ރާއްޖޭގައި ބޮޑުވެފައިވާ ބިދޭސީންގެ މައްސަލަ ހައްލުކުރުމަށް ސަރުކާރުން ވަނީ ހަރުދަނާ ފިޔަވަޅުތަކެއް އަޅަން ފަށާފައެވެ. މިގޮތުން ކުރިއަށް އޮތް 3 އަހަރުގެ ތެރޭގައި މި މައްސަލަ ހައްލުކުރުމަކީ ސަރުކާރުގެ އަމާޒެއްކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވެއްޖެއެވެ.
ޝަމްޢާން މިހެން ވިދާޅުވީ ގަވާއިދާ ޚިލާފަށް އުޅޭ ބިދޭސީން ދެނެގަތުމަށް އިމިގްރޭޝަނުން ކުރިއަށްގެންދާ އިންސްޕެކްޝަން ހުޅުމާލޭގައި ފެށުމާއި ގުޅިގެން ޕީއެސްއެމް ނިއުސްއަށް ދެއްވި ޚާއްޞަ ބަސްދީގަތުމެއްގައެވެ. ޝަމްޢާން ވިދާޅުވީ ބިދޭސީންގެ މައްސަލަ ހައްލުކުރުމަށް ކުރިއަށް ގެންދެވޭ މަސައްކަތުން ވަރަށް ރަނގަޅު ނަތީޖާއެއް ފެންނަމުންދާ ކަމަށެވެ.
މާލޭގައި ކުރިއަށް ގެންދިޔަ އިންސްޕެކްޝަންތަކުން ގަވާއިދުގެ ތެރެއަށް ވަނުމަށް ނޯޓިސްދިން މީހުންގެ 95 ޕަސެންޓް މީހުން އިމިގްރޭޝަން އޮފީހަށް ހާޒިރުވެފައިވާކަން ޝަމްޢާން ފާހަގަކުރެއްވިއެވެ. އަދި އެ މީހުންގެ ތެރެއިން ލިޔެކިޔުންތައް ރަނގަޅުކުރުމާއި ވީސާ ރަނގަޅު ކުރުމަށް ބޭނުންވި މީހުންގެ ވީސާ ރަނގަޅުކޮށްދީފައިވާނެ ކަމަށް ވެސް ވިދާޅުވިއެވެ.
Advertisement
ޝަމްޢާން ވިދާޅުވީ މި ކުރެވޭ މަސައްކަތުން ބިދޭސީން ގެންގުޅޭ ފަރާތްތަކާއި އަދި ބިދޭސީ މަސައްކަތްތެރިން ވެސް ގަވާއިދުގެ ތެރެއަށް ވަނުމަށް މަސައްކަތް ކުރަމުންދާ މަންޒަރު ފެންނަމުންދާ ކަމަށެވެ. އަދި މާލެ ސަރަޙައްދުގައި ކުރިއަށް ގެންދެވޭ މަސައްކަތްތައް އަތޮޅުތެރެއަށް ފުޅާކުރުމުގެ މަސައްކަތް ކުރަމުންދާ ކަމަށް ވެސް ވިދާޅުވިއެވެ.
"އަޅުގަނޑުމެންގެ މުޅި ޓާގެޓަކީ މި 3 އަހަރު ތެރޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ އެއްކޮށް ހައްލުކުރުން. މިހާރު ކުރެވެމުން ދަނީ އެ މަސައްކަތް. އޭގެ ތެރޭގައި ބައެއް މީހުންނަށް ރެގިއުލަރައިޒް ވުމުގެ ފުރުސަތު ވަނީ ހުޅުވިފައި. އަދި ރިކޯޑްނެތް ފަރާތްތައް އަޅުގަނޑުމެންގެ ކުރަނގި އޮޕަރޭޝަންގެ ތެރެއިން އެމީހުން ރަޖިސްޓަރީ ވެވިގެން ދާނެ. އަދި އެންފޯސްކުރުމުގެ މަސައްކަތްވެސް މިހާރު ކުރިއަށް ދަނީ," ޝަމްޢާން ވިދާޅުވިއެވެ.
