ނ. ލަންދޫގައި އެމްއެންޑީއެފް ނޮދަން އޭރިއާ ކޮމާންޑާއި ނ. ލަންދޫ އަންހެނުން ތަރައްޤީއަށް މަސައްކަތްކުރާ ކޮމެޓީއާ ގުޅިގެން ހިންގި "މޫދުކަސްރަތުން އުފާވެރިކަން" ޕްރޮގްރާމުގައި އެންމެ ބޮޑަށް ބަރުދަން ލުއި ކުރި މީހުންނަށް އިއްޔެރޭ އެވޯޑު ދީފިއެވެ.

ސެޕްޓެންބަރު 3 އިން 25 އަށް ހިންގުނު މި ޕްރޮގްރާމުގައި ލަންދޫގެ 67 އަންހެނުން ބައިވެރިވެ، ޕްރޮގްރާމް ފުރިހަމަ ކުރިއެވެ. މި ޕްރޮގްރާމް ނިންމުމުގެ ގޮތުން އިއްޔެ ރޭ ނ. ލަންދޫ ސްކޫލުގައި ބޭއްވުނު ރަސްމިއްޔާތުގައި، އެންމެ ބޮޑަށް ބަރުދަން ލުއި ކުރި 3 މީހުންނަށް ސެޓިފިކެޓާއި އެވޯޑު ހަވާލުކޮށްދެއްވީ އެމްއެންޑީއެފް ނޮދަން އޭރިއާ ކޮމާންޑްގެ ޑެޕިއުޓީ ކޮމާންޑަރު، ލެފްޓިނެންޓް ކާނަލް އަޙްމަދު ބޫލާޤެވެ.

އެމްއެންޑީއެފުން ބުނި ގޮތުގައި މި ޕްރޮގްރާމަކީ ރައްޔިތުންގެ ދުޅަހެޔޮ ޞިއްޙަތާއި، ބާރުވެރިކުރުމާއި އިޖުތިމާޢީ ފޭރާން ވަރުގަދަކުރުމުގެ އިތުރުން އެކުވެރި މުޖުތަމަޢުއެއް ބިނާކުރުމުގެ މަޤްޞަދުގައި ހިންގުނު ޕްރޮގްރާމެކެވެ. މި ޕްރޮގްރާމުގައި ދުޅަހެޔޮ ޞިއްޙަތަކަށް ކަސްރަތުގެ މުހިންމުކަމާއި، ރަނގަޅު ކާނާ ކެއުމުގެ މުހިންމުކަމުގެ އިތުރުން އިޖުތިމާޢީ މުހިންމު ސިފަތަކާއި ބެހޭ މަޢުލޫމާތު ދެވުނެވެ.

ރަސްމިއްޔާތުގައި ޕްރޮގްރާމް ފުރިހަމަކުރި ހުރިހާ ބައިވެރިންނަށް ހަނދާނީ ލިޔުން ހަވާލުކުރިއެވެ. އަދި އެޓެންޑެންސް އެވޯޑާއި، ބެސްޓް މޯޓިވޭޓަރ އެވޯޑް ހާސިލުކުރި ބައިވެރިންނަށް ސެޓްފިކެޓާއި އެވޯޑް ހަވާލުކޮށްދެއްވީ ނ. ލަންދޫ އަންހެނުން ތަރައްޤީއަށް މަސައްކަތްކުރާ ކޮމެޓީގެ ރަޢީސާ، ހައްވާ ސުޖާޖާއެވެ.

މި ޕްރޮގްރާމަކީ ލަންދޫ ރައްޔިތުންގެ ޞިއްޙަތާއި ދުޅަހެޔޮކަން އިތުރުކުރުމަށް ސިފައިންނާއި ރަށު ފެންވަރުގެ މުއައްސަސާތައް ގުޅިގެން ހިންގި ކާމިޔާބު މަސައްކަތެއްގެ ގޮތުގައި ފާހަގަކުރެވެއެވެ.