ދިވެހި ކަނޑުމަހަށް ހަމަ އަގު ހޯދުމުގެ މަގުސަދުގައި، ދިވެހިރާއްޖެއިން ޔޫރަޕްގެ ގައުމުތަކަށް އެކްސްޕޯޓްކުރާ މަހުން ނަގާ ޓެރިފް އުނިކުރުމަށް ޔޫރަޕިއަން ޔޫނިއަންގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެދިވަޑައިގެންފިއެވެ. އެމަނިކުފާނު މިކަމަށް އެދިވަޑައިގަތީ އދ.ގެ 79 ވަނަ އާންމު މަޖިލީހުގެ އެއްފަރާތުގައި ބޭއްވި މަތީ ފެންވަރުގެ ބައްދަލުވުމެއްގައި ޖަރުމަނުގެ  އުރްސަލާ ވޮންޑެލެޔެންއާއި ބައްދަލުކުރައްވައި ދެއްކެވި މަޝްވަރާ ވާހަކަތުގައެވެ. އެކަމަނާއަކީ ޔޫރަޕިއަން ޔޫނިއަންގެ ރައީސެވެ.

މި މަޝްވަރާތަކުގައި ރާއްޖެއަށް އަސަރުކުރާ އިގްތިސާދީ މުހިންމު މައްސަލަތަކަށް އަލިއަޅުވާލާފައިވާއިރު، ޔޫރަޕިއަން ޔޫނިއަންއަށް ދިވެހި މަސް އެކްސްޕޯޓްކުރުމަށް މިހާރު ނަގާ %24 ޓެރިފް އަކީ ވަރަށް ބޮޑު ޢަދަދެއް ކަމަށާއި، މި ޓެރިފް މުޅިން މަޢާފްކޮށް، ޓެރިފްގެ ސަބަބުން ޔޫރަޕްގެ ބާޒާރުގައި ދިވެހި މަހުގެ އުފެއްދުންތަކުގެ ވާދަވެރިކަމަށް އެޅިފައިވާ ހުރަސް ނައްތާލުމަކީ ރާއްޖޭގެ އިގްތިސާދަށް މުހިންމު ކަމެއް ކަމަށް ރައީސް ފާހަގަކުރެއްވި އެވެ. 

ރައީސް މުޢިއްޒު ވަނީ އެ ޓެރިފްގެ ސަބަބުން ރާއްޖެއަށް ކުރާ އިޤްތިޞާދީ ބުރަކަމަށް އަލިއަޅުވާލައްވައި، އެ ޓެރިފް އަލުން ރިވައިސް ކުރުމަށް ޔޫރަޕިއަން ކޮމިޝަނަށް އިލްތިމާސް ކުރައްވާފައެވެ.

ޖަވާބުގައި ރައީސް އުރްސުލާ ވަނީ ޔޫރަޕިއަން ޔޫނިއަނުން އެކަން މުރާޖައާ ކުރާނެ ކަމަށް ވިދާޅުވެފަ އެވެ. މީގެ އިތުރުން ، ވިޔަފާރީގެ ގުޅުންތައް ދެމެހެއްޓުމަށް އީޔޫއިން ރާއްޖެއާއެކު ޔޫރަޕްގެ ބާޒާރުގައި ރާއްޖޭގެ އިގްތިސާދީ މަގާމު އިތުރުވާނެ ހައްލުތައް ހޯދުމަށް އެކަމަނާ ޝައުގުވެރިކަން ފާޅުކުރެއްވި އެވެ.