ސަރުކާރުގެ ކެބިނެޓަށް ގެންނެވި ކުއްލި ބަދަލުތަކަކާއެކު، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އެއްކޮށްލައި، އެ ވުޒާރާގެ މިނިސްޓަރުގެ މަގާމަށް މުހައްމަދު ސައީދު މިއަދު އައްޔަނުކުރައްވައިފި އެވެ.
މި ދެ މިނިސްޓްރީ އެއްކޮށްލުމަށްފަހު މިހާރު ކަނޑައަޅާފައިވާ ރަސްމީ ނަމަކީ "މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް، އެންޑް ޓްރޭޑް އެވެ.
މި ބޮޑު ބަދަލު ގެނެސްފައިވަނީ ކެބިނެޓުގައި ހިމެނޭ 10 މިނިސްޓަރަކު ކުއްލި ގޮތަކަށް މަގާމުން އިސްތިއުފާ ދެއްވުމާ ގުޅިގެންނެވެ. ރައީސް އޮފީހުން ހާމަކުރައްވާފައިވާ ގޮތުގައި، މި ބޭފުޅުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުންނެވެ.
Advertisement
ކުރިން ޓްރާންސްޕޯޓް މިނިސްޓަރުގެ މަގާމުގައި ހުންނެވި މުހައްމަދު އަމީން މިހާރު ވަނީ ޓުއަރިޒަމް މިނިސްޓަރުގެ މަގާމަށް ބަދަލުކުރައްވާފަ އެވެ. މި ބަދަލު ގެނެސްފައިވަނީ ކުރިން ޓުއަރިޒަމް މިނިސްޓަރުގެ މަގާމުގައި ހުންނެވި އަބްދުﷲ ހަލީލު އިސްތިއުފާ ދެއްވި ބޭފުޅުންގެ ތެރޭގައި ހިމެނިވަޑައިގަންނަވާތީ އެވެ.
މި ބަދަލުތަކަކީ ސަރުކާރުގެ ހިންގުން ހަރުދަނާކޮށް، ރައްޔިތުންނަށް ދޭންޖެހޭ ހިދުމަތްތައް އަވަސްމަގަކުން ފޯރުކޮށްދިނުމަށް ރައީސް މުއިއްޒު ފައްޓަވާފައިވާ މަސައްކަތްޕުޅުގެ ތެރެއިން އައި ބަދަލުތަކެއް ކަމަށް ބެލެވެ އެވެ.
