މެންޗެސްޓަރ ޔުނައިޓެޑުގެ ކެޕްޓަން ޕޯޓޯގެ ނެހޫއެން ޕެރޭޒް އަށް ފައުލް ކުރަނީ: މި ފައުލްގެ ސަބަބުން އޭނާ އަށް ދެވަނަ ރީނދޫ ކާޑު ދެއްކި
ރޭ ކުޅުނު ޔޫރޮޕާ ލީގުގައި މެންޗެސްޓާ ޔުނައިޓެޑާއި ޕޯޓޯއާ ދެކޮޅަށް ކުޅުނު މެޗުން 3-3 އިން އެއްވަރުވެ ޔުނައިޓެޑަށް މޮޅު ނުވެވޭ މެޗުތަކުގެ އަދަދު ޖެހިޖެހިގެން އިތުރުވާން ފަށައިފިއެވެ. މާކަސް ރެޝްފޯޑް އާއި ރަސްމަސް ހޮޖްލަންޑްގެ ގޯލުތަކުން މެޗުގެ ކުރީކޮޅު ޔުނައިޓެޑުން 2-0 އިން ލީޑު ނެގިޔަސް، ޕޯޓޯއިން ކުޅުން ރަނގަޅުކުރިއެވެ. ރަޝްފަޑް 7ވަނަ މިނެޓުގައި ގޯލު ޖެހިއިރު ހޮޖްލަންޑު ގޯލު ޖެހީ 20ވަނަ މިނެޓުގައެވެ. ނަމަވެސް، ޕޯޓޯއިން ޕެޕޭ 27ވަނަ މިނެޓުގައި ޖެހި ގޯލާއި ސާމޫގެ ޖާދުލުން ޖެހި ދެ ގޯލަށްފަހު ޔުނައިޓެޑް ހާސްކަމުގެ ތެރެއަށް ވެއްޓުނެވެ. ޕޯޓޯއިން 3 ގޯލު ވެސް ޖެހީ ފަހަތުން އަރައި ކަމަށްވާއިރު، ޔުނައިޓެޑަށް އިތުރު ހާސްކަމެއް ލިބުނީ 81 ވަނަ މިނެޓްގައި ބްރޫނޯ ފެނާންޑޭސް އަށް ދެވަނަ ރީނދޫ ކާޑާއެކު ރަތެއް ދެއްކުމުންނެވެ.
ނަމަވެސް، އަނިޔާގެ ވަގުތުގައި ހެރީ މަގޫއާ ޔުނައިޓެޑަށް ޕޮއިންޓެއް ހޯދައިދިނެވެ.
ޔުނައިޓެޑަށް ރޭ ވެސް މޮޅު ނުވެވުނުއިރު، އެންމެ ފަހުން ކުޅުނު ހަތަރު މެޗުން ޔުނައިޓެޑަށް މޮޅެއް ނުލިބެއެވެ.
ޕްރިމިއާ ލީގުގައި ޓޮޓެންހަމް އަތުން 3-0 އިން ބަލިވި މެޗުގައި ވެސް ބްރޫނޯ ފެނާންޑޭޒް އަށް ރަތް ކާޑު ދެއްކިއެވެ. ރޭގެ ރަތްކާޑަކީ ޖެހިޖެހިގެން ކުޅުނު ދެވަނަ މެޗުން ދެއްކި ދެވަނަ ރަތްކާޑެވެ. ނަމަވެސް ފަހުން، ފީފާއިން ވަނީ ޓޮޓެންހަމް މެޗުގެ ކާޑު ބާތިލް ކޮށްފައެވެ.
ޓްވެންޓޭއާ ދެކޮޅަށް 1-1 އިން އެއްވަރުވެ، ޓޮޓެންހަމް އަތުން 3-0 އިން ބަލިވެ، ކްރިސްޓަލް ޕެލަސް އަތުން 2-1 އިން ބަލިވެފައިވާއިރު، މެނޭޖަރު އެރިކް ޓެން ހެގް ބުނީ ޕޯޓޯއާ ދެކޮޅަށް ކުޅުނު މެޗުގައި ޓީމުން ރަނގަޅު ކުޅުމެއް ދެއްކި ނަމަވެސް މެދުތެރެއިން ކޮންޓްރޯލް ގެއްލިފައިވާ ކަމަށެވެ. އޭނާ ގަބޫލުކުރާ ގޮތުގައި ފަހުވަގުތު ނަތީޖާ ހަމަހަމަ ކުރުމަކީ ރަނގަޅު ނިޝާނެކެވެ.
