ކުޅުދުއްފުށި ސިޓީގައި އާންމުންނަށް ހުޅުވާލެވިފައިވާ ލައިބްރަރީއެއް އިއްޔެ ރޭ ރަސްމީކޮށް ހުޅުވައިފިއެވެ.

މި ލައިބްރަރީ ޤާއިމްކޮށްފައިވަނީ މަޢުލޫމާތު ހޯދުމާއި އުނގެނުމަށް ބާރު އެޅުމުގެ މަޤްޞަދުގައެވެ.

ކުޅުދުއްފުށި ސިޓީ ކައުންސިލްގެ ސެކްރެޓަރީ ޖެނެރަލް އާދަމް އަބްދުﷲ ވިދާޅުވި ގޮތުގައި މި ލައިބްރަރީގައި މައިގަނޑު ތިން ބައެއް ހިމެނެއެވެ. އެއީ ފޮތްތައް ބަހައްޓާފައިވާ ސަރަޙައްދާއި، ދެ ސްޓަޑީ ރޫމް އަދި ވެލްނެސް ރޫމެކެވެ. ވެލްނެސް ރޫމަކީ ރަށުން ބޭރުގައި ތިބޭ ކައުންސެލަރުންނަށް އޮންލައިން ކޮންސަލްޓޭޝަން ހެދުމަށް ޚާއްޞަކޮށްފައިވާ ތަނެކެވެ.

މި ލައިބްރަރީ ގާއިމްކޮށްފައިވަނީ ކުރިން ލޯކަލް މާރުކޭޓެއް ހެދުމަށް ޕީއެސްއައިޕީގެ ބަޖެޓުން ޢިމާރާތްކޮށްފައިވާ ތަނެއްގައެވެ. ފަހުން ކޮވިޑް-19ގެ ދުވަސްވަރު މި ޢިމާރާތް ބޭނުންކޮށްފައިވަނީ ފްލޫ ކްލިނިކެއްގެ ގޮތުގައެވެ.

އާދަމް އަބްދުﷲ ވިދާޅުވި ގޮތުގައި ޕަބްލިކް ލައިބްރަރީއަކީ ލާމަރުކަޒީ ޤާނޫނުން ވެސް ކައުންސިލަށް ލާޒިމްކުރާ ކަމަކަށްވާއިރު، އަލުން ޢިމާރާތެއް ހެދުމުގެ ބަދަލުގައި މިހާރު ހުރި ޢިމާރާތަށް މިލިއަނަކަށް ވުރެ ގިނަ ރުފިޔާ ޚަރަދުކޮށްގެން ބޮޑު ބަދަލެއް ގެނެސް، ލައިބްރަރީއެއް ހެދުމަށް ނިންމީ ކަމަށެވެ.

މީގެ އިތުރުން، މި ޢިމާރާތުގައި މިއުޒިއަމެއް އަދި އޮސްޓްރޭލިއާ ހައި ކޮމިޝަނާ ގުޅިގެން ޒުވާނުންނަށް ޚާއްޞަކޮށްގެން މެންޓަލް ހެލްތު ސެންޓަރެއް ވެސް ހުޅުވާނެ ކަމަށް ވަނީ ހާމަކޮށްފައެވެ.

ހޮސްޕިޓަލް ކައިރީގައި ހުންނަ މި ޕަބްލިކް ލައިބްރަރީ ހުޅުވާފައި ހުންނާނީ ހަފުތާގެ ފަސް ދުވަހު، ހެނދުނު 9:00 އިން މެންދުރުފަހު 3:00 އަށް އަދި ހަވީރު 4:00 އިން ރޭގަނޑު 10:00 އަށެވެ. ހޮނިހިރު ދުވަހަކީ ރަށަށް ގިނަ ބަޔަކު ޒިޔާރަތްކުރާ ދުވަހަކަށް ވާތީ، އެ ދުވަހުގެ ދުވާލު ވެސް ލައިބްރަރީ ހުޅުވާފައި ހުންނާނެ ކަމަށް ސިޓީ ކައުންސިލުން މައުލޫމާތު ދީފައިވެއެވެ.

މި ވަގުތު ލައިބްރަރީގައި ތަފާތު އެކި ވައްތަރުގެ 2,000 ފޮތް ހުރި ކަމަށާއި އިތުރު ފޮތްތައް ވަރަށް އަވަހަށް ލިބޭނެ ކަމަށް ވެސް ވަނީ ބުނެފައެވެ.

ކުޅުދުއްފުށި ސިޓީގެ މޭޔަރު މުޙައްމަދު އާޠިފް ފޭސްބުކްގައި ކުރެއްވި ޕޯސްޓެއްގައި ވިދާޅުވެފައިވަނީ މި ލައިބްރަރީއާއެކު ރަށުގެ ތަރައްޤީ އާއި ތަހުޒީބުގެ ތާރީޚުގެ މުޅިން އައު ސަފުހާއެއް ލިޔެވިގެންދާނެ ކަމަށެވެ. އޭނާ ވިދާޅުވީ މިއީ ހަމައެކަނި ފޮތްތަކެއް ލާފައި ހުރި ޢިމާރާތެއް ނޫން ކަމަށްވެސް އޭނާ ވަނީ ފާހަގަކުރައްވާފައެވެ.

"މިރޭ ހުޅުވިގެން މި ދިޔައީ މައުލޫމާތާއި އިލްމުގެ ބޮޑު ޚަޒާނާއެއް. މިރޭ ހުޅުވިގެން މި ދިޔައީ އަޅުގަނޑުމެންގެ އިންސާނީ ވަސީލަތް ތަރައްޤީކޮށް މީހުން ބިނާކުރާނޭ އެދުރުގެއެއް. މިރޭ މި ރޯކުރެވުނީ އަޅުގަނޑުމެންގެ މުސްތަޤުބަލަށް މަގުދައްކާ އަލިކުރާނޭ އަލިގަދަ އިލްމީ ދަންމަރެއް." މޭޔަރު ކުރެއްވި ޕޯސްޓުގައި ވިދާޅުވިއެވެ.

ކުޅުދުއްފުށީގެ ރަޖިސްޓްރީގައި 10,000 މީހުން ތިބި ނަމަވެސް، ބިދޭސީންނާއި ކިޔަވަން ބަދަލުވި މީހުންނާ އެކު ރަށުގައި 13,000 އިން 15,000 އާ ދެމެދުގެ އަދަދެއްގެ މީހުން ދިރިއުޅެއެވެ.

މި ލައިބްރަރީ ހުޅުވުމަކީ ކުޅުދުއްފުށި ސިޓީގެ ރައްޔިތުންނަށް ލިބިގެންދިޔަ ވަރަށް މުހިންމު ޚިދުމަތަކަށް ވާއިރު، މިއީ ރަށުގެ ތައުލީމީ ފެންވަރު މަތިކުރުމަށާއި، މަޢުލޫމާތު ހޯދުމުގެ ފުރުސަތު ފަހިކޮށްދިނުމަށް އެޅުނު މުހިންމު ފިޔަވަޅެކެވެ. އަދި މި ލައިބްރަރީގެ ސަބަބުން ރަށުގެ ޒުވާނުންނާއި ކުދިންނަށް ކިޔެވުމަށާއި ދިރާސާކުރުމަށް ފުރުޞަތުތައް ހިވެގެންދާނެކަމަށް އުންމީދު ކުރެވެއެވެ.