ޗައިނާއާއި ދިވެހިރާއްޖެއާ ދެމެދު ވެފައިވާ މިނިވަން ވިޔަފާރީގެ އެއްބަސްވުމަށް (އެފްޓީއޭ) 2024 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން އަމަލުކުރަން ފަށާނެ ކަމަށް ސަރުކާރުން ބުނެފިއެވެ.

މި އެއްބަސްވުމަކީ ބިލިއަން ޑޮލަރުގެ ވިޔަފާރިއަށް މަގުފަހިވާގޮތަށް އެކުލަވާލާފައިވާ އެއްބަސްވުމެކެވެ.

ޗައިނާއާއެކު މިނިވަން ވިޔަފާރީގެ އެއްބަސްވުމުގައި ރާއްޖެއިން ސޮއިކުރީ 2014 ވަނަ އަހަރުއެވެ. އަދި މި އެއްބަސްވުމަށް އަމަލުކުރުމަށް 2017 ވަނަ އަހަރު ވަނީ ރައްޔިތުންގެ މަޖިލީހުން ރުހުން ދީފައެވެ. ނަމަވެސް 2018 ވަނަ އަހަރު ސަރުކާރު ބަދަލުވުމާ ގުޅިގެން މި އެއްބަސްވުމަށް ޢަމަލުކުރުން ވަނީ މަޑުޖެހިފައެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު، މި އެއްބަސްވުމަށް ޢަމަލުކުރަން ފެށުމަށް ކުރަންޖެހޭ މަސައްކަތްތައް ވަނީ ފައްޓަވާފައެވެ. މިކަމުގެ ނަތީޖާއެއްގެ ގޮތުން، އަންނަ އަހަރުގެ ފުރަތަމަ ދުވަހުން ފެށިގެން މި އެއްބަސްވުމަށް އަމަލުކުރަން ފެށޭނެއެވެ.

މި އެއްބަސްވުމުގެ ސަބަބުން ދެ ޤައުމުގެ ދެމެދުގައި ވިޔަފާރީގެ ގުޅުން އިތުރަށް ބަދަހިވެ، އިޤްތިޞާދީ ގޮތުން ދެ ޤައުމަށްވެސް ފައިދާތަކެއް ލިބޭނެކަމަށް ސަރުކާރުން ވަނީ ބުނެފައެވެ.