އިޖުތިމާޢީ އަދި ޢާއިލީ ތަރައްޤީއާބެހޭ ވަޒީރު ޑރ. ޢައިޝަތު ޝިހާމް މިމަހުގެ 11 އިން 13 އަށް އިންޑޮނޭޝިޔާއަށް ކުރެއްވި ދަތުރުފުޅުގައި، އާބާދީއާގުޅޭ ކަންކަމުގައި މާލީ އެހީ ފޯރުކޮށްދޭ ޔުނައިޓެޑް ނޭޝަންސް ފަންޑް ފޯ ޕޮޕިޔުލޭޝަން އެކްޓިވިޓީސް (ޔޫއެންއެފްޕީއޭ) އާއެކު އިތުރަށް ގުޅުން ބަދަހިކުރުމަށް މަޝްވަރާކުރައްވައިފިއެވެ.

މި ދަތުރުފުޅުގެ މައިގަނޑު މަޤްޞަދަކީ އިންޑޮނޭޝިޔާގެ ބާލީގައި ބޭއްވުނު "ރީޖަނަލް ކޮންފަރެންސް އޮން ޕޮޕިއުލޭޝަން އޭޖިން" ގެ "ރީ-ފްރޭމިން އޭޖިން ހައި ލެވެލް ޕެނަލް ޑިސްކަޝަން" ގައި ބައިވެރިވެވަޑައިގަތުމެވެ. މި މަހާސިންތާގައި 400 އަށްވުރެ ގިނަ މަންދޫބުން ބައިވެރިވެފައިވެއެވެ.

ދަތުރުފުޅުގެ ތެރޭގައި، ވަޒީރު ޢައިޝަތު ޝިހާމް ވަނީ ޔޫއެންއެފްޕީއޭގެ އޭޝިޔާ ސްޕެސިފިކް ސަރަހައްދަށް ކަނޑައަޅާފައި ހުންނަވާ ޑިރެކްޓަރ ޕިއޯ ސްމިތުއާ ބައްދަލުކުރައްވާފައެވެ. މި ބައްދަލުވުމުގައި ދެ ފަރާތުން ގުޅިގެން ކުރެވޭނެ ކަންކަމާ ބެހޭގޮތުން މަޝްވަރާކުރެވުނެވެ. އަދި ވަޒީރު ވަނީ އިޖުތިމާޢީ އަދި ޢާއިލީ ތަރައްޤީއާ ގުޅުންހުރި ކަންކަމުގައި ޔޫއެންއެފްޕީއޭއިން މިހާރުވެސް ވެދެއްވާ އެހީތެރިކަމަށް ޝުކުރު އަދާކުރައްވާފައެވެ.

މީގެއިތުރުން، ވަޒީރު ވަނީ އިކޮނޮމިކް އެންޑް ސޯޝަލް ކޮމިޝަން ފޮރ އޭޝިއާ އެންޑް ދި ޕެސިފިކް (އެސްކޭޕް) ގެ ސެކެޓްރީއާވެސް ބައްދަލުކުރައްވައި، އެސްކޭޕްއާއެކު ގުޅިގެން ކުރެވޭނެ ކަންކަމާ ގުޅޭގޮތުން މަޝްވަރާ ކުރައްވާފައެވެ.

ޕެނަލް ޑިސްކަޝަންގައި ވާހަކަފުޅު ދައްކަވަމުން، ވަޒީރު ވަނީ ރާއްޖޭގެ އާބާދީއަށް އަންނަމުންދާ ބަދަލުތަކާއި މި ބަދަލުތަކުގެ ސަބަބުން ދެމެހެއްޓެނިވި ތަރައްޤީއަށް ކުރާނެ އަސަރުތަކުގެ މައްޗަށް އަލިއަޅުވާލައްވާފައެވެ. ދަތުރުފުޅުގެ ތެރެއިން ވަޒީރު ވަނީ އިންޑޮނޭޝިޔާގައި ހުންނަ އިސްރަށްވެހިންނަށް ޚާއްސަ ކެއަރ ސެންޓަރެއްކަމަށްވާ އެލްއެލްޓީ ޖިރަންގް މެލިންޒީއަށް ޒިޔާރަތްކުރައްވައި، އެތަނުގައި ހިނގާ ހަރަކާތްތައް ބައްލަވާލައްވާލައްވާފައެވެ.