ބ. ދަރަވަންދޫ އެއާޕޯޓު ހިންގުން އައިލެންޑް އޭވިއޭޝަންއަށް ރަސްމީކޮށް ހަވާލުކޮށްފިއެވެ.
އެކަމާ ގުޅިގެން މިއަދު ދަރަވަންދޫ އެއާޕޯޓު ސަރަހައްދުގައި ބޭއްވި ހާއްސަ ރަސްމިއްޔާތެއްގައި، އެއާޕޯޓު ހަވާލުކުރުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ޓްރާންސްޕޯޓް މިނިސްޓްރީގެ ޑިރެކްޓަރު ޖެނަރަލް އަހުމަދު ޝަމީމު އެވެ. އައިލެންޑް އޭވިއޭޝަންގެ ފަރާތުން އެ އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސެވެ.
އެ ބަދަލާއެކު، ދަރަވަންދޫ އެއާޕޯޓު އޮޕަރޭޓު ކުރުމާއި އެއާޕޯޓުގައި ދޭ އެންމެހާ ހިދުމަތްތައް ދެން ބަލަހައްޓަމުން ގެންދާނީ އައިލެންޑް އޭވިއޭޝަނުންނެވެ.
އަދި އެއާޕޯޓު ހަވާލުކުރުމާއެކު، ދަރަވަންދޫ އެއާޕޯޓުގެ ޓާމިނަލް ބޮޑުކުރުމުގެ ބޮޑު މަޝްރޫއެއް ކުރިއަށް ގެންދިއުމަށް ވަނީ ނިންމާފައި ކަމަށް އެ ކުންފުނިން ހާމަކޮށްފައިވެ އެވެ . އެގޮތުން އައިލެންޑް އޭވިއޭޝަނުން ބުނީ، އެ މަޝްރޫއަކީ އޭވިއޭޝަން ދާއިރާ ހަރުދަނާކޮށް ތަރައްގީ ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އިސްނަގައިގެން ކުރިއަށްގެންދާ މުހިންމު މަސައްކަތެއް ކަމަށެވެ.
އެ މަޝްރޫއުގެ ދަށުން މިހާރު ހުރި 959 އަކަފޫޓުގެ ޓާމިނަލް 1،874 އަކަފޫޓަށް ބޮޑުކުރެވޭނެ ކަމަށް ވެސް އެ ކުންފުނިން ބުންޏެވެ. އެއީ ގާތްގަނޑަކަށް އެ އާޕޯޓަށް އަންނަ ދެ ގުނަ ބޮޑުވުމެކެވެ. އެ ބަދަލާއެކު އެއާޕޯޓުން ދަތުރުކުރާ ފަސިންޖަރުންނަށް ޗެކިންވުމާއި، ބަގޭޖް ޕްރޮސެސިންގެ ކަންކަމުގައި ބޮޑެތި ފަސޭހަތަކެއް ލިބިގެންދާނެ ކަމަށް އައިލެންޑް އޭވިއޭޝަނުން ބުންޏެވެ.
ދަރަވަންދޫ އެއާޕޯޓުގެ އާ ޓާމިނަލް ފަރުމާކޮށްފައި ވަނީ ކަނޑުއަޑީގެ ރީތިކަން ރަމްޒުކޮށްދޭ ތަފާތު އާކިޓެކްޗާއަކަށެވެ. އޭގެ އިތުރުން ޓާމިނަލްގެ ބޭރުގައި ހާއްސަ ވެއިޓިން އޭރިއާއެއް ހެދުމާއި، އެރައިވަލް އޭރިއާ ބޮޑުކުރުން ވެސް މި މަޝްރޫއުގައި ހިމެނެ އެވެ. އަދި ފަސިންޖަރުންނަށް އަވަހަށް ދަބަސްތައް ލިބޭނެ ގޮތް ހެދުމަށްޓަކައި ބަގޭޖް ކޮންވެޔާ ބެލްޓެއް އިންސްޓޯލްކޮށް، އެރައިވަލް އޭރިއާއަކީ ފަސިންޖަރުންނަށް ފަސޭހަކަމާ އެކު އުޅެވޭނެ ތަނަކަށް ހެދުމަށް ވަނީ ހަމަޖެހިފަ އެވެ.
އެ މަޝްރޫއު ނިމުމުން ބ. އަތޮޅަށް ޒިޔާރަތްކުރާ ފަތުރުވެރިންނަށާއި އަތޮޅުގެ ރައްޔިތުންނަށް އެއާޕޯޓުން މުޅިން އާ، ފެންވަރު ރަނގަޅު ތަޖުރިބާއެއް ކުރެވޭނެ ކަމަށް އައިލެންޑް އޭވިއޭޝަނުން އުންމީދު ކުރާ ކަމަށް އެ ކުންފުނިން ބުންޏެވެ.
ދަރަވަންދޫ އެއާޕޯޓަކީ ގިނަ ބަޔަކު ބޭނުންކުރާ ބާރުބޮޑު އެއާޕޯޓަކަށް ވާތީ، ހިދުމަތުގެ ފެންވަރު މަތިކުރުމަކީ އެ ކުންފުނީގެ މުހިންމު އަމާޒެއްް ކަމަށް ވެސް އައިލެންޑް އޭވިއޭޝަނުން ބުނެފައިވެ އެވެ.
