އެމްޕޮކްސް ވައިރަސްގެ އައު ކޭހެއް ފެނިފައިވާ ކަމަށް މެލޭޝިއާގެ ސިއްޙީ ވުޒާރާއިން މިދިޔަ އަންގާރަ ދުވަހު ބުނެފިއެވެ.
އެ ވުޒާރާއިން ބުނީ މިއީ ކްލޭޑް 2 ބާވަތުގެ ކޭހެއް ކަމަށާއި، މިއީ މާ ގޯސްނޫން ބާވަތެއްކަމަށް ކަމަށެވެ.
މެލޭޝިއާގެ ސިއްޙީ ވުޒާރާއިން ބުނީ މި ކޭސް ފާހަގަކުރެވުނީ ހޯމަ ދުވަހު ކަމަށާއި ބަލި ޖެހުނު މީހާއަކީ މެލޭޝިއާގެ ރައްޔިތެއް ކަމަށެވެ. ސެޕްޓެމްބަރު 11 ވަނަ ދުވަހު އޭނާ ހުންއައިސް، ކަރުގައި ރިއްސުމާއި، ކެއްސުން ފަދަ އަލާމާތްތައް ފެނި، އަނެއް ދުވަހު އޭނާގެ ހަށިގަނޑުގައި ބޮޑެތި ލައްތައް ފެނިފައިވާކަމަށް އެ ވުޒާރާއިން ބުންޏެވެ.
މި ބަލި ޖެހުނު މީހާ މިހާރު ވަނީ އެކަހެރިކޮށްފައެވެ. އޭނާގެ ހާލު ރަނގަޅު ކަމަށް ސިއްޙީ ވުޒާރާއިން ބުނެފައިވެއެވެ. އަދި މި ބަލި ޖެހުނު މީހާއާ ގުޅުން ހުރި އެންމެން ދެނެގަނެ، އެ މީހުންގެ ސިއްޙީ ހާލަތު ހަރުދަނާ އުސޫލުތަކެއްގެ ދަށުން ބަލަހައްޓަމުންދާ ކަމަށްވެސް އެ ވުޒާރާއިން ބުނެފައިވެއެވެ.
މެލޭޝިއާގައި މިދިޔަ އަހަރުގެ ޖުލައި މަހުން ފެށިގެން މިހާތަނަށް އެމްޕޮކްސްގެ 10 ކޭސް ވަނީ ރިޕޯޓުކޮށްފައެވެ. މި ހުރިހާ ކޭހަކީވެސް ކްލޭޑް 2 ބާވަތުގެ ކޭސްތަކެކެވެ.
މިދިޔަ މަހު، ދުނިޔޭގެ ސިއްޙަތު ޖަމްޢިއްޔާއިން ވަނީ އެމްޕޮކްސްއަކީ ދުނިޔޭގެ އާންމު ސިއްޙަތަށް ނުރައްކާވެފައިވާ ކުއްލި ހާލަތެއް ކަމުގައި އިޢުލާނުކޮށްފައިވެއެވެ. މިއީ އެ ޖަމްޢިއްޔާއިން ދޭ އެންމެ މަތީ ދަރަޖައިގެ އިންޒާރެކެވެ.
މި ބަލި ޖެހެނީ މަންކީޕޮކްސް ވައިރަހުންނެވެ. މިއީ އާންމުކޮށް މާ ގޯސް ބައްޔެއް ނޫނެވެ. ނަމަވެސް މަރުވުމުގެ ފުރުސަތުވެސް މި ބަލީގައި އޮންނައިރު، ކުޑަކުދިންނާއި، މާބަނޑު އަންހެނުންނާއި، އެޗްއައިވީ ފަދަ ބަލިތަކުގެ ސަބަބުން ހަށިގަނޑުގެ ދިފާޢީ ނިޒާމު ބަލިކަށިވެފައިވާ މީހުންނަށް މި ބަލީގެ ނުރައްކާ ބޮޑެވެ.
