މަތީ ތަޢުލީމް ދޭ މަރުކަޒުތަކުން ހިންގާ ކޯސްތަކުގެ ހުރިހާ އިމްތިހާނުތަކުން 50 އިންސައްތަ ފާސްވާންޖެހޭގޮތަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ އެކްރެޑިޓޭޝަން އުސޫލަށް ބަދަލު ގެނައުމަށް ނިންމައިފިއެވެ.
އެމްކިއުއޭގެ އެކްރެޑިޓޭޝަން އުސޫލަށް ގެންނަން ނިންމި ބަދަލުތަކާއި ގުޅޭގޮތުން ސަރުކާރު މީޑިއާއަށް ދެއްވި އިންޓަވިއުއެއްގައި އެ އޮތޯރިޓީގެ ސީއީއޯ ފިޒާނާ ރަޝީދު ވިދާޅުވީ، ކޯސްތަކުގައި ދަރިވަރުންނަށް ހަވާލުކުރާ އެސައިންމަންޓްތައް އެހެން މީހުން ލައްވާ ތައްޔާރުކުރުވުމަކީ މައްސަލައެއް ކަމަށެވެ.
"50 އިންސައްތަ ކޮންޓްރޯލް އެގްޒާމުން ފާސްވެގެން ނޫނިއްޔާ ފާސްނުވާގޮތަށް ހަދައިފިނަމަ އެސައިންމަންޓްގެ ބައި ކުޑަވެގެންދާނެކަމަށް ޤަބޫލުކުރެވޭ. އެސައިންމަންޓް ގަތުމުގެ ބައިވެސް ކުޑަވެގެންދާނެ،" ފިޒާނާ ވިދާޅުވިއެވެ.
Advertisement
މި ބަދަލު ގެނައުމަށް ނިންމާފައިވަނީ މަތީ ތަޢުލީމްދޭ މަރުކަޒުތަކުގެ އިސްވެރިންނާ ބައްދަލުކޮށް މަޝްވަރާކުރުމަށްފަހު ކަމަށް ފިޒާނާ ވިދާޅުވިއެވެ. އަދި މި އުސޫލު ވަރަށް އަވަހަށް ގެޒެޓްކުރާނެ ކަމަށްވެސް އޭނާ ވިދާޅުވިއެވެ.
މިހާރު ބައެއް މަތީ ތަޢުލީމު މަރުކަޒުތަކުން ދަރިވަރުން ހަދަން ދޭ އެސައިންމަންޓަށް 40 އިންސައްތައިން ފެށިގެން 70 އިންސައްތައާ ހަމައަށް މާކްސް ދެއެވެ. އަދި އެއްވެސް އިމްތިހާނަކާ ނުލައި 100 އިންސައްތަ އެސައިންމަންޓުން ކުއްޖާ ފާސްވާ މާއްދާތައްވެސް ބައެއް މަރުކަޒުތަކުގައި ކުރިއަށް ގެންދެއެވެ.
މަތީ ތަޢުލީމާއި ތަމްރީންދޭ މަރުކަޒުތަކާ ބެހޭގޮތުން ހުށަހަޅާ ޝަކުވާތައް ބެލުމުގައި ޢަމަލުކުރާނެ ގޮތުގެ" ޤަވާއިދުގައިވާ ގޮތުން، ދަރިވަރަކު އަމިއްލައަށް ފުރިހަމަކުރަންޖެހޭ އެކަޑަމިކް މަސައްކަތެއް އަގަށް ނުވަތަ އެނޫންވެސް ގޮތަކަށް އެހެން ފަރާތަކުން ކޮށްދިނުމާއި ކޮށްދިނުމަށް ހުށައެޅުމަކީ މަނާކަމެކެވެ. މިފަދަ ޢަމަލެއް ހިންގައިފިނަމަ 5,000 ރުފިޔާއިން ޖޫރިމަނާކުރެވޭނެ ކަމަށް ވެސް ފިޒާނާ މައުލޫމާތު ދެއްވިއެވެ.
މި ބަދަލު ގެނައުމުގެ މަޤްޞަދަކީ މަތީ ތަޢުލީމުގެ ފެންވަރު ރަނގަޅުކޮށް، ދަރިވަރުންގެ ޙަޤީޤީ ޤާބިލުކަން ވަޒަންކުރުމަށް ކަމަށް ފިޒާނާ ވިދާޅުވިއެވެ.
