އެމެރިކާއަކީ “ދުނިޔޭގައި ނިއުކްލިއާ ނުރައްކަލާއި ސްޓްރެޓެޖިކް ނުރައްކާތަކުގެ އަސާސީ މަސްދަރެއް” ކަމަށް ބުނެ ޗައިނާއިން އެމެރިކާއަށް ފާޅުގައި ފާޑު ކިޔައިފިއެވެ.

ޗައިނާއިން މިމޭރުމުން އެމެރިކާއަށް ފާޑު ކިޔާފައި ވަނީ ދުނިޔޭގެ ދެ ބާރުގެ މެދުގައި ޚާއްސަކޮށް ނިއުކްލިއާ މައްސަލަތަކާއި އަސްކަރީ ކަންތައްތަކާއި ގުޅޭ ގޮތުން އުފެދިފައިވާ ޓެންޝަންތައް އިތުރުވަމުންދާ ދަނޑިވަޅެއްގައެވެ.

ޗައިނާއިން ފާހަގަ ކުރެއްވި ގޮތުގައި ފުރަތަމަ ކަމަކަށް ނިއުކްލިއަރ އާސަނަލް ޒަމާނީ ކުރުމަށް އެމެރިކާއިން ކުރާ މަސައްކަތާއި، އަދި ނޭޓޯ ފަދަ އަސްކަރީ އިއްތިހާދުތައް ފުޅާކުރުމަށް އެމެރިކާއިން ކުރާ މަސައްކަތްތައް ހިމެނެއެވެ. މީގެ އިތުރުން ޗައިނާއިން ވަނީ އެމެރިކާއަށް ފާޑުވިދާޅުވެ، އެކި ސަރަހައްދުތަކުގައި ނިއުކްލިއާ ހަތިޔާރު ބެހެއްޓުމާއި، ޖަޕާނާއި ދެކުނު ކޮރެއާ ފަދަ ގައުމުތަކާއެކު ސްޓްރެޓެޖިކް އިއްތިހާދުތައް ވަރުގަދަކުރަނީ އެމެރިކާގެ ނުފޫޒު ހިފެހެއްޓުމަށް ކުރާ މަސައްކަތެއް ކަމަށް ބުނެފައެވެ.

ޗައިނާއާއި އެމެރިކާއާ ދެމެދު އުފެދިފައިވާ ޑިޕްލޮމެޓިކް ފިތުނަ ބޮޑުވަނީ ފުޅާ ދާއިރާއެއްގައި މައްސަލަތަކެއް ދިމާވުމުންނެވެ. އޭގެ ތެރެއިން މުހިއްމު ކަމަކީ ޓައިވާން މައްސަލަ އެވެ.، ޓައިވާނަކީ ވަކި ދައުލަތެއްގެ ގޮތުގައި އަމިއްލަ ވެރިކަން ކުރުމަށް އެމެރިކާއިން ތާއީދު ކުރާތީވެ ، ޗައިނާގެ “ވަން ޗައިނާ” ސިޔާސަތާއި މިކަން ފުށުއަރައެވެ. މީގެ އިތުރުން މިހާރު ހިނގަމުންދާ ވިޔަފާރީގެ މައްސަލަތަކާއި، އެމެރިކާގެ ދަތިކުރުމުގެ ފިޔަވަޅުތަކާއި، ޗައިނާއިން އެމެރިކާއަށް ޖާސޫސްކުރާ ކަމުގެ ތުހުމަތުތަކުގެ ސަބަބުން ދެގައުމުގެ ގުޅުން އިތުރަށް ވަނީ ގޯސް ވެފައެވެ.