ޗިލްޑްރަންސް އޮމްބަޑްސްޕާސަންގެ އޮފީހުގައި ހިނގާ ކަމަށް ތުހުމަތުކުރެވޭ މައްސަލަތަކެއް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަލަން ފަށައިފިއެވެ.

އެޗްއާރުސީއެމް އިން މިއަދު ނެރުނު ބަޔާނެއްގައި ބުނެފައިވަނީ، ޗިލްޑްރަންސް އޮމްބަޑްސްޕާސަންގެ އޮފީހުގައި މުވައްޒަފުންގެ މެދުގައި ތަފާތުކުރުމާއި ނަފްސާނީ އަނިޔާގެ މައްސަލަތަކެއް ހުރިކަމަށް ބުނެ ހުށަހެޅުނު މައްސަލައެއް ބަލަން ފަށާފައިވާ ކަމަށެވެ.

މި މައްސަލައިގައި، އޮމްބަޑްސްޕާސަންގެ މަޤާމުގައި މިހާރު ހުންނެވި ނިއުމާތު ޝަފީގަކީ މޯލްޑިވްސް ގާލް ގައިޑްސް އެސޯސިއޭޝަންގެ ޗީފް ކޮމިޝަނަރުކަމަށް ވާތީ، އެއީ އޮމްބަޑްސްޕާސަންގެ ސުލޫކީ މިންގަނޑާ ޚިލާފު ކަމެއްކަމަށް ފާހަގަކޮށްފައިވެއެވެ.

މީގެ އިތުރުން، އޮފީސް ހިންގުމުގައި ރަސްމީ ސިފައެއް ނެތުމާއި، މުވައްޒަފުންގެ މެދުގައި ތަފާތުކުރުން ގެންގުޅޭކަމުގެ ތުހުމަތުތަކެއް މި މައްސަލައިގައި ހިމެނެއެވެ. އަދި ރާއްޖެއިން ބޭރަށް އޮފީސް ތަމްސީލުކުރުމަށް ފުރުސަތު ދެނީ ވަކި ބަޔަކަށް އެކަނި ކަމަށްވެސް މައްސަލައިގައި ފާހަގަކޮށްފައިވެއެވެ.

އެޗްއާރްސީއެމްއިން ބުނެފައިވަނީ މި މައްސަލައަކީ ވިސްލްބްލޯކުރާ ފަރާތްތައް ރައްކާތެރިކުރުމުގެ ޤާނޫނުގެ ދަށުން ހުށަހަޅާފައިވާ މައްސަލައެއްކަމަށެވެ. މި މައްސަލައިގައި ހިމެނޭ ކަންކަން ބަލައި، އަޅަންޖެހޭ ފިޔަވަޅުތައް އަޅާނެކަމަށް އެޗްއާރްސީއެމްއިން ވަނީ ބުނެފައެވެ.