާ މިއަދު އިސްރާއީލުގެ މަގާމުގައި ހުރިނަމަ ތެޔޮ ފެސިލިޓީތަކަށް ހަމަލާ ނުދޭނެ ކަމަށެވެ.

އެމެރިކާގެ ރައީސްގެ މިހެން ވިދާޅުވުމުން ދުނިޔޭގެ ބާޒާރުގައި ތެލުގެ އަގު ވަނީ ފަސް ޕަސެންޓް މައްޗަށް ގޮސްފަ އެވެ.

މެދުއިރުމަތީގެ ފިތުނަތައް އިތުރުވަމުންދާތީ ވިޔަފާރިވެރިން ކަންބޮޑުވަނީ ތެލުގެ ސަޕްލައިއަށް ހުރަސްއެޅިދާނެތީ އެވެ. 

އެމެރިކާގެ ރިޔާސީ އިންތިހާބު ނޮވެމްބަރު މަހުގެ ފަސް ވަނަ ދުވަހު ބާއްވަން އުޅޭ ދަނޑިވަޅެއްގައި ތެލުގެ އަގު ބޮޑުވުމަކީ ޑިމޮކްރެޓިކް ޕާޓީގެ ކެންޑިޑޭޓް ކަމަލާ ހެރިސްއަށް ގެއްލުން ވާނެ ކަމެކެވެ.

ޖޯ ބައިޑަން އިތުރަށް ވިދާޅުވީ އިސްރާއީލުން އަވަސް ފިޔަވަޅެއް އަޅާނެ ކަމަށް އުންމީދު ނުކުރާ ކަމަށާއި މީގެ ކުރިން އިސްރާއީލުގެ ބޮޑުވަޒީރު ނަތަންޔާހޫ ވަނީ ޣައްޒާ އާއި ލުބުނާނުގައި ހިނގަމުންދާ ކަންތަކަށް ވެސް އެމެރިކާއިން އެދުނު ގޮތާއި ހިލާފަށް ކަންތައް ކޮށްފައިކަން ބައިޑަން ފާހަގަ ކުރިއެވެ. ބައިޑަން އެ އިޝާރާތްކުރި ކަންތަކަކީ ފަލަސްތީނުގައި އާންމުންނަށް ހަމަލާ ނުދިނުމަށާއި އަދި ލުބުނާނަށް ނޭރުމެވެ.

މީގެ ކުރިން ބުދަ ދުވަހު ރައީސް ބައިޑަން ވަނީ އީރާނުގެ ނިއުކްލިއާ ފެސިލިޓީތަކަށް އިސްރާއީލުން ހަމަލާ ދިނުމަށް ތާއީދު ނުކުރާނެ ކަމަށް ސާފުކޮށް ވިދާޅުވެފައި ނަމަވެސް އީރާނުގެ ހަމަލާއަކަށް ރައްދުދީ އިސްރާއީލުން ދިފާއު ކުރުމުގެ ހައްގާއި ބައެއް ފިޔަވަޅުތައް އެޅުމަށް ތާއީދު ކުރައްވާ ކަމަށް ވިދާޅުވެފައެވެ.

ރައީސް ބައިޑަން އާއި ކެނެޑާ، ފްރާންސް، ޖަރުމަން، އިޓަލީ، ޖަޕާން އަދި އިނގިރޭސިވިލާތުގެ ހަތް ގައުމު ހިމެނޭ ޖީ7 ގްރޫޕްގެ ލީޑަރުން ވެސް ވަނީ އީރާނަށް އާ ދަތިކުރުމުގެ ފިޔަވަޅުތަކެއް އެޅުމާ ގުޅޭ ގޮތުން ފޯނު ކޯލެއްގައި މަޝްވަރާކޮށްފަ އެވެ.