ސަރުކާރުން މިއަދު ކްރިއޭޓިވް އިކޮނޮމީ ފަންޑެއް ތަޢާރަފްކޮށްފިއެވެ. މި ފަންޑު އިފްތިތާޙްކޮށްދެއްވީ ދަރުބާރުގޭގައި ބޭއްވުނު ޚާއްސަ ރަސްމިއްޔާތެއްގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކްރިއޭޓިވް އިކޮނޮމީ ތަރައްޤީކުރުމުގެ ސިޔާސަތުގެ ތެރެއިން އިފްތިތާޙްކޮށްފައިވާ މި ފަންޑުގެ އަމާޒަކީ، އީޖާދީ އަދި އުފެއްދުންތެރި ފަރާތްތަކަށް މާލީ އެހީތެރިކަން ފޯރުކޮށްދިނުމެވެ. އެގޮތުން ހުށަހަޅާ ކޮންމެ ފަރާތަކަށްވެސް 50،000 ރުފިޔާއާއި 300،000 ރުފިޔާއާ ދެމެދު އެހީއެއް ދޭނެކަމަށް މި މަސައްކަތުގައި އިސްކޮށް ހަރަކާތްތެރިވާ ބިޒްނަސް ސެންޓަރ ކޯޕަރޭޝަނުން ވިދާޅުވެއެވެ.

ވަޒީރު ސަޢީދު ވިދާޅުވި ގޮތުގައި މި ފަންޑުގެ އެހީތެރިކަން ލިބޭނީ ފިލްމު، މިއުޒިކް، އާޓްސް އެންޑް ކްރާފްޓް އަދި ޑިޖިޓަލް ކޮންޓެންޓް ކްރިއޭޝަންގެ ދާއިރާތަކަށެވެ. އަދި ލޯނު އަނބުރާ ދެއްކުމުގައި ލުއިފަސޭހަ ގޮތްތަކެއް ހުންނާނެއެވެ.

މީގެ އިތުރުން، ކުރިއަށް އޮތް 5 އަހަރަށް ކްރިއޭޓިވް އިކޮނޮމީގެ މަސައްކަތް ކުރިއަށްގެންދާނެ ގޮތުގެ މަގުޗާޓެއްވެސް މި ރަސްމިއްޔާތުގައި ތަޢާރަފްކޮށްފައިވެއެވެ. މި މަގުޗާޓުގެ ތެރެއިން ޓެކްނޮލޮޖީ ބޭނުންކުރުން އިތުރުކުރުމާއި، އުފެއްދުންތެރިންގެ ޙައްޤުތައް ޙިމާޔަތްކުރުމާއި، ވިޔަފާރިތަކަށް ފުރުޞަތު ހޯދައިދިނުމަށް މަސައްކަތްކުރެވޭނެކަމަށް ވަޒީރު ސަޢީދު ވިދާޅުވިއެވެ.

ރަސްމިއްޔާތުގައި ވާހަކަފުޅު ދައްކަވަމުން ވަޒީރު ސަޢީދު ވިދާޅުވީ މި ފަންޑަކީ ރާއްޖޭގެ އުފެއްދުންތެރި ދާއިރާތަކަށް އައު ހިތްވަރެއް ލިބިގެންދާނެ ކަމެއް ކަމަށެވެ. އަދި މިކަމުގެ ސަބަބުން ޤައުމުގެ އިޤްތިޞާދަށް އައު ކުރިއެރުންތަކެއް ލިބިގެންދާނެ ކަމަށްވެސް އެމަނިކުފާނު ވިދާޅުވިއެވެ.

ކްރިއޭޓިވް އިކޮނޮމީ ފަންޑަށް އެދި ހުށަހެޅުމުގެ ފުރުޞަތު މި މަހުގެ ނިޔަލަށް ހުޅުވާލެވޭނެ ކަމަށް ވަޒީރު ސަޢީދު ވިދާޅުވިއެވެ. އަދި މި ފަންޑާ ގުޅޭ އިތުރު މަޢުލޫމާތު މިނިސްޓްރީގެ ވެބްސައިޓުން ލިބެން ހުންނާނެ ކަމަށްވެސް އެމަނިކުފާނު ވިދާޅުވިއެވެ.