އދ.ގެ 79 ވަނަ އާންމު މަޖިލީހުގައި އިސްރާއީލްގެ ބޮޑުވަޒީރު ބެންޖަމިން ނަަތަންޔާހޫ ތަގްރީރު ކުރައްވަން ފެށުމުން، އެހޯލުގައި ތިބި ދިވެހިރާއްޖޭގެ ވަފްދު އެތަނުން ނުކުމެއްޖެއެވެ. މިކަން ހާމަކުރެއްވީ ރައީސް އޮފީހުގެ ތަރުޖަމާން ހީނާ ވަލީދު އެކްސްގައި ކުރެއްވި ޕޯސްޓެއްގައެވެ.
ހީނާ ވިދާޅުވި ގޮތުގައި، ރާއްޖޭގެ ވަފްދު އެހޯލުން ނުކުތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފަލަސްތީނާއިމެދު ގެންގުޅުއްވާ ހާއްސަ ސަމާލުކަމާއި، އެ ގައުމުގެ ހައްގުގައި އެމަނިކުފާނު ކުރައްވަމުން ގެންދަވާ ހާއްސަ މަސައްކަތްޕުޅަށް އިހްތިރާމް ކުރެއްވުމުގެ ގޮތުންނެވެ. ދިވެހި ވަފްދުގެ އިތުރުން ތުރުކީގެ ވަފުދާއި އެހެން ގިނަ ބަޔަކުވެސް ވަނީ އެތަނުން ނުކުމެފައެވެ.
ރައީސް މުއިއްޒު ވަނީ ދާދި ފަހުން ފަލަސްތީނުގެ ރައީސް މަޙްމޫދު ޢައްބާސްއާ ބައްދަލުކުރައްވާ، ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަގްވާމީ ގޮތުން ކުރެވޭ މަސައްކަތްތަކުގައި ރާއްޖެއިން ސާބިތުކަމާއެކު ދެމި އޮންނާނެކަމުގެ ކަށަވަރުކަން ދެއްވާފައެވެ.
Advertisement
ރައީސް މުއިއްޒަކީ ފަލަސްތީނުގެ މައްސަލައިގައި އެކި ޕްލެޓްފޯމްތަކުގައި އަޑުހަރުކޮށް ވާހަކަފުޅު ދައްކަވާ ބޭފުޅެކެވެ. އދ.ގެ ޕްލެނަރީ އޮފް ސަމިޓް އޮފް ދ ދަ ފިއުޗަރގައި ރައީސް ވަނީ ހިތްވަރާއެކު ފަލަސްތީނުގެ ޣައްޒާގައި ހިންގަމުންދާ ގަތުލު އާންމު ހުއްޓުވަން ޖެހޭ ކަމަށާއި ފަލަސްތީނަކީ ވަކި ދައުލަތެއް ކަމަށް ނިންމަން ޖެހޭ ކޭ ކަމަށް ވިދާޅުވެފައެވެ.
އދ.ގެ އާންމު މަޖިލީހުގެ ބަހުސްގައި ބައިވެރިވެވަޑައިގެން ރައީސް ވަނީ އިސްރާއީލުން ޣައްޒާގައި ހިންގަމުންދާ ގަތުލު އާންމަކީ އަދުލު އިންސާފާއި ބައިނަލްއަގްވާމީ ނިޒާމަށް ފުރައްސާރަ ކުރުން ކަމަށް ވިދާޅުވެފައެވެ. އަދި ޣައްޒާގެ ގެތަކާއި، ހޮސްޕިޓަލްތަކާއި، ސްކޫލްތަކާއި، އިންސާނީ އެހީތެރިކަން ދޭ ތަންތަނަށް ތަކުރާރުކޮށް ހަމަލާދީ ސުންނާފަތިކޮށްލާފައިވާ ކަމަށާއި، ތުއްތު ކުދިންނާއި، ކުޑަކުދިންނާއި، އަންހެނުންނާއި ފިރިހެނުން ޝަހީދު ކުރުން ތަކުރާރުވަމުންދާ ކަމަށް ފާހަގަކުރެއްވިއެވެ.
ރައީސް އިތުރަށް ވިދާޅުވީ، ޣައްޒާގައި އެތައް ހާސް ބަޔަކު ޝަހީދު ކުރި ކުރުން ޕްރޮސެސް ކުރުމަށް މުޅި ދުނިޔެއަށް ދަތިވެފައިވާއިރު، މިހާރު އިސްރާއީލުން ލުބްނާނަށް ހަމަލާދީ އެތަނުގައި އެތައް ހާސް ބަޔަކު ޝަހީދު ކުރަމުންދާ ކަމަށެވެ. އަދި އިސްރާއީލުން ނޫސްވެރިންނާއި ނޫސް އެޖެންސީތަކަށް އަމާޒުކޮށް ދެމުންގެންދާ ހަމަލާތަކުގެ ވާހަކަ ވެސް ރައީސް ހިއްސާ ކުރެއްވިއެވެ.
"ނިރުބަވެރި މި އަމަލުތަކާއި، ބައިނަލްއަގްވާމީ ގާނޫނުތަކާއި، އދ.ގެ ގަރާރުތަކާއި ހިލާފަށް ހިންގާ މި އަމަލުތަކަށް އިސްރާއީލުން ޖަވާބުދާރީވާން ޖެހޭ، އަދި އިރުމަތީ ގުދުސްއަކީ އެ ގައުމުގެ ވެރިރަށް ކަމަށް ކަނޑައަޅައި، ފަލަސްތީނުގެ ދައުލަތް ބަލައިގަންނަން ޖެހޭ،" ރައީސް ވިދާޅުދާޅުވިއެވެ.
