ކުންފުނިތައް ބަނގުރޫޓުވެފައިވަނީ ކުރީ ސަރުކާރުގެ ޢަމަލުތަކުގެ ސަބަބުން ކަމަށް ރައްޔިތުންގެ މަޖިލިހުގެ ތިނަދޫ އުތުރު ދާއިރާގެ ޕީއެންސީގެ މެމްބަރު ސައުދުﷲ ހިލްމީ ވިދާޅުވެއްޖެއެވެ.

ސައުދުﷲ މިހެން ވިދާޅުވީ ރައްޔިތުންގެ މަޖިލީހުގައި ދައުރުން ބޭރުގައި މިއަދު ބޭއްވުނު ޖަލްސާގައި ކުންފުނީގެ ޤާނޫނަށް ގެންނަ އިސްލާހުތަކާ ގުޅޭގޮތުން ވާހަކަފުޅު ދައްކަވަމުންނެވެ.

ކުންފުނީގެ ޤާނޫނަށް ގެންނަ އިސްލާހުތަކަކީ ވަރަށް މުހިންމު ބަދަލުތަކެއް ކަމަށާއި އަދި މި އިސްލާހުތަކުގެ ސަބަބުން ކުންފުނިތަކުގެ ހިންގުން ހަރުދަނާވެ، ރައްޔިތުންނަށް އޭގެ ފައިދާ ލިބޭނެ ކަމަށް އުންމީދުކުރައްވާ ކަމަށްވެސް ސައުދުﷲ ވިދާޅުވިއެވެ.

"ކުންފުނިތަކުގެ ވާހަކަ މިއަދު ދައްކާއިރު ވިސްނާލަން ޖެހޭ މިއަދުގެ ސަރުކާރުން ކަންތައް ކުރި ގޮތަކުނެއް ނޫން ކުންފުނިތައް ބަނގުރޫޓު ވެގެން ދަނީ. ކުންފުނިތައް ބަގްރޫޓްވެގެން ދަނީ ކުރީ ސަރުކާރުން ކަންތައްތައް ކުރި ގޮތުން. އަންހެނަކު ބަލިވެ އިންނަތާ ހަމަ އެ ދުވަހަކު ނޫން ވިހަނީ. ނުވަ މަހާއި 10 ދުވަސް ނަގާ. އެހެންވީމަ ނުވަމަހާއި 10 ދުވަސް ފުރާ ދަރިއަކު ވިހީމަ އެއީ ދަރިފުޅު ގަރުބަގަތް ދުވަސް ކަމަށް ބަލައިގެން ނުވާނެ. އެހެންވީމަ މިއަދު ކުންފުނިތަކަށް ދިމާވަމުންދާ މައްސަލަތައް ދިމާވަނީ މިދިޔަ ސަރުކާރުން ކަންތައްތައް ކުރި ގޮތުން." ސައުދުﷲ ވިދާޅުވިއެވެ.

ސައުދުﷲ ފާހަގަކުރެއްވި ގޮތުގައި، ފެނަކައަށް ސަޕްލައިކުރި ފަރާތްތަކަށް ފައިސާ ނުދިނުމުގެ މައްސަލައަކީ ކުރީ ސަރުކާރުގައިވެސް އޮތް މައްސަލައެކެވެ. އަދި ކުރީ ސަރުކާރުން ގެރެންޓީއެއް ނެތި 4.1 މިލިއަން ރުފިޔާ އަމިއްލަ ފަރާތަކަށް ދޫކުރިކަންވެސް ސައުދުﷲ ފާހަގަކުރެއްވިއެވެ.

"މިފަދަ ކަންކަމުގެ ސަބަބުން ކުންފުނިތަކަށް ގެއްލުންވަމުންދަނީ. އަދި މިއީ ކުންފުނިތައް ބަނގުރޫޓުވުމަށް މަގުފަހިވާ ކަންކަން،" ސައުދުﷲ ވިދާޅުވިއެވެ.

ކުންފުނީގެ ގާނޫނު އަވަހަށް އިސްލާހުކޮށް، އޭގެ ފައިދާ ރައްޔިތުންނަށް ލިބުމަށް އުންމީދުކުރައްވާ ކަމަށާއި އަދި މި އިސްލާހުތަކަކީ ކުންފުނިތަކުގެ ހިންގުން ހަރުދަނާކޮށް، އިގްތިސާދީ ގޮތުން ގައުމަށް ކުރިއެރުން ހޯދައިދޭނެ ބަދަލުތަކެއް ކަމަށްވެސް ސައުދުﷲ ވިދާޅުވެފައިވެއެވެ.