ހއ. މާރަންދޫ ކައުންސިލަށް މެންބަރަކު އިންތިޚާބު ކުރުމަށް ބޭއްވި ބައި-އިލެކްޝަންގައި ސަރުކާރު ހިންގާ ޕީއެންސީން ހޯދި ކާމިޔާބީއާ ގުޅިގެން، ރައީސް ޑރ. މުޙައްމަދު މުޢިއްޒުގެ މާލިމީކަމުގައި ތަނަވަސް އަޣުލަބިއްޔަތަކާއެކު އިންތިޚާބުތައް ކާމިޔާބުކުރާ މަންޒަރު ފެނިގެންދާ ކަމަށް ރައްޔިތުންގެ މަޖިލީހުގެ ހުޅުމާލެ އުތުރު ދާއިރާގެ ޕީއެންސީގެ މެންބަރު ހުސެއިން ޝަރީފް (ހުސެންބެ) ރޭ ވިދާޅުވެއްޖެއެވެ.
ހުސެންބެ "އެކްސް" ގައި ކުރެއްވި ޕޯސްޓެއްގައި ވިދާޅުވެފައިވަނީ، މާރަންދޫގައި 2018 އިން ފެށިގެން އިއްޔެގެ ބައި-އިލެކްޝަނާ ހަމައަށް ބޭއްވި ހަ އިންތިޚާބު ވެސް ކާމިޔާބު ކުރީ އެމްޑީޕީން ކަމަށެވެ. ނަމަވެސް މިހާރު ހާލަތު ބަދަލުވެ، ރައީސް ޑރ. މުޢިއްޒުގެ މާލިމީކަމުގައި ޕީއެންސީގެ ވެރިކަން ފެނިގެންދަނީ ތަނަވަސް އަޣުލަބިއްޔަތުން އިންތިޚާބުތައް ކާމިޔާބުކުރާ މަންޒަރު ކަމުގައި ހުސެންބެ ވިދާޅުވިއެވެ.
ހއ، މާރަންދޫގައި 2018 ފެށިގެން މިޔަދުގެ ބައި އިލެކުޝަނާ ހަމަޔަށް ބޭއްވުނު 6 އިންތިހާބްވެސް ކާމިޔާބް ކުރީ @MDPSecretariat ން، ނަމަވެސް ހާލަތު ބަދަލުވެ ހިކުމަތްތެރި ދިވެހީންގެ ރައީސް ޑރ. @MMuizzu ގެ މާލިމީ ކަމުގައި @pnc_secretariat ގެ ވެރިކަން ފެނިގެން ދަނީ ތަނަވަސް… https://t.co/UrdmkQkR5H
Advertisement
"ދުޢާއަކީ ﷲ ގެ ތަނަވަސް ރަޙްމަތްފުޅާއެކު ރައީސް ޑރ. މުޢިއްޒުގެ ވެރިކަމަކީ ރައްޔިތުންނަށް އުފާ ފާގަތިކަމާއި ހަމަޖެހުން ލިބިގެންދާ ވެރިކަމަކަށް ވެގެންދިއުމެވެ. އާމީން" މިހެން ހުސެންބެ ވިދާޅުވިއެވެ.
މާރަންދޫ ކައުންސިލަށް އާ މެންބަރަކު އިންތިޚާބު ކުރަނީ އެރަށު ކައުންސިލްގެ ނައިބު ރައީސްގެ މަޤާމުގައި ހުންނެވި އަޙްމަދު ރަމީޒު، ޖުލައި 13 ވަނަ ދުވަހު ކުއްލި ގޮތަކަށް ނިޔާވުމާ ގުޅިގެންނެވެ.
މި ބައި-އިލެކްޝަންގައި ވާދަކުރެއްވީ އިދިކޮޅު އެމްޑީޕީގެ ކެންޑިޑޭޓް ޝިހާމް މުޙައްމަދާއި، ސަރުކާރުގެ މައި ޕާޓީ ޕީއެންސީގެ ފަރާތުން ޢަބްދުލް ޙަމީދު ޢަބްދުއްސައްތާރެވެ. ނަތީޖާއަށް ބަލާއިރު، ޝިހާމަށް ލިބިވަޑައިގަތީ 250 ވޯޓު އަދި ޢަބްދުއްސައްތާރަށް ލިބިވަޑައިގަތީ 285 ވޯޓެވެ.
ފާހަގަކޮށްލެވޭ ކަމަކީ، މި ފަހުން ބާއްވާ ބައި-އިލެކްޝަންތައް ކާމިޔާބު ކުރަމުން އަންނަނީ ޕީއެންސީން ކަމާއި، އެ ޕާޓީން އިންތިޚާބުތައް ކާމިޔާބު ކުރަނީ އިދިކޮޅު އެންމެ ބޮޑު ޕާޓީ، އެމްޑީޕީ ބަލިކޮށްފައި ކަމެވެ.
