ކޮލިޓީގެ މައްސަލަތަކެއް ފާހަގަވި އިންޑިއާގެ ބޭސްތައް ރާއްޖެ އެތެރެ ވެފައިނުވާކަން ޔަގީންކުރެވިފައިވާކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ހާމަކޮށްފިއެވެ.

އެމްއެފްޑީއޭއިން ބުނީ، އިންޑިއާގެ ކުންފުނިތަކުން އުފައްދާފައިވާ 48 ޕްރޮޑަކްޓަކުން ކޮލިޓީގެ ގިނަ މައްސަލަތަކެއް ފާހަގަވެފައިވާކަން އިންޑިއާގެ ބޭސް ރެގިއުލޭޓްކުރާ މައި އިދާރާއިން އެމްއެފްޑީއޭއަށް އަންގާފައިވާ ކަމަށެވެ. މިކަމާ ގުޅިގެން އެ ބޭސްތައް ރާއްޖެ އެތެރެކޮށް ވިއްކާތޯ ބެލުމަށް މާކެޓް އިވެލުއޭޝަނެއް ހަދާފައިވާކަމަށްވެސް އެމްއެފްޑީއޭއިން ހާމަކުރިއެވެ.

އެމްއެފްޑީއޭއިން ބުނީ، މައްސަލަ ޖެހިފައިވާ ބޭސްތަކުގެ ލިސްޓުގައި ހިމެނޭ އެއް ބޭހަކީ ރާއްޖެއަށް އެތެރެކުރުމުގެ ހުއްދަ އޮންނަ ބޭހެއް ނަމަވެސް، 2018 ވަނަ އަހަރުގެ ފަހުން އެ ބޭހުގެ އެއްވެސް ބެޗެއް ރާއްޖެ އެތެރެކޮށްފައި ނުވާ ކަމަށެވެ. އަދި މައްސަލަ ޖެހިފައިވާ ބޭހުގެ ލިސްޓުގައި ހިމެނޭ އެއްވެސް ބޭހެއް އެއްވެސް އުސޫލެއްގެ ދަށުން ރާއްޖެ އެތެރެކޮށްފައި ނުވާކަމަށްވެސް އެމްއެފްޑީއޭއިން ކަށަވަރުކޮށްދިނެވެ.

އިންޑިއާއަކީ ގިނަ އަދަދެއްގެ ދިވެހިން ބޭސްފަރުވާއަށް ދާ ޤައުމަކަށްވެފައި، ބައެއް ޙާލަތްތަކުގައި އަމިއްލަ ބޭނުމަށް އިންޑިއާއިން ބޭސް އެތެރެކުރާތީ، ބޭސް ގަތުމުގައި ސަމާލުވުމަށް އެމްއެފްޑީއޭއިން ވަނީ އާންމުންނަށް އިލްތިމާސްކޮށްފައެވެ.

މި މައްސަލަ ފާހަގަވުމާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން، ރާއްޖެއަށް ބޭސް އިމްޕޯޓުކުރާ ޕޯޓުތަކުގައި އިންސްޕެކްޝަން އިތުރަށް ވަރުގަދަކޮށް، މައްސަލަ ޖެހިފައިވާ އެއްވެސް ބޭހެއް އެތެރެ ވިޔަނުދިނުމަށް އަޅަންޖެހޭ ފިޔަވަޅުތައް އަޅާފައިވާކަމަށްވެސް އެމްއެފްޑީއޭއިން ބުންޏެވެ.