ގައުމު ކުޑަޔަސް، ދުނިޔޭގެ ފެންވަރުގައި ދިވެހީންގެ އަޑު މަޑު ނޫންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސާބިތުކޮށްދެއްވާފިކަމަށް ރައްޔިތުންގެ މަޖިލީހުގެ ރައީސް އަބްދުއް ރަހީމް އަބްދުﷲ ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި އަބްދުއް ރަހީމް ފާހަގަކުރެއްވި ގޮތުގައި، ރޭ އދ.ގެ 79 ވަނަ އާންމު މަޖިލީހުގެ ބަހުސްގައި ރައީސް މުޢިއްޒު ދެއްކެވި ވާހަކަފުޅުގައި، ނިސްބަތުން ގައުމު ކުޑަވެފައި މީސްކޮޅު މަދު ނަމަވެސް ދުނިޔޭގެ ފެންވަރުގައި ދިވެހީންގެ އަޑު މަޑުނޫންކަން ދުނިޔޭގެ އެންމެ އުސް ސްޓޭޖުގައި ހުންނަވައިގެން ސާބިތުކޮށްދެއްވާފި ކަމަށެވެ.
"ރައީސްގެ ހަރުދަނާ ސިޔާސަތާ މާދަމާއަށް ކުރައްވާ އުންމީދާއި ދުނިޔެ މިއަދު ކުރިމަތިލާންޖެހިފައިވާ ބޮޑެތި މައްސަލަތަކަށް އަލި އަޅުވާލެއްވީ ހުއްޖަތާއި ދަލީލުތައް ދައްކަވާ ދިވެހީން ފަޚުރުވެރިކުރުވަމުން. ތަހުނިޔާ ރައީސް،" އަބްދުއް ރަހީމް ވިދާޅުވިއެވެ.
Advertisement
ރައީސް މުޢިއްޒުގެ ވާހަކަފުޅުގައި 2040 އަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމަކީ އަމާޒެއް ކަމަށާއި، އެކަން ހާސިލް ކުރެވިދާނެ ކަމުގެ ޔަޤީންކަން ދެއްވިއެވެ. އަދި 2030 ގެ ނިޔަލަށް ރާއްޖޭގެ ޖީޑީޕީގެ 15% ހިއްސާކުރާނީ ޑިޖިޓަލް އިޤްތިޞާދު ކަމަށްވެސް ވިދާޅުވިއެވެ.
މިހާރު އެމެރިކާގެ ނިއުޔޯކަށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސް މުޢިއްޒު ވަނީ އދ.ގެ 79 ވަނަ އާންމު މަޖިލީހުގެ ބަހުސްގައި ބައިވެރިވެވަޑައިގެން ވަރަށް ގިނަ ކަންކަމަށް އަލިއަޅުވާލައްވާ ވާހަކަފުޅު ދައްކަވާފައެވެ. މި ވާހަކަފުޅުގައި ރާއްޖޭގެ ތަރައްޤީއާއި ކުރިމަގަށް އަމާޒުކޮށް ގިނަ ވާހަކަތަކެއް ދައްކަވާފައިވާކަން ފާހަގަކުރެވެއެވެ.
