ކުޅިވަރުގެ އެކި ރޮނގުތަކުން މީހުން ތަމްރީނު ކުރުމަށް އިންޑިއާއަށް ފޮނުވުމާ ގުޅޭގޮތުން ކުޅިވަރު ވަޒީރު ޢަބްދުﷲ ރާފިޢު އާއި އިންޑިއާގެ ސަފީރު މުނޫ މަހާވަރް އާ ދެމެދު މަޝްވަރާ ބައްދަލުވުމެއް ބާއްވައިފިކަމަށް ކުޅިވަރު ވުޒާރާއިން ހާމަކޮށްފިއެވެ.

ކުޅިވަރު ވުޒާރާގައި އިއްޔެ ބޭއްވުނު މި ބައްދަލުވުމުގައި، އެތުލެޓިކްސްއާއި ޓޭބަލް ޓެނިސް ފަދަ ކުޅިވަރުތަކުގެ އެތުލީޓުން ދިގު މުއްދަތަށް އިންޑިއާގައި ބައިތިއްބައިގެން ތަމްރީނު ކުރުމާ ގުޅޭގޮތުން ވަނީ މަޝްވަރާކުރެވިފައެވެ. މީގެ އިތުރުން، ކުޅިވަރުގެ އެހެނިހެން ދާއިރާތަކުން މީހުން ތަމްރީނުކުރުމަށް ކުރެވިދާނެ ކަންކަމާ ގުޅޭގޮތުންވެސް ދެ ފަރާތުން ވަނީ ޚިޔާލު ބަދަލުކޮށްފައެވެ.

ކުޅިވަރު ވުޒާރާއިން މަޢުލޫމާތު ދެއްވިގޮތުގައި، މި ބައްދަލުވުމުގައި ވަޒީރު ރާފިޢު ހުށަހެޅުއްވި ކަންކަން ހަމަޖައްސައިދެއްވުމަށް މަސައްކަތް ކޮށްދެއްވާާނެ ކަމަށް އިންޑިއާ ސަފީރު ވަނީ ވިދާޅުވެފައެވެ. އަދި ޒަމާނުއްސުރެ ކުޅިވަރުގެ ދާއިރާއިން ދިވެހިރާއްޖެއާއި އިންޑިއާއާ ދެމެދު އޮތް ގުޅުން އިތުރަށް ތަރައްޤީކުރުމާ ގުޅޭގޮތުންވެސް މި ބައްދަލުވުމުގައި މަޝްވަރާކުރެވުނެވެ.

މި މަޝްވަރާތަކަކީ ދިވެހި އެތުލީޓުންގެ ހުނަރު އިތުރަށް ތަރައްޤީކޮށް، ބައިނަލްއަޤްވާމީ މައިދާނުގައި ރާއްޖޭގެ ނަން މަތިވެރިކުރުމަށް އެޅޭ މުހިންމު ފިޔަވަޅެއް ކަމުގައި ކުޅިވަރު ވުޒާރާއިން ފާހަގަކުރެއެވެ.