ތޮއްޑޫގައި ސީޕްލޭންގެ ހިދުމަތް ރަސްމީކޮށް ފެށުމާއި އެކު އެރަށުގެ ރައްޔިތުންނަށް އާމްދަނީ ހޯދޭނެ އިތުރު މަގުތަކެއް ފަހި ވެއްޖެ ކަމަށް ދިވެހިބަހާއި ގައުމިއްޔާތާ ބެހޭ މިނިސްޓަރު އާދަމް ނަސީރު އިބްރާހިމް ވިދާޅުވެއްޖެއެވެ. މިނިސްޓަރު މިހެން ވިދާޅުވީ ތޮއްޑޫގައި ސީޕްލޭންގެ ހިދުމަތް ތައާރަފް ކުރުމުގެ ރަސްމިއްޔާތު ޝަރަފްވެރި ކޮށްދެއްވައި ވާހަކަފުޅު ދައްކަވަމުންނެވެ.

ޡަޤާފީ އައިޓަމަކާއި އެކު ކުރިޔަށް ދިޔަ އެ ރަސްމިއްޔާތުގައި މިނިސްޓަރުގެ އިތުރުން އައިލެންޑް އޭވިއޭޝަންގެ ސީނިއާ މަނޭޖިން ޑިރެކްޓަރު އަލީ ސަލީމާއި ޓްރާންސްޕޯޓް މިިނިސްޓްރީގެ އިސްބޭފުޅުންނާއި ތޮއްޑޫ ކައުންސިލްގެ އިސްވެރިން ބައިވެރިވެވަޑައިގެންނެވިއެވެ.

މިނިސްޓަރު ވިދާޅުވީ އެރަށުގައި ހައްދާ މޭވާ އާއި ތަރުކާރި އެކްސްޕޯޓް ކުރުމަށް ވެސް ސީޕްލޭންގެ ހިދުމަތް ބޭނުން ކުރެވޭނެ ކަމަށެވެ. އަދި ކަނޑު ގަދަވުމުން މުދާ އެކްސްޕޯޓް ނުކޮށް، މަޑުކުރަން ދެން ނުޖެހޭނެ ކަމަށެވެ. ހަމައެއާއެކު ރައްޔިތުންނާއި ފަތުރުވެރިންނަށް ވެސް ތޮއްޑޫއަށް، ދަތުރު ކުރުމަށް ލުއިތަކެއް ލިބޭނެ ކަމަށް މިނިސްޓަރު ފާހަގަ ކުރެއްވިއެވެ.

އައިލެންޑް އޭވިއޭޝަންގެ ޑިރެކްޓަރު އަލީ ސަލީމް ވިދާޅުވީ އެ މަޝްރޫއަކީ ރައިސުލްޖުހޫރިއްޔާގެ ވައުދުފުޅާއި އެއްގޮތަށް ރާއްޖޭގެ ގިނަ ރަށްރަށުގައި ދަތުރުފަތުރުގެ ނިޒާމް އިތުރަށް ހަރުދާނަކޮށް، ތޮއްޑޫ ފަދަ ލޯކަލް ޓޫރިޒަމް ކުރިއަރާފައިވާ ރަށްތަކަށް ފަސޭހައިން ދަތުރު ކުރޭވެނެ ގޮތް ފަހިކޮށްދިނުމަށް ތައާރަފް ކުރި ހިދުމަތެއް ކަމަށެވެ.

ތޮއްޑޫ އަށް ސީޕްލޭނުގެ ހިދުމަތް ދިނުމަށް ހަމަޖެހިފައި ވަނީ ހަފްތާއަކު ދެދުވަހު އެވެ. ދިވެހިންނަށް ދޫކުރާ ފެއާ ޓިކެޓުގެ އަގަކީ 52 ޔޫއެސް ޑޮލަރެވެ.