ހުޅުމާލެ-މާލެ ބްރިޖް ހައިވޭގައި ޖަހާފައިވާ ސޯލާ ޕެނަލްތައް އެހެން ތަނަކަށް ބަދަލުކުރުމަށްޓަކައި، މަޝްރޫޢުގެ ކޮންޓްރެކްޓަރާއި ވޯލްޑް ބޭންކާއެކު މަޝްވަރާތައް ފަށައިފިކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު ޠާރިޤު ވިދާޅުވީ، މި މަޝްރޫޢުއަކީ ވޯލްޑް ބޭންކްގެ އެހީގައި އަމިއްލަ ކުންފުންޏަކުން ކުރިއަށްގެންދިޔަ މަޝްރޫޢުއަކަށްވާތީ، ސޯލާ ޕެނަލްތައް ބަދަލުކުރުމަށް ދިގު މުއްދަތެއް ހޭދަވަމުންދާ ކަމަށެވެ. އަދި މިހާރު އެ ނިޒާމުން އުފައްދާ ކަރަންޓު ބޭނުންކުރަމުންދާތީ، އެކަމާ ގުޅިގެން ކޮންޓްރެކްޓަރާއި ވޯލްޑް ބޭންކާއެކު މަޝްވަރާކުރަމުންދާ ކަމަށް ވަޒީރު ވިދާޅުވިއެވެ.

"ސަރުކާރުގެ އެސެޓަކަށް ނުވާތީ އެއްފަހަރާ އެކަން ކުރަން އުނދަގޫ. ކޮންޓްރެކްޓަރާ ވޯލްޑް ބޭންކާއެކު ވާހަކަދައްކަމުން މިދަނީ، އެހެން ތަނަކަށް ބަދަލުކުރަން ހޭދަވާނެ ފައިސާގެ މިންވަރާއި އެކަން ކުރެވޭނެ ގޮތަކާމެދު." ވަޒީރު ޠާރިޤު ވިދާޅުވިއެވެ.

ހައިވޭގައި ހަރުކޮށްފައިވާ ސޯލާ ޕެނަލްތައް އެ ތަނުން ނަގައި، އެހެން ތަނަކަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ ހައިވޭ ބޭނުންކުރާ މީހުންގެ ސަލާމަތާއި ރައްކާތެރިކަމާމެދު ސުވާލު އުފެދި، ބްރިޖު ސަރަހައްދުން ފެންނަ ރީތި މަންޒަރު ގެއްލޭތީއެވެ. ރައީސުލްޖުމްހޫރިއްޔާ ވިދާޅުވެފައިވަނީ ސޯލާ ޕެނަލްތައް މީހުން ދިރިއުޅޭ އެހެން ރަށަކަށް ބަދަލުކުރައްވާނެ ކަމަށެވެ.

މި ނިޒާމަކީ 5.5 މެގަވޮޓްގެ އަވިން ހަކަތަ އުފައްދާ ނިޒާމެކެވެ. މި މަޝްރޫޢުގެ ޖުމްލަ އަގަކީ 11 މިލިޔަން ޑޮލަރު ނުވަތަ 169 މިލިޔަން ރުފިޔާއެވެ. އަދި މި ނިޒާމު އެހެން ތަނަކަށް ބަދަލުކުރާނަމަ 170 މިލިޔަން ރުފިޔާ ޚަރަދުވާނެކަމަށް މިދިޔަ އަހަރު އޮކްޓޫބަރުގައި ތިމާވެއްޓާއި ހަކަތައާ ބެހޭ ވުޒާރާއިން ވިދާޅުވެފައިވެއެވެ.