ފަތުރުވެރިކަމުގެ ދާއިރާއަށް ނިކުންނަން ބޭނުންވާ ޒުވާނުންނަށް ކުޑަ އިންޓްރެސްޓު ރޭޓެއްގައި ލޯނުތައް ލިބޭނެ އިންތިޒާމުތައް ހަމަޖެއްސުމަށް މަސައްކަތްކުރައްވަމުން ގެންދަވާކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.
ވަޒީރު މިހެން ވިދާޅުވީ، އިއްޔެ ފުވައްމުލައް ސިޓީގެ ފަތުރުވެރިކަމަށް 10 އަހަރު ފުރުން ފާހަގަކުރުމަށްޓަކައި ބޭއްވި ރަސްމިއްޔާތު ޝަރަފްވެރިކޮށްދެއްވާ ވާހަކަދައްކަވަމުންނެވެ.
ފުވައްމުލައް ސިޓީ ކައުންސިލުން އިންތިޒާމުކޮށްގެން ބޭއްވި މި ޙަފްލާގައި ވާހަކަދައްކަވަމުން ފައިޞަލް ވިދާޅުވީ ފަތުރުވެރިކަމުގެ ދާއިރާގައި ކުރިއަށްދާން ޝައުގުވެރިކަން ހުރި ޒުވާނުންނަށް ކުރިމަތިވާ އެންމެ ބޮޑު ހުރަހަކީ މާލީ ގޮތުން ކުރިމަތިވާ ހުރަސްތައް ކަމަށެވެ. އެގޮތުން ލޯނުތަކުގެ ބޮޑު އިންޓްރެސްޓު ރޭޓުތައް ކުޑަކުރުމަށް ރާއްޖޭގެ ބޭންކުތަކާއި އެކު މަސައްކަތްކުރަމުންދާކަމަށް ފައިޞަލް ވިދާޅުވިއެވެ.
Advertisement
"ބީއެމްއެލްއާއި އެކު އަދި އެމްއައިބީއާއި އެކު މިދަނީ މަސައްކަތް ކުރެވެމުން، އަދި ވޯލްޑް ބޭންކުގެ އައިއެފްސީއާއެކުވެސް އެކަމާއި މަޝްވަރާކޮށްފައިވާއިރު، ޓޫރިޒަމް ޑިވެލޮޕްމަންޓުގެ ފަންޑެއް ލޯ އިންޓަރެސްޓު ރޭޓެއްގައި ހޯދާ، އަންނަ އަހަރުގެ ފުރަތަމަ ކުއާޓަރު ނޫނީ ދެވަނަ ކުއާޓަރުގެތެރޭގައި ކުރެވިގެންދާނެ ކަމަށް އުއްމީދުކުރެވޭ." ފައިޞަލް ވިދާޅުވިއެވެ.
މީގެއިތުރުން ފައިޞަލް ވިދާޅުވީ ލޯކަލް ޓޫރިޒަމް ކުރިއެރުވުމަށް ޚާއްސަ އިސްކަމެއް ދެއްވާ ކަމަށެވެ. އެގޮތުން އެދާއިރާ ކުރިއެރުވުމަށް ފަތުރުވެރިކަމާބެހޭ ވުޒާރާގައި ޚާއްސަ ޑިޕާޓްމަންޓެއް ޤާއިމްކުރުމަށް ނިންމާފައިވާކަމަށް ފައިޞަލް ވިދާޅުވިއެވެ.
ފައިޞަލް އިތުރަށް ވިދާޅުވީ ރާއްޖޭގެ ޑައިވްކުރުމާއި ގުޅޭ ޤަވާޢިދަކީ 1991ވަނަ އަހަރު ހެދިފައިވާ ޤަވާޢިދެއް ކަމަށާއި، މިޒަމާނާގުޅޭ އަދި ރައްކާތެރިކަމުގައިވެސް ބަލަންޖެހޭ މިންގަނޑުތަކަށް ބެލުމަށްފަހު އެ ޤަވާއިދަށް ކަމާއި ގުޅޭ ފަރާތްތަކާއި ގުޅިގެން މަސައްކަތްކުރާނެ ކަމަށެވެ. އަދި ރާއްޖެ ޑައިވް މަންޒިލެއްގެގޮތުގައި އިޝްތިހާރުކުރުމަށްޓަކައި ގިނަ މަސައްކަތެއް ކުރާނެކަމަށްވެސް ފައިޞަލް ވިދާޅުވިއެވެ.
ފުވައްމުލަކު ސިޓީގެ ފަތުރުވެރިކަމަށް 10 އަހަރު ފުރުން ފާހަގަކުރުމަށް ބޭއްވި މި ހަފްލާގައި "ފުވައްމުލައް ޓޫރިޒަމް އެވޯޑް 2024" ގެ ނަމުގައި ޚާއްސަ އެވޯޑުތަކެއް ދީފައިވެއެވެ. މި އެވޯޑުތަކަކީ އެ ސިޓީގެ ގެސްޓް ހައުސްގެ ވިޔަފާރިކުރާ ފަރާތްތަކާއި، ފުވައްމުލަކުގައި ޑައިވް ސެންޓަރުތައް ހިންގާ ފަރާތްތަކާއި، ފަތުރުވެރިކަމުގެ ދާއިރާއަށް އެކި ގޮތްގޮތުން އެހީތެރިކަން ފޯރުކޮށްދިން ފަރާތްތަކުގެ އަގުވަޒަންކޮށް ދިން އެވޯޑުތަކެކެވެ.
ފުވައްމުލައް ސިޓީގައި ފަތުރުވެރިކަން ފެށުނު ދުވަހުގެ ގޮތުގައި ބަލަނީ އެ ރަށުގައި އެންމެ ފުރަތަމަ ގެސްޓުހައުސްއެއް ހުޅުވި ދުވަހުގެ ތާރީޚަށެވެ. އެގޮތުން އެ ރަށުގައި ފުރަތަމަ ގެސްޓުހައުސްއެއް ހުޅުވާފައިވަނީ 16 ޖޫން 2013 ގައި ވިލަކްސާ ރިޓްރީޓް ނަމަކަށް ކިޔާ ގެސްޓުހައުސްއެކެވެ.
މި ޙަފްލާގައި ވާހަކަފުޅު ދައްކަވަމުން ފައިޞަލް އިތުރަށް ފާހަގަކުރެއްވި ގޮތުގައި، ފަތުރުވެރިކަމުގެ ދާއިރާއިން ކުރިއަށްދާން ބޭނުންވާ ޒުވާނުންނަށް ހުރި ފުރުޞަތުތައް އިތުރުކުރުމަކީ ސަރުކާރުގެ އިސް އަމާޒެކެވެ. މިގޮތުން ޒުވާނުންނަށް ބޭނުންވާ ތަމްރީނާއި ހުނަރު ލިބިދިނުމަށް އެކި ޕްރޮގްރާމްތައް ހިންގުމަށް ރާވާފައިވާ ކަމަށް ވެސް ފައިޞަލް ވިދާޅުވިއެވެ.
ފަތުރުވެރިކަމުގެ ދާއިރާގައި ދިވެހިންގެ ބައިވެރިވުން އިތުރުކުރުމަށްޓަކައި އަޅަމުންދާ ފިޔަވަޅުތަކުގެ ތެރޭގައި، ރިސޯޓުތަކުގައި ދިވެހިންނަށް ވަޒީފާގެ ފުރުޞަތުތައް އިތުރުކުރުމާއި، ފަތުރުވެރިކަމުގެ ދާއިރާގައި މަސައްކަތްކުރާ ދިވެހިންގެ ޢަދަދު އިތުރުކުރުމަށް ބާރުއެޅުން ހިމެނޭ ކަމަށްވެސް ފައިޞަލް ފާހަގަކުރެއްވިއެވެ.
