ރާއްޖޭގެ ތިން ސަރަހައްދެއްގައި ތަރައްޤީކުރުމަށް ނިންމާފައިވާ މަސް ޕްރޮސެސްކުރާ ކާރުޚާނާތަކުގެ ޢަމަލީ މަސައްކަތް މިއަހަރު ފަށްޓަވާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު ޝިޔާމް މިހެން ވިދާޅުވީ، މަސް ދޯނިތަކުގައި ލޮނުފެނުން މަސް ފިނިކުރާ ނިޒާމް ގާއިމްކުރުމަށް ލޯނު ދޫކުރުމުގެ މަޝްރޫޢު އަލުން މުރާޖަޢާކޮށް އެ މަސައްކަތް ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.

ވަޒީރު ޝިޔާމް ވިދާޅުވީ މަސްވެރިކަމުގެ ސިނާޢަތަށް ދިމާވެފައިވާ އެންމެ ބޮޑު އެއް ގޮންޖެހުމަކީ މަސްވެރިން ބާނާ މަސް އަގުއެއްނުކޮށް، ރޯމަހުގެ ގޮތުގައި އެކްސްޕޯޓްކުރަން ޖެހުންކަމަށެވެ. މިކަމުަމުގެ ސަބަބުން މަހަށް ލިބެންވާ ހަމަ އަގު ނުލިބޭކަމަށް ވަޒީރު ފާހަގަކުރެއްވިއެވެ.

މި މައްސަލައަށް ހައްލެއް ހޯދުމުގެ ގޮތުން، މަހަށް ހަމައަގު ހޯދައިދިނުމަށާއި، އަގުއެއްކޮށްގެން މަސް ބޭރުކުރުމަށް ޚާއްޞަ އިސްކަމެއް ދެއްވައިގެން މަސައްކަތްތަކެއް ކުރައްވަމުން ގެންދަވާކަމަށް ވަޒީރު ވިދާޅުވިއެވެ.

މިހާރު ރާއްޖޭގައި ދުވާލަކު ޕްރޮސެސްކުރެވެނީ ގާތްގަނޑަކަށް 110 މެޓްރިކް ޓަނުގެ މަސްކަމަށް ވަޒީރު ވިދާޅުވިއެވެ. ނަމަވެސް އަލަށް ތަރައްޤީކުރާ ކާރުޚާނާތަކާއެކު މި ޢަދަދު ގާތްގަނޑަކަށް 300 މެޓްރިކް ޓަނަށް އިތުރުވެގެންދާނެކަމަށް ވަޒީރު ވިދާޅުވިއެވެ.

"މި ތިން ފެސިލިޓީ ހަދާ ނިމުމުން ގާތްގަނޑަކަށް 90 ނުވަތަ 95 އިންސައްތައަށް ވެލިއުއެޑް ކުރެވިގެން ދާނެ" ވަޒީރު އަޙްމަދު ޝިޔާމް ވިދާޅުވިއެވެ.

ވަޒީރު ޝިޔާމް އިތުރަށް ވިދާޅުވީ، މިހާރު ރަނގަޅު މަސްވެރިކަމެއްގައި މަސް އެކްސްޕޯޓްކޮށްގެން 92 މިލިޔަން ޑޮލަރާއި 95 މިލިޔަން ޑޮލަރާ ދެމެދުގެ އަދަދެއް ރާއްޖެއަށް ލިބޭއިރު، އައު ކާރުޚާނާތަކާއެކު މި ޢަދަދު ދެގުނަ ކުރެވޭނެކަމަށެވެ.

މި މަޝްރޫޢުގެ ސަބަބުން ޚާއްޞަކޮށް ކަނޑުބިލަމަހުން ލިބޭ އާމްދަނީ ބޮޑަށް އިތުރުވެގެންދާނެކަމަށްވެސް ވަޒީރު ޝިޔާމް ވިދާޅުވިއެވެ.