މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފޯރުކޮށްދިނުމަށް ހަމަޖެހިފައިވާ މެރިޓައިމްގެ ޚިދުމަތްތަކަށް ބައެއް ފަރާތްތަކުން މިހާރުވެސް އެދެމުން އަންނަކަމަށް އެކުންފުނީގެ ސީއީއޯ މުހައްމަދު ވަޖީޙް އިބްރާހީމް ވިދާޅުވެއްޖެއެވެ.

ވަޖީހު މިހެން ވިދާޅުވީ މިއަދު އިހަވަންދިއްޕޮޅުގައި ބައިނަލްއަޤްވާމީ ބަންކަރިންގެ ޚިދުމަތް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.

ވަޖީހު ވިދާޅުވީ ރާއްޖޭގެ އިޤްތިޞާދު ބަދަލުކުރުމަށްޓަކައި ރައީސުލްޖުމްހޫރިއްޔާ ފައްޓަވާފައިވާ މަސައްކަތުގެ ތެރެއިން އެންމެ މުހިންމު އެއް މަސައްކަތަކީ މެރިޓައިމްގެ ދާއިރާއިން ރާއްޖެއަށް ފައިދާ ހޯދާދިނުންކަމަށެވެ. އަދި މެރިޓައިމް ޚިދުމަތުގައި ބޮޑު ބައެއް އަދާ ކުރާ ބަޔަކީ އެމްޕީއެލްކަން ފާހަގަކުރައްވައި، ބައިނަލްއަޤްވާމީ ބަންކަރިންގެ ޚިދުމަތާއެކު ގިނަ ފައިދާތަކެއް ލިބޭނެކަމަށް ވިދާޅުވިއެވެ.

"މިތަނުގައި ހިނގަމުންދާނީ ބައިނަލްއަޤްވާމީ ވިޔަފާރި، ބަންކަރިންގެ ޚިދުމަތް. މިތަނުގައި ވިޔަފާރި ކުރެވޭނެގޮތަށް ވިޔަފާރި ސަރަޙައްދެއް އުފައްދާފައި، އެތަނުން ވިޔަފާރިއަށް ބިން ދޫކުރާނެ. މިކަމުގެ ސަބަބުން އިހަވަންދިއްޕޮޅުގެ ރައްޔިތުންނަށް ބޮޑެތި މަންފާތަކެއް ލިބޭނެ." ވަޖީހު ވިދާޅުވިއެވެ.

 ^{ބައިނަލްއަގުވާމީ ބަންކަރިންގެ ޚިދުމަތް ފެށުމަށް ހއ. ހޯރަފުށީގައި ބޭއްވި ރަސްމިއްޔާތު ތެރެއިން / ފޮޓޯ: ޚުލާސާ}

މީގެއިތުރުން، ހއ. ހޯރަފުށީ ފަޅު ހިއްކައިގެން އެ ބިމުގައި އެމްޕީއެލްއިން ކޮންޓެއިނަރ ޓާމިނަލަކާއި ފްރީ ޒޯނެއް ތަރައްޤީކޮށް ރާއްޖެއިން ބޭރަށް އެކްސްޕޯޓު ކުރެވޭނެ ގޮތްތައް ހަމަޖައްސާނެކަމަށް ވަޖީހު ވިދާޅުވިއެވެ. މިކަމުގެ ސަބަބުން އިހަވަންދިއްޕޮޅުގެ ރައްޔިތުންނަށް ބޮޑެތި މަންފާތަކެއް ލިބޭނެކަމަށްވެސް އޭނާ ފާހަގަކުރެއްވިއެވެ.

ވަޖީހު އިތުރަށް ވިދާޅުވީ އުތުރުގެ މެރިޓައިމް ޚިދުމަތާއެކު ހއ. އުލިގަމުގައި ޤާއިމްކޮށްފައިވާ އޮފީސް މެދުވެރިކޮށް އެމްޕީއެލްއިން އެސަރަޙައްދުގައި މެރިޓައިމްގެ 14 ޚިދުމަތެއް ދޭނެކަމަށެވެ. އަދި މިހާރުވެސް ގްރީކްގެ 17 ބޯޓު އޮންނަ ކުންފުންޏަކުން ފެނުގެ އޯޑަރު ދީފައިވާކަންވެސް އޭނާ ފާހަގަކުރެއްވިއެވެ.

މި ރަސްމިއްޔާތުގައި ވަޖީހު ވަނީ މާލޭ ވިޔަފާރި ބަނދަރު 2027 ވަނަ އަހަރު ނިމެންވާއިރަށް ތިލަފުއްޓަށް ބަދަލުކޮށް ޚިދުމަތް ދޭން ފަށާނެކަމަށް ވެސް ވިދާޅުވެފައެވެ. އަދި އައްޑޫ ސިޓީ ޕޯޓު ތަރައްޤީކުރުމުގެ ޕްލޭނާއި ހައްދުއްމަތީގައި ޤާއިމްކުރާ މެރިޓައިމްގެ ޚިދުމަތުގެ ޕްލޭންވެސް އޭނާ ވަނީ ޙިއްސާކުރައްވާފައެވެ.