އެޓަލާންޓާ ބަލިކޮށް، 21 އަހަރުގެ ތެރޭގައި އިޓާލިއަން ލީގުގައި ފުރަތަމަ ފަހަރަށް ޓީމެއް މޮޅުވެއްޖެއެވެ. މި ޓީމަކީ ރޭ އިޓަލީ ލީގުގައި މޮޅުވި ކޯމޯ އެވެ.

ކޯމޯ ރޭ ކުޅުނީ ވެސް އެޓަލާންޓާގެ ދަނޑުގައެވެ. އަދި ފުރަތަމަ ލީޑްނެގީވެސް އެ މީހުންނެވެ. 18 ވަނަ މިނެޓުގައި އެ ޓީމަށް މި ލަނޑުޖަހައިދިނީ ޑެވިޑޭ ޒަޕަކޮސްޓާ އެވެ. މިއީ ޕެނަލްޓީއޭރިޔާ ބޭރުންފޮނުވާލި ބާރު ހަމަލާއަކުން އޭނާ ކާމިޔާބުކުރި ގޯލެކެވެ. ފުރަތަމަ ހާފު ނިމުނީ މި ނަތީޖާގައި އޮވެގެންނެވެ.

ނަމަވެސް ދެވަނަހާފު ފެށިތަނާހެން އެޓްލާންޓާއިން ވަނީ ގޯލު ޖަހައި އެއްވަރު ކޮށްފައެވެ. މި ގޯލު ޖަހައިދިނީ ގެބްރިއެލް ސްޓްރެފެޒާއެވެ. އޭނާ މި ގޯލު ޖެހީ ސާޖީ ރޮބާޓޯ ފުންނާބުކޮޅުން ޖައްސާލި ރީތި ބެކްޕާހަކުންނެވެ. 

ނަމަވެސް ދެން ފެނުނީ ހައިރާންވި ގޯލެކެވެ. މެޗުގެ 54 ވަނަ މިނެޓުގައި އެޓަލާންޓާގެ ޑިފެންޑަރު، ސެއަދު ކޮލާސިނާޗް އަތުން ބައިކޮޅަށް ގޯލެއް ވަދެ ކޯމޯ އަށް ލީޑު ލިބުނެވެ. 

މިއާއެކު ކޯމޯގެ ކުޅުން އިތުރަށް ރަނގަޅުކޮށް އޭގެ ހަތަރު މިނެޓު ފަހުން އިތުރު ގޯލެއް ޖެހިއެވެ. އެ ގޯލު ޖަހައިދިނީ އަލިއު ފަދެރާއެވެ. އެޓަލާންޓާ އަށް ފަރަގު ކުޑަކޮށްދިނީ ލިބުނު ޕެނަލްޓީއަކުން އެޑެމޯލާ ލުކްމަން އެވެ. 

ރޭގެ މޮޅާއެކު އެ ޓީމަށް މިހާތަނަށް ކުޅުނު ފަސް މެޗުން މިވަނީ ފަސް ޕޮއިންޓް ލިބިފައެވެ. އެޓީމު އޮތީ ތާވަލުގެ 15 ވަނައިގައެވެ. ހަ ޕޮއިންޓާއެކު އެޓްލާންޓާ އޮތީ 12 ވަނައިގައެވެ.