ކަނޑުދަތުރުފަތުރު ކުރުމުގެ ކަންކަމުގައި އަންހެނުންގެ ދައުރު ފުޅާކޮށް މިކަމަށް މަގުފަހިކުރުމަށްޓަކައި ވަރަށް ބޮޑު އިސްކަމެއް ދީގެން ކެމްޕޭނެއް ކުރިއަށްގެންދަން ނިންމާފައިވާ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

މި އަހަރުގެ ކަނޑުދަތުރުފަތުރު ދުވަހާ ގުޅިގެން ވަޒީރު ދެއްވި ޚިޠާބުގައި، ދަތުރުފަތުރުގެ ދާއިރާއަށް ޒުވާނުން ނުކުތުމުގެ މުހިންމުކަން ފާހަގަކުރެއްވިއެވެ. މީގެ ތެރޭގައި އަންހެނުން މި ދާއިރާއަށް ނުކުތުމަކީ އަންހެނުން ބާރުވެރިކުރުމަށް މުހިންމު ކަމެއް ކަމަށްވެސް ވަޒީރު ވިދާޅުވިއެވެ.

"ގިންތީގެ ހަމަހަމަކަން ގާއިމުކުރުމަށް ބާރުއަޅަމުންދާ މިފަދަ ޒަމާނެއްގައި ކަނޑުދަތުރުފަތުރު ކުރުމުގެ އެންމެހައި ކަންކަމުގައި އަންހެނުންގެ ދައުރު ފުޅާކޮށް މިކަމަށް މަގުފަހިކުރުމަށްޓަކައި މި މިނިސްޓްރީއިން ވަރަށް ބޮޑު އިސްކަމެއް ދީ ކެމްޕޭނެއް ކުރިއަށް ގެންދާނެ." ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، އިންޓަނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) އިން 76 އަހަރުގެ ތަޖުރިބާއާއެކު ކަނޑުދަތުރުފަތުރުގެ މަސައްކަތްތަކުގައި ރައްކާތެރިކަމަށް އިސްކަންދިނުމަކީ އެންމެ އިސްކަންދޭ އަސާސް ކަމަށެވެ. އާ ޓެކްނޮލޮޖީތަކާއެކު ޒަމާނަށް ފެތޭގޮތަށް ގަވާއިދުތައް ބަދަލުކުރަމުން ދަނީ ކަނޑުދަތުރުފަތުރު ކުރުމުގައި އިންސާނުންނާއި އުޅަނދުފަހަރުގެ ސަލާމަތާއި ރައްކާތެރިކަމަށް އިސްކަންދީ ބާރުއަޅައި އެކަމަށް މީހުން އަހުލުވެރި ކުރުވުމަށް ކަމަށްވެސް ވަޒީރު ވިދާޅުވިއެވެ.

ވަޒީރު އަމީން އިތުރަށް ފާހަގަކުރެއްވީ، ރާއްޖޭގައިވެސް މި ދާއިރާގެ ކަންތައްތައް ކުރިއަށް ގެންދާނީ ސަލާމަތާއި ރައްކާތެރިކަން ކުރިއަށް ނެރެ، ހަމަ އެއާއެކު ރައްޔިތުންނަށް ފަސޭހަކަމާއެކު ދަތުރުފަތުރުގެ ހުރިހާ ކަންތައްތައް ކުރެވޭނެ ގޮތްގޮތަށް މަގުތައް ކޮށައި އާރާސްތުކޮށްގެން ކަމަށެވެ.

ވަޒީރުގެ ވާހަކައިގައި، ތިމާވެށި ރައްކާތެރިކުރުމަށް މަސައްކަތްކުރުމަކީ އަދުގެ ސަރުކާރުން ވަރަށް ބޮޑު އިސްކަމެއް ދެއްވާ ކަމެއްކަން ފާހަގަކުރެއްވިއެވެ. އަދި ގްރީންހައުސް ގޭސް މަދުކުރުމުގައި ކަނޑުދަތުރުފަތުރުގެ ދާއިރާއިން ކުރެވެން ހުރި ކަންކަން ދެނެގަނެ އަމަލީ ގޮތުން ކުރެވެން ހުރި ހުރިހާ ކަމެއް ކުރާނެ ކަމަށް ވިދާޅުވިއެވެ.

"ދުނިޔޭގެ ވިޔަފާރީގެ %90 ހިމެނޭ މުދާ އެއްތަނުން އަނެއްތަނަށް ގެންދެވެނީ ކަނޑުމަގުން. ވުމާއެކު މިކަމުގައި ރައްކާތެރިކަން އިތުރުކުރުމަކީ ދެމެހެއްޓެނިވި އިޤްތިސާދީ ކުރިއެރުމަށް ވަރަށް މުހިންމުކަމެއް." ވަޒީރު ވިދާޅުވިއެވެ.

ވަޒީރު ވިދާޅުވީ ދެމެހެއްޓެނިވި ތަރައްޤީއަކީ އދ. ގެ ވަރަށް ގިނަ ލަނޑުދަނޑިތައް ހާސިލްކުރުމަށް މަގުފަހިކޮށްދޭ އަމާޒެއް ކަމަށެވެ.

ވަޒީރުގެ ވިދާޅުވީ ރާއްޖޭގެ އިޤްތިސާދީ މަސައްކަތްތައް ގުޅިފައިވަނީ ކަނޑާ ކަމަށާއި، ރާއްޖޭގައި ކަނޑުދަތުރުފަތުރުގެ ރައްކާތެރިކަން ދެމެހެއްޓެނިވި ގޮތެއްގައި ކުރިއަށް ގެންދިއުމުގެ މުހިންމުކަން ފުރިހަމައަށް ގަބޫލުކުރާ ބަޔަކަށް ދިވެހިން ވާންޖެހޭ ކަމަށެވެ.