ރައްޔިތުންގެ މަޖިލީހުން މިއަދު ބޭއޭއްވި ޖަލްސާގައި، ހުސްވެފައިވާ ޕްރޮސެކިއުޓަރ ޖެނެރަލްގެ މަޤާމަށް ހައި ކޯޓުގެ ކުރީގެ ފަނޑިޔާރު އަލްއުސްތާޛް ޢައްބާސް ޝަރީފު އައްޔަން ކުރުމަށް ރުހުން ދީފިއެވެ.
މި ނިންމުން ފާސްކުރެވުނީ ޖަލްސާގައި ހާޒިރުވެވަޑައިގެން ތިއްބެވި 85 މެންބަރުންގެ އިއްތިފާގުންނެވެ.
ޕްރޮސެކިއުޓަރ ޖެނެރަލްގެ މަޤާމަށް އައްޔަންކުރެވުނު ހ. ޔެލޯ ރޯސް އަލްއުސްތާޛް ޢައްބާސް ޝަރީފަކީ ޤާނޫނީ ދާއިރާގައި 23 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. އޭނާގެ މަސައްކަތުގެ ތަޖުރިބާގެ ތެރޭގައި ރައީސުލްޖުމްހޫރިއްޔާގެ އޮފީހުގެ ލީގަލް ކައުންސެލްގެ މަޤާމާއި، ޖުޑީޝަލް ސަރވިސް ކޮމިޝަނުގެ މެންބަރުކަމާއި ނައިބު ރައީސްކަން ހިމެނެއެވެ.
Advertisement
ޢައްބާސް ޝަރީފަކީ 2011 އިން 2015 އަށް ހައި ކޯޓުގެ ފަނޑިޔާރެއްގެ ގޮތުގައިވެސް މަސައްކަތްކުރައްވާފައިވާ ބޭފުޅެކެވެ. އޭނާ އެންމެ ފަހުން މަސައްކަތް ކުރައްވަމުން ގެންދެވީ ރައީސުލްޖުމްހޫރިއްޔާގެ އޮފީހުގެ ލީގަލް އެފެއަރސް ސެކްރެޓަރީގެ މަޤާމުގައެވެ.
ޢައްބާސް ޝަރީފުގެ ތަޢުލީމީ ފެންވަރަށް ބަލާއިރު، އޭނާ ވަނީ މެލޭޝިއާގައި ޤާނޫނީ ދާއިރާއިން ޑިޕްލޮމާ ހާސިލްކުރައްވާ، އޮސްޓްރޭލިއާގެ ޔުނިވަރސިޓީ އޮފް ޓެސްމޭނިއާއިން ބެޗެލަރސް ޑިގްރީ ހާސިލްކުރައްވާފައެވެ.
ޕްރޮސެކިއުޓަރ ޖެނެރަލްގެ މަޤާމަށް ޢައްބާސް ޝަރީފު އައްޔަންކުރެވުމާއެކު، އޭނާގެ ފުޅާ ތަޖުރިބާއާއި ޤާބިލުކަން ޤާނޫނު ތަންފީޒުކުރުމުގެ ދާއިރާއަށް ގެނެސްދޭނެ ކަމަށް އުންމީދު ކުރެ ކުރެވެއެވެ.
