ޖައްވަށް ދޫކުރާ ވިހަ ގޭސްތައް މަދުކުރުމަށް ކުންފުނިތަކުން ހަކަތައިގެ އޮޑިޓެއް ހެދުން މުހިންމުކަމަށް ސްޕެޝަލް އެންވޯއީ ފޮރ ކްލައިމެޓް ޗޭންޖް ޢަލީ ޝަރީފް ވިދާޅުވެއްޖެއެވެ. މިހެން ވިދާޅުވީ މިއަދު ބޭއްވުނު ދިވެހިރާއްޖޭގެ ޤައުމީ އެއަރލައިން، އައިލެންޑް އޭވިއޭޝަން ސަރވިސަސް ލިމިޓެޑްގެ "މޯލްޑިވިއަން ގްރީން ހޮރައިޒަން އިނިޝިއޭޓިވް" އިފްތިތާޙްކުރުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ޢަލީ ޝަރީފް ވިދާޅުވީ 2022 ވަނަ އަހަރުގެ ދިރާސާއަކުން ދައްކާގޮތުން ރާއްޖެއިން އަހަރަކު 2030 ކިލޯ ޓަނުގެ ވިހަ ގޭސްތައް ޖައްވަށް ދޫކުރާ ކަމަށާއި، މީގެ ތެރެއިން 30 އިންސައްތަ ގޭހަކީ ދަތުރުފަތުރާއި މަދަނީ އުދުހުންތަކުގެ ދާއިރާއިން ޖައްވަށް ދޫކުރާ ގޭސްކަމަށެވެ. އަދި ތިމާވެށްޓާ ރައްޓެހިވުމަށް ކުންފުނިތަކުން ޕްރޮގުރާމްތައް ފަށާއިރު އެ ކުންފުންޏަކުން ޖައްވަށް ދޫކުރެވޭ ގޭސްތަކުގެ މިންވަރު ދެނެގަންނަންޖެހޭ ކަމަށް އޭނާ ބުނުއްވިއެވެ..
"ބައިނަލްއަޤުވާމީ ޖަމްޢިއްޔާތަކުން ތިމާވެށީގެ ކަންކަމުގައި ކުންފުނިތަކަށް މާލީ އެހީތެރިކަންދޭއިރު އެބަ ބަލައި ކުންފުނިތަކުން ތެޔޮ އަންދާ މިންވަރު ކުޑަ ކުރުމަށް ކޮންކަހަލ މަސައްކަތްތަކެއްތޯ ކޮށްފައިހުރީ. މިފަދަ އޮޑިޓުތައް ހަދައިގެން ވިހަ ގޭސްތައް ދޫކުރާ މިންވަރު މަދުކޮށްގެން މިފަދަ ފަންޑުތައް ބޮޑަށް ލިބޭނީ." ޢަލީ ޝަރީފް ބުނުއްވިއެވެ.
މި ރަސްމިއްޔާތުގައި އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރ ޢަލީ ސަލީމް ވިދާޅުވީ، އަލަށް ފެށުނު މި ޕްރޮގުރާމާއެކު ކުންފުނީގެ އިދާރީ ކަންކަމާއި އިޖުތިމާޢީ ހުރިހާ ކަމެއް ތިމާވެށްޓާ ރައްޓެހި ކުރެވޭނެ ކަމަށެވެ. އަދި އަމާޒަކީ އައިލެންޑް އޭވިއޭޝަނަކީ ވީހާވެސް ތިމާވެށްޓާ ރަޙުމަތްތެރި ކުންފުންޏަކަށް ހެދުންކަމަށް އޭނާ ބުނިއެވެ.
މި ރަސްމިއްޔާތުގައި އައިލެންޑް އޭވިއޭޝަނާއި ޕާލޭ މޯލްޑިވްސްއާ ދެމެދު ގްރީން ހޮރައިޒަން އިނިޝިއޭޓިވްގައި އެހީތެރިކަން ފޯރުކޮށްދިނުމާ ބެހޭ އެއްބަސްވުމެއްގައި ސޮއިކުރެވުނެވެ. އަދި ރަސްމިއްޔާތަށްފަހު އައިލެންޑް އޭވިއޭޝަންގެ ސީޕްލޭން ޑޮކް ހިމެނޭ ސަރަހައްދު ސާފުކުރުމުގެ ހަރަކާތެއް ކުރިއަށް ގެންދެވުނެވެ.
