ހއ. މާރަންދޫ ކައުންސިލު ބައި-އިލެކްޝަން ކާމިޔާބު ކުރެއްވި ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ކެންޑިޑޭޓް ޢަބްދުލް ހަމީދު ޢަބްދުއްސައްތާރަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެ އެވެ.

ވެރިކަންކުރާ ޕާޓީގެ ލީޑަރު އަދި ޤައުމުގެ ރައީސް، އަބްދުއްސައްތާރަށް މަރުހަބާ ވިދާޅުވީ ނިމިގެންމިދިޔަ އިންތިޚާބުގައި މާރަންދޫގެ ބައި-އިލެކްޝަނުން ސައްތާޜު ހޯއްދެވި ކާމިޔާބާއި ގުޅިގެން އެކްސްގައި ކުރެއްވި ޕޯސްޓެއްގަ އެވެ. ރައީސްގެ ޕޯސްޓިގައި ވަނީ އިންތިހާބު ޕީއެންސީއަށް ކާމިޔާބުކޮށްދޭން މަސައްކަތްކުރި އެންމެހާ ފަރާތްތަކަށް ޝުކުރު އަދާކުރައްވާފަ އެވެ.

ހއ. މާރަންދޫ ކައުންސިލުން ހުސްވެފައިވާ ގޮނޑިއަށް ކައުންސިލަރަކު އިންތިހާބު ކުރުމަށް މިއަދު ބޭއްވި ބައި-އިލެކްޝަންގައި ވޯޓު ދިން ހުރިހާ ފަރާތްތަކަށް އެމަނިކުފާނު ވަނީ ޝުކުރު އަދާކުރައްވާފަ އެވެ. މި އިންތިހާބުގައި ކޮންގުރެސްގެ ކެންޑިޑޭޓުގެ އިތުރަށް ވާދަކުރީ އިދިކޮޅު އެމްޑީޕީގެ ކެންޑިޑޭޓެކެވެ. މާރަންދޫ ކައުންސިލް ބައި އިލެކްޝަންގައި ވާދަ ކުރީ އިދިކޮޅު އެމްޑީޕީގެ ކެންޑިޑޭޓް ޝިހާމް މުހައްމަދެވެ.

ސައްތާރު މި އިންތިހާބު ކާމިޔާބުކޮށްފައިވަނީ 285 ވޯޓުންނެވެ. ޝިހާމަށް ލިބިފައިވަނީ 250 ވޯޓެވެ. މި އިންތިހާބުގައި 736 މީހަކަށް ވޯޓުލުމުގެ ހައްގު ލިބިގެން ވެއެވެ. އޭގެ ތެރެއިން ވޯޓުލާފައި ވަނީ 560 މީހުން ނެވެ.

އެރަށު ކައުންސިލަށް އާ މެންބަރު އިންތިހާބު ކުރަނީ އެރަށު ކައުންސިލްގެ ނައިބު ރައީސްގެ މަގާމުގައި ހުންނެވި އަހުމަދު ރަމީޒު، މިއަހަރުގެ ޖުލައި 13 ވަނަ ދުވަހު ކުއްލި ގޮތަކަށް ނިޔާވުމާއި ގުޅިގެން ނެވެ.